Еврейлерге 3 - Zhana Osiet

¹ Сонымен, киелі бауырластарым, біз көктен келген шақыруды естіп, құтқарылғандардың қатарына қосылдық, сондықтан Исаның бізге жіберілген Елші әрі бірінші Бас қызметкер болғанын есімізден шығармайық.

² Өйткені Ол да Мұса секілді Құдайдың үйіндегі қызметтің барлығын адал атқарды.

³ Сонымен қатар, Иса Мұсаға қарағанда одан да үлкен даңққа бөленуге лайықты, себебі Ол Құдайдың үйін салып, оның қабырғасын тұрғызды.

⁴ Кез-келген үй біреу арқылы салынып, тұрғызылады, ал Құдай-барлығының құрылысшысы.

⁵ Мұса Құдайдың үйіндегі барлық қызметті адал атқарған қызметші болды, сол үшін Құдай оның қызметімен оған болашақтың болжамын көрсетті.

⁶ Мәсіх-Құдайдың Ұлы, сондықтан Ол Құдайдың үйінің үстінен қарайды. Ал Оның үйі-мына біз, сондықтан біз Оған нық сеніп, Оны мақтан тұтып, Оған артқан үмітімізді аяғына дейін сақтап қалуға тиіспіз.

⁷ Сондықтан Киелі Рух былай дейді: «Егер де сендер бүгінгі күні Оның даусын еститін болсаңдар,

⁸ онда жүректеріңді қатайтпаңдар әрі айдалада жүріп, сынақтан өткен күні Құдайға қарсы сөйлегендер сияқты күңкілдемеңдер.

⁹ Сендердің ата-бабаларың қырық жыл бойы Менің жасаған істерімнің бәрін өз көздерімен көрсе де, ақыр аяғында олар Мені сынап, тексерді.

¹⁰ Сол кезде Мен осы ұрпаққа ашуланып былай дедім: «Олардың жүректері әлі де адасуын тоқтатқан жоқ, сондықтан олар Менің жолдарымның қандай екенін әлі де білмейді».

¹¹ Сол үшін Мен оларға қаһарланып: «Енді олар Менің бейбіт тыныштығыма кірмейді!» - деп ант бердім.

¹² Бауырластар, өздерің байқап тұрғандай, абай болыңдар, тірі Құдайдан алыстап кетпеу үшін, араларыңдағы ешкімнің жүрегі зұлым әрі сенімсіз болмасын.

¹³ Ешкімнің жүрегі қатайып, күнәнің алдауына түспес үшін, күнде бір-біріңе ақыл-кеңес беріп, осы «бүгінгі күн» деп аталатын уақытқа дейін бір-біріңе жігер беріңдер.

¹⁴ Енді Оған сеніп, Одан басталған сенімімізді аяғына дейін берік ұстану үшін, біз Мәсіхпен бірігіп, біртұтас болып кеттік.

¹⁵ «Егер де бүгін Оның даусын еститін болсаңдар, күңкілдеп, жүректеріңді қатайтпаңдар», -деп алдында айтылғанды есімізде сақтайық.

¹⁶ Алайда бір кездері Оның даусын естігендердің кейбіреулері күңкілдеді емес пе? Ал олар Мұсаның басшылығымен Мысырдан шыққандардың өздері емес пе еді?

¹⁷ Сонда Құдай қырық жыл бойы кімдерге қаһарын төкті? Ол қаһарын күнә жасап, ақырында сол шөл далада денелері қалғандарға төкті емес пе?

¹⁸ Ол: «Сендер енді Менің бейбіт тыныштығыма кірмейсіңдер!» дегенде, Ол сол уәдесін тек Өзіне мойынсұнбағандарға айтты емес пе?

¹⁹ Сол кезде олар сенімсіздік танытқандықтан, Құдайдың тыныштығына кіре алмады.