Елшілер 28 - Zhana Osiet

¹ Біз жағаға шығып, құтқарылғаннан кейін, аралдың Мелит деп аталатынын білдік.

² Сол жердің тұрғылықты халқы адамдарды жақсы көретін мінез (қонақжайлық) танытты. Жаңбыр жауып, қатты суық болған соң, олар от жағып, бізді қастарына шақырып, қамқорлық көрсетті.

³ Пауыл кепкен шырпыларды теріп әкеліп, оларды отқа тастап жатқан сәтте, оттың қызуына шыдай алмаған бір улы жылан оның қолын тістеп, жабысып қалды.

⁴ Сол жердің тұрғындары оның қолына жабысып, салбырап тұрған жыланды көріп, бір-біріне: -Бұл адамкісі өлтіруші, себебі ол теңізден құтылғанымен, әділдік орнап, оның өмірі осы жерде тоқтады, (кек алушы құдай оның тірі қалуына мүмкіндік бермеді), - десті.

⁵ Сол кезде Пауыл жыланды сілкіп тастады, бірақ оған ешқандай да зиян келген жоқ.

⁶ Бірақ сол жердің тұрғындары сол сәтте ол ісініп немесе құлап, аяқ астынан өледі деп күтті, алайда олардың күткен нәрселері орындалмай, онымен ешқандай жамандық болмағанын көрген соң, ойларын өзгертіп, ол қандай да бір құдайдан, - десті.

⁷ Сол маңайда аралдың бірінші басшысы Публи деген кісінің жеке меншік жері бар екен, ол бізді сонда алып барды, бізді үш күн бойы қонақ етіп, ас-суын берді.

⁸ Публидің әкесі де сол жерде екен, оның ыстығы көтеріліп, іші өтіп, ауырып жатты. Сонда Пауыл оның жатқан жеріне кіріп, қолын қойды, мінәжат етіп, оны сауықтырды.

⁹ Осы оқиғадан кейін, сол аралда тұрып жатқандарың қайсысында әлсіздік (ауру) бар болса, олар келіп сауығып жатты.

¹⁰ Сонымен, біз сол жерден кететін уақытқа дейін, олар бізді құрметтеп, көп қамқорлық жасады, қажетті мұқтаждықтарымызды беріп, қамтамасыз етті.

¹¹ Сол аралда біз үш ай бойы қыстап шықтық, одан кейін Диоскураның бейнесі таңбаланған Александрияның кемесіне отырып, сол жерді артқа қалдырып, жолға шықтық.

¹² Одан кейін біз Сиракузаға келдік, сол жерде үш күн болдық.

¹³ Ол жерде біз зәкірді көтердік те, Ригийға келдік. Бір күннен кейін оңтүстіктен жел соға бастады, екінші күні біз Путеолға келдік.

¹⁴ Сол жерден өзіміздің бауырластарымызды тауып алдық, олардың өтініші бойынша, біз жеті күн солармен бірге өткіздік те, жолға шығып, Римге кеттік.

¹⁵ Сол жердегі бауырластар біз туралы хабар алған соң, Римнің жолындағы Аппия базары жанындағы Үш қонақ үйге қарсы алу үшін келіп, бізді күтіп алды. Пауыл оларды көргенде жігер алып, Құдайға ризашылығын білдірді.

¹⁶ Біз Римге кірген кезден бастап, Пауылдың жеке тұруына рұқсат берілді, оның қасына тек оны күзететін жауынгерді ғана қалдырды.

¹⁷ Осыдан үш күн өткенде, Пауыл яһудейлердің бірінші басшыларын өзіне шақыртып алып, оларға: -Ер-заматтар, бауырластар, мен халқыма немесе ата-бабаларымыздың салт-дәстүріне қарсылық білдіріп, оған қарсы ешқандай жағымсыз іс-әрекет жасаған емеспін, алайда Иерусалимде мені тұтқындап, римдіктердің қол астына тапсырды.

¹⁸ Олар менің ісімді зерттеп, тексеріп, мені өлім жазасына кесетіндей ешбір себептің жоқ екенін анықтап, мені босатып жібермекші болды.

¹⁹ Алайда яһудейлер маған қарсы болған соң, оларға менің ісімді Рим патшасының алдына қараңдар деуден басқа амалым қалмады, мен өз халқыма ешқандай айып тақпаймын.

²⁰ Менің сендерді көріп, өздеріңмен сөйлесуіме осы нәрсе себеп болды. Мен Исраилдің үмітіне бола, мына шынжырға шырмалып байландым, - деді.

²¹ Сонда олар оған: -Біз яһудейлерден сен туралы ешқандай хат алған жоқпыз және сол жақтан келген бауырластар да сен туралы қандай да бір хабар, не жаман нәрсе айтып, жеткізбеді.

²² Біз сенің қандай оймен жүргеніңді тек өз аузыңнан естігеніміз жөн болар еді, өйткені осы жолды таңдап, осы жолды насихаттап жүргендердің тәліміне қарсы пікірлер барлық жерде айтылып жатқанын біз білеміз, -деді олар.

²³ Сөйтіп, олар Пауылмен келісіп, кездесетін күнді бекітті, белгілен күні одан да көп адам жиналып, оған қонаққа келді. Сонда ол таңертеңнен кешке дейін, оларға Құдайдың Патшалығы туралы айтып, Мұсаның Заңынан бастап, Пайғамбарлардың кезіне дейінгі аралықта Иса туралы куәлік етіп, түсіндіріп берді.

²⁴ Дегенмен, келгендердің кейбіреулері Пауылдың айтқандарына сенсе, кейбіреулері сенбеді.

²⁵ Сондықтан олардың арасында бір-бірімен келіспеушілік пайда болды, кетерінде оларға Пауыл мына бір сөзді айтты: -Сендердің ата-бабаларыңа Ишая пайғамбар арқылы Киелі Рух:

²⁶ «Сол халыққа барып, мынаны айт: сендер естисіңдер, алайда түсінбейсіңдер, қарайсыңдар, алайда көрмейсіңдер.

²⁷ Бұл халықтың жүрегі қатайып кеткен, міне, сондықтан олардың құлақтары әрең естиді, көздерін жұмулы, егер де олар айтқанымды құлақтарымен тыңдап, жүректерімен түсініп, теріс жолдарынан қайтса, мен оларды сауықтырар едім», - деп айтқан.

²⁸ Сондықтан сендер мынаны біліңдер: Құдайдан келген бұл құтқарылу енді өзге ұлт өкілдеріне жіберіледі, олар осы хабарды еститін болады! - деді.

²⁹ Пауыл осылай деген соң, яһудейлердің көбі бір-бірімен айтысып, соңында тарқап кетті.

³⁰ Осыