Елшілер 8 - Zhana Osiet

¹ Степанның өлтірілуін Сауыл да мақұлдаған еді. Сол күнен бастап Иерусалимдегі қауымда үлкен қудалау басталды. Сонда елшілерден басқаларының бәрі Яһудея мен Самария аймағындағы елді мекендерге шашырап, тарап кетті.

² Құдайды құрметтеп, қастерлейтін ер-азаматтар Степанды жерлеп, соңынан қатты қайғырып жылады.

³ Саул қауымды құрту үшін, әрбір үйге кіріп, ер адамдарды да, әйелдерді де сүйреп алып шығып, оларды абақтыға апарып жауып отырды.

⁴ Сол кездері жан-жаққа бытырап кеткен елшілер Ізгі хабарды одан әрі тарата берді.

⁵ Філіп те Самарияның бір қаласына келіп, оларға Мәсіх туралы уағыздады.

⁶ Сол жердегі халық Філіптің айтқандарына бір кісідей көңіл қойып, бар ынталарымен тыңдап, оның жасаған кереметтерін өз көздерімен көрді,

⁷ олардың көбі таза емес рухтардың жетегінде еді, солар қатты айғайлап шығып, сал болып, жүре алмағандар мен аяғы кем адамдардың бірталайы сауығып кетті.

⁸ Сол қалада осындай үлкен қуаныштар болып жатты.

⁹ Сол жерде бұрыннан бері осы қалада тұратын және сиқыршылықпен айналысатын, Самария халқын таңғалдырып, оларға өзін бір ұлы адам ретінде көрсетіп жүрген Шимон есімді бір ер адам болды.

¹⁰ Халықтың жасы да, үлкені де соған назарын аударып: -Құдайдың құдіретті ұлы күші тек осы адамда ғана бар, -деп, тек соны ғана тыңдайтын.

¹¹ Өйткені көптен бері сол адам олардың бәрін осы бір сиқырлығымен таңғалдырып жүрген болатын.

¹² Сол уақытта Філіптің Құдай Патшалығы туралы айтқан уағызына көптеген ер адамдар мен әйелдер сеніп, олар Иса Мәсіхтің атымен суға батырылып шомылу рәсімінен өтті.

¹³ Әлгі Шимонның өзі де соған сеніп, суға батырылып шомылдырудан өтіп, Філіптен бір елі қалмай еріп жүрді. Ол Філіптің жасаған кереметтерді көріп жүрді әрі соған таңғалатын.

¹⁴ Сол кезде Иерусалимдегі елшілер Құдайдың сөзін самариялықтардың да қабылдағанын естіп, оларға Петір мен Жоханды жіберді.

¹⁵ Олар сонда келіп, енді олардың да Киелі Рухты қабылдауы үшін мінәжат етті.

¹⁶ Өйткені олардың ешқайсысына да әлі Киелі Рух қонбаған еді. Олар тек Исаның атымен суға батырылып шомылдырудан өткен болатын.

¹⁷ Елшілер оларға қолдарын қойды, сол кезде олар Киелі Рухты қабылдады.

¹⁸ Киелі Рухтың елшілердің қолдарын қою арқылы берілетінін көрген Шимон оларға ақша алып келіп:

¹⁹ -Осы билікті маған да беріңдерші, мен кімге қолымды қойсам, сол Киелі Рухты қабылдайтын болсын, - деді.

²⁰ Сонда Петр оған: -Сенің күмісің өзіңмен бірге құрып кетсін, өйткені сен Құдайдың сыйын ақшаға сатып аламын деп ойладың!

²¹ Сондықтан бұл қызметтен сенің алатын үлесің де, орның да жоқ, өйткені сенің жүрегің Құдайдың алдында әділетсіз.

²² Сондықтан осы зұлым ой-ниетіңді өзгерту үшін, сен тәубеге келіп, Жаратушы Иемізге мінәжат ет, тек сонда ғана сенің осындай ойларың кешіріледі.

²³ Өйткені сенің қызғаныштың ащы уымен уланып, әділетсіздіктің шырмауында жүргеніңді көріп тұрмын -деді.

²⁴ Сонда Шимон: -Сендердің осы айтқандарыңның ешқайсысы да менің басыма түспесін деп, сендер Иеме мен үшін мінәжат етіңдерші, - деді.

²⁵ Осыдан кейін елшілер өздерінің куәліктерімен бөлісіп, Құдайдың сөзін жариялап, бұдан кейін Иерусалимге қайтар жолда көптеген Самариялық ауылдарға да Ізгі хабарды жариялады.

²⁶ Жаратқан Иенің бір періштесі Філіпке: -Орныңнан тұр, түскі уақыт болған кезде, Иерусалимнен Газа жаққа баратын жолға бар, -деді. Бұл жер жатқан бір шөл дала болатын.

²⁷ Філіп орнынан тұрып, сол жаққа қарай жүрді. Міне, сол жолмен эфиопиялық бір адам, яғни, эфиопиялықтардың ханшайымы Қандақидың барлық байлықтарының үстінен қарайтын уәзірі келе жатты. Ол Иерусалимге келіп, тағзым еткен соң,

²⁸ енді кері қайтып бара жатқан еді. Ол күймесінде отырып, Ишая пайғамбардың кітабын оқып отырды.

²⁹ Сонда Рух Філіпке: - Күймеге қарай жақында, - деді.

³⁰ Філіп жақындап келгенде, оның Ишая пайғамбардың жазбасын күбірлеп оқып отырғанын естиді де, оған: -Не туралы оқып отырғаныңды түсіндің бе? - деді.

³¹ -Егер біреу түсіндіріп бермесе, не жайында екенін қалай түсінейін? -деді. Ол Філіпке күймеге шығып, өзінің қасына отыруын өтінді.

³² Оның Жазбадан оқып отырған жері мынау болатын: «Оны құрбандыққа шалатын қой сияқты алып келді, Ол қырқылудың алдында тұрған қозы сияқты дыбысын да шығармады, Ол Өзінің аузын да ашқан жоқ.

³³ Оны кемсітіп, қорлады, соттың әділдігі де Одан аластатылды. Кім Оның тегін айтып бере алады? Оның жер бетіндегі өмірі алынып тасталмақ», - делінген.

³⁴ Осыдан кейін ол Філіптен: -Маған түсіндірші, осы жерде пайғамбар кім туралы айтып тұр? Өзі туралы ма әлде басқа біреу туралы ма? - деп сұрады.

³⁵ Сонда Філіп Жазбаның осы жерінен бастап, оған Иса жайында айтылған Ізгі хабарды айтып берді.

³⁶ Осылай олар жүріп келе жатып, суы бар жерге жақындайды. Сонда әлгі эфиопиялық: -Міне, су, -дейді ол, -менің суға батырылып шомылдырудан өтуіме не кедергі бола алады? - деді.

³⁷ *Сонда Філіп оған: -Егер де сен шын жүрегіңмен Оған сеніп тұрсаң, онда болады, -деді. -Иса Мәсіх Құдайдың Ұлы екеніне сенемін, - деп ол жауап берді.

³⁸ Сосын ол бұйрық беріп, күймені тоқтатты. Філіп әлгі эфиопиялық уәзірді суға батырып шомылдырудан өткізді.

³⁹ Олар судан шыққан сәтте Иеміздің рухы Філіпті сол жерден алып кетті. Ал эфиопиялық солай болғанын, тіпті, байқаған да жоқ, себебі қуанышқа бөленген ол өз жолымен кете барды.

⁴⁰ Філіп Азот қаласына келді. Содан ол Кесарияға жеткенше Ізгі хабар айтып, өзі жүріп өткен қалалардың бәріне жариялады.