Елшілер 3 - Zhana Osiet

¹ Сағат тоғыздың кезінде Петір мен Жохан мінәжат ету үшін, ғибадатханаға қарай көтеріліп келе жатты.

² Сол ғибадатхананың «Әдемі» деп аталатын қақпасының алдына ана құрсағынан аяғы кем болып туылған бір ер адамды ғибадатханаға келетіндерден қайыр сұрау үшін, әкеліп отырғызып қоятын.

³ Ғибадатханаға кіріп келе жатқан Петр мен Жоханды көрген сол адам олардан қайыр сұрайды.

⁴ Сонда Петір мен Жохан одан көз алмай қадала қарап: -Бізге қарашы! - деді.

⁵ Ол бір нәрсе берер деп дәметкендіктен, оларға назарын аударды.

⁶ Сонда оған Петр: -Менде күміс те, алтын да жоқ, бірақ не бар, соны саған беремін, -деді де: -Назареттік Исаның атымен орныңнан тұрып, жүріп кет! - деді.

⁷ Сөйтті де оны оң қолынан ұстап, көтерді, сол сәтте мүгедектің табаны мен буындарына күш пайда болды!

⁸ Ол орнынан атып тұрып, жүріп кетті! Олармен бірге ғибадатханаға кіріп, секіріп жүріп, Құдайды мадақтады.

⁹ Сол жердегі бүкіл халық оның жүріп жүргенін, Құдайды мадақтағанын көреді.

¹⁰ Оның ғибадатхананың «Әдемі» деп аталатын қақпасының алдында қайыр тілеп отыратын адам екенін таниды, оларды қорқыныш билеп, болған оқиғаға бола естері шығып, аң-таң күйге түседі.

¹¹ Әлгі адам Петір мен Жоханға жабысып, олардан бір елі қалмай қояды. Осы болған оқиғаға халықтың бәрі таң-тамаша болып, сол жердегі Сүлейменнің бағаналы сарайының жанына жинала бастады.

¹² Мұны көріп тұрған Петір халыққа былай деп үн қатты: -Исраилдің ер азаматтары, бұған неге соншама таңырқап тұрсыңдар? Біз оны өз күшімізбен не болмаса ізгі қасиетіміздің арқасында жасаған жоқпыз. Бізге неге соншама тесірейіп қарап қалдыңдар?

¹³ Ыбырайымның, Ысқақтың, Жақыптың Құдайы және біздің ата-бабаларымыздың Құдайы, Өзінің Ұлы Исаны даңққа бөледі, ал сендер Оны басқаларға ұстап бердіңдер. Пилат Оны босатып жібермек болғанда, сендер Одан бас тарттыңдар.

¹⁴ Сендер әрі киелі, әрі әділетті Исадан бас тартып, Оның орнына өздерің кісі өлтірушіні қалап, сұрап алдыңдар.

¹⁵ Өмірдің бастауы болған Исаны өлтірдіңдер! Алайда Құдай Оны өлімнен қайта тірілтіп алды, мына біз соған куәміз!

¹⁶ Сендер өздерің күнде көріп -біліп жүрген мына адамды сол Исаның атына сенген сенімі нығайтты, сөйтіп, ол Исаға деген сенімі арқылы толығымен сауықты, қайтадан қалпына келіп, сендердің орталарыңа оралды.

¹⁷ Бауырластар, сендер де, сендердің басшыларың да соны білместікпен істегендеріңді мен түсінемін.

¹⁸ Ал Құдай Өзінің пайғамбарларының аузымен Мәсіхтің азап шегетіні жайында алдын ала айтып кеткен еді, міне, бұл осылай орындалды.

¹⁹ Сонымен, күнәларың кешірілсін десеңдер, тәубеге келіп, теріс жолдарыңнан кері қайтыңдар,

²⁰ өйткені Иеміздің жүзінен рухани жаңартатын жаңа уақыттың келе жатқаны байқалады, сондықтан Ол сендерге алдын ала тағайындап қойған Мәсіх Исаны жіберді.

²¹ Құдай өткен ғасырларда Өзіне бағышталған пайғамбарларының аузымен: «Бәрін қайта қалпына келтіретін уақыт келгенше, Ол, яғни, Мәсіхкөкте болады», -деп айтқан еді.

²² Кезінде Мұса былай деп айтып кеткен: «Сендердің Құдай Иелерің мен сияқты бір Пайғамбарды өз бауырластарыңның арасынан қайтадан қоятын болады. Оның сендерге айтқандарының бәрін тыңдауға тиіссіңдер.

²³ Сол Пайғамбарды тыңдағысы келмейтін әрбір жан халықтың арасынан аластатылып, құртылуы тиіс».

²⁴ Бір кездері Самуилден бастап, басқа пайғамбарлар да бірінен соң бірі алдын ала болжап, осы күндер туралы айтып кеткен.

²⁵ Сол пайғамбарлардың ұрпақтары -сендерсіңдер. Құдай сендердің ата-бабаларың Ыбырайыммен келісім шартқа отырған кезде оған: «Сенің ұрпағың арқылы жер бетіндегі барлық халықтарға әкелік батаң тарайтын болады», -деген болатын.

²⁶ Құдай Өз Ұлын өлімнен тірілтіп алғаннан кейін, сендерге батасын (жарылқауын) беріп, әрқайсысыңды зұлым әрекеттеріңнен бас тартып, жиренту үшін, ең алдымен, Оны сендерге жіберді.