Еврейлерге 1 - Zhana Osiet

¹ Өткен дәуірлерде Құдай ата-бабаларымызға пайғамбарлар арқылы әрбір кезде алуан түрлі жолдармен сөйлеген болатын.

² Өйткені осы әлемді Ол арқылы жаратқандықтан және Оны бар ғаламның мәңгілік мұрагері етіп тағайындағандықтан, соңғы уақытта Құдай бізге Өзінің Ұлы арқылы сөйледі.

³ Сондықтан Ол Құдайдың даңқы мен Құдайдың дәлмедәл болмысын бейнелеп, бәрін Өзінің құдіретті сөзінің күшімен ұстап тұр. Ол барлығын күнәларынан тазартып, одан кейін ұлылыққа бөленіп, Құдайдың Оң жағына барып отырды.

⁴ Періштелер Одан қаншама жоғары болса да, Ол олардан да жоғары ерекше Мұрагер деген есімге ие болды.

⁵ Алайда Құдай періштелердің қайсысына: «Сен-менің Ұлымсың, Мен бүгін Сені дүниеге әкелдім», -деп айтқан еді? Немесе оларға: «Мен Оның Әкесі боламын, ал ол Менің Ұлым болады», - деп айтты ма?

⁶ Құдай Өзінің Тұңғышын осы әлемге жіберер кезде: «Құдайдың барлық періштелері басын иіп, Оның алдында тағзым етсін», - деген болатын.

⁷ Ал періштелер туралы былай делінген: «Ол Өзінің періштелерін майда ескен желдей, Өзінің қызметшілерін жалындаған оттай етіп жаратты».

⁸ Бірақ Ұлы туралы былай дейді: «О, Құдай, Сенің тағың мәңгі жасай берсін, әділдік Сенің Патшалығыңның асатаяғы болмақ.

⁹ Себебі Сен әділдікті сүйіп, заңсыздықты жеккөрдің. Сол үшін де Құдай Сені Өзіңмен бірге жүргендерден де ағыл-тегіл мол етіп, шаттықтың майымен майлады.

¹⁰ О, Жаратушы Ием, Сен, ең алдымен, жерді жараттың, көк те Сенің қолдарың арқылы жаратылды.

¹¹ Алайда олардың бәрі құрып, жоқ болады, Сен мәңгі қаласың, олар киілген киім секілді тозады,

¹² Сен оларды ескі киімдей бүктеп, оларды жаңа жамылғыдай жаңартасың. Сен өзгермей, сол қалпыңда қаласың, Сенің жылдарың да жойылып кетпейді (шексіз)».

¹³ Ол періштелердің біреуіне: «Мен Сенің жауларыңды табаныңның астына салып бергенше, Сен Менің оң жағымда отыр», - деп қай кезде айтып еді?

¹⁴ Періштелердің барлығы құтқарылуды мұра ретінде қабылдағандарға қызмет ету үшін жіберілген қызметші рухтар емес пе?