Еврейлерге 10 - Zhana Osiet

¹ Өйткені Заң болашақта келуге тиіс болған игі істің нақты өзі емес, тек оның көлеңкесі ғана болатын, себебі жыл сайын тұрақты шалынатын құрбандықтар Құдайға жақындағысы келетіндерді ешқашан кемелді ете алмайды.

² Ал егер де солай болса, онда құрбандық шалу тоқтамас еді, өйткені бір рет тазартылғаннан кейін Құдайды дәріптеп, Оған табынушылар саналы түрде өзінің күнәлі екенін сезіне ала ма?

³ Міне, сондықтан жыл сайын мұны олардың есіне салып отыру қажет болды,

⁴ өйткені өгіз бен ешкінің қаны арқылы күнәларды толығымен алып тастау мүмкін емес.

⁵ Сол себепті Мәсіхтің Өзі осы әлемге келетін кезде былай деп айтқан: «Сен құрбандықтар мен сый-тартуларды қаламадың, бірақ Сен Мен үшін денемді дайындап қойдың.

⁶ Сен күнә үшін өртелетін барлық құрбандықтарды ұнатпадың.

⁷ Сонда Мен былай дедім: «Міне, Мен келе жатырмын, Жазбаның алғашқы бетінде Мен туралы жазылғандай, Құдай, Сенің еркіңді Мен орындаймын!»

⁸ Сонымен, жоғарыда айтылғанға келсек: «Құрбандықтар мен сый-тартуларды және күнәға байланысты өртелетін құрбандықтарды қаламадың, Сен оларды ұнатпадың», -деп Ол бұл жерде тек Заң бойынша берілетін құрбандықтар туралы айтып тұр.

⁹ Ол тағы былай деп қосты: «Міне, Мен Сенің еркіңді орындау үшін келе жатырмын», -дегенде, Ол бірінші берілетін (ескі) құрбандықтарды алып тастап, оның орнына Ол екіншісін (жаңасын) қойып отыр.

¹⁰ Сондықтан Иса Мәсіх Өз денесін бір рет және мәңгілікке құрбандыққа беріп, Құдайдың еркін орындаған кезде, біз Сол арқылы тазаланып, Құдайға бағышталдық.

¹¹ Құдайдың әрбір қызметкері өзінің күнделікті атқаратын қызметі арқылы қаншама рет құрбандықтар шалса да, олардың ешқайсысы күнәларды алып тастай алмайды.

¹² Ал Иса бүкіл күнәлар үшін бір-ақ рет Өзін құрбандыққа берді, Ол Құдайдың оң жағына барып отырды, енді сол жер Оның мәңгі тұрағы болды.

¹³ Сол жерде Құдай Оның жауларын Өзінің табанының астына салып беретін сәтті күтеді.

¹⁴ Ол Өзінің бір-ақ рет әкелген тартуы арқылы Құдайға бағышталғандарды кемелді етті.

¹⁵ Бұл туралы Киелі Рух бізге куәлік етеді.

¹⁶ «Мен сол күндерден кейін олармен мынандай келісім жасаймын, -дейді Жаратқан Ие, -Мен олардың жүрегіне Өз заңымды салып беремін және Мен оны олардың саналарына жазып қоямын».

¹⁷ Бұдан әрі былай деп қосады: «Мен олардың жасаған күнәлары мен заңсыз іс-әрекеттерін ешқашан есіме алмаймын».

¹⁸ Ал күнәлар толық кешірілген жағдайда, енді күнәға байланысты ешқандай сый-тарту мен құрбандық шалынбайды.

¹⁹ Сонымен, бауырластар, Исаның киелі қанының арқасында біздің де Киелі орынға кіретін құқығымыз бар, өйткені

²⁰ сол арқылы Ол бізге жаңа жол салды, бұл жол бізді шымылдықтың артындағы өмірге апарады, сол жолды Ол Өзінің денесі арқылы салды.

²¹ Міне, сондықтан Ол Құдайдың үйінің үстінен қарайтын, дәрежесі бәрінен де үлкен Бас қызметкер болып тағайындалды.

²² Біз енді таза жүрекпен, толық сеніммен Оның жүректерімізге бүркілген қаны арқылы жаман әдеттерден тазарған ар-ұятымызбен, сумен жуылу арқылы тазарған денемізбен Оған жақындайық.

²³ Сөйтіп, Ол арқылы бізге берілген тұғыры ешқашан шайқалмайтын үмітті ұстап алуға ұмтылайық, өйткені Ол бізге берген уәдесіне әрқашан да адал болып қала береді.

²⁴ Сол үшін біз бір-бірімізге көңіл аударып, сүйіспеншілік көрсетіп, мейірімді іс-әрекет жасап, жігер берейік.

²⁵ Осылай өзімізге әрдайым пайдасы мол жиындарды тастамайық, қайта, бір-бірімізге ақыл-кеңес берейік, ал кейбіреулерге (сенушілер жиынына қатыспау) әдет болып қалған, әсіресе, ақырғы күннің барған сайын қысқарғанын, (Иеміздің келетін күнінің) жақындап қалғанын өздерің де көріп жүрсіңдер.

²⁶ Егер де біз шындықты танып-біліп алғаннан кейін, өз еркімізге беріліп, күнә жасайтын болсақ, онда біздің сол жасаған күнәларымыз үшін берілетін ешқандай құрбандық жоқ.

²⁷ Ал соттың шешімін күту қандай қорқынышты, себебі Құдайға қарсы шыққандарды жалындаған от жұтып қоюға дайын тұр.

²⁸ Егер де біреу Мұсаның Заңын бұзып, оның сол әрекеті екі немесе үш куәгер арқылы дәлелденсе, оған ешқандай да мейірім көрсетілмей, өлім жазасына кесілетін.

²⁹ Егер кімде-кім Құдайдың Ұлын менсінбей, Оны аяққа таптайтын болса және өзін қанымен тазартып, бекітілген келісімді бағаламайтын болса, мейірімді Құдайдың Рухын ренжітіп, Оны қорлайтын болса, оны қандай жаза күтіп тұр деп ойлайсыңдар?

³⁰ Бұл туралы Құдайдың былай дегенін біз білеміз: «Кек алушы болмаңдар, кек алуды Маған қалдырыңдар, қарымтасын Мен Өзім қайтарамын», - деген болатын.

³¹ Тірі Құдайдың қолына түсу қандай қорқынышты!

³² Сендер Ізгі хабарды қабылдаған ең алғашқы күндеріңді естеріңе түсіріңдерші, сол уақыт сендердің шындықты жаңадан таныған кездерің болатын, сонда қанша азап шексеңдер де, соған шыдадыңдар.

³³ Өздеріңе тіл тигізіп, қысымшылық көрсетіп, басқаларға мазақ қылса да, сендер оны елемей, дәл осындай жағдайда жүргендермен иықтаса жүріп, оларға демеу болдыңдар.

³⁴ Абақтыда отырғандармен бірге азап шегіп, өз дүние-мүліктеріңнің тоналып жатқанын елемей, қуанышпен қабылдадыңдар, өйткені сендер сол кездің өзінде одан да керемет, ешқашан шірімейтін мүліктеріңнің көкте мәңгі сақтаулы тұрғанын білдіңдер.

³⁵ Сол үшін де сендер сол батылдықтарыңнан айрылып қалмаңдар, бұл сендерге көп сый-тартулар әкеледі.

³⁶ Құдайдың еркін бұлжытпай орындап, өздеріңе берілген уәдеге ие болу үшін, шыдамды болыңдар.

³⁷ Өйткені Ол өте қысқа уақыт аралығында және «Жақын арада келеді, бұған өте аз мезгіл қалды, алайда Ол ешқашан кешікпейді.

³⁸ Менің алдымда әділетті адам сеніммен өмір сүреді, егер ол жолдан тайып, адасып кетсе, онда Менің жан дүнием оған риза болмайды», - дейді Иеміз.

³⁹ Біз артқа шегініп, жолдан тайып, құрып кететіндердің қатарынан емеспіз, керісінше, біз жанымыз үшін сенімімізді сақтап қалуға тиіспіз.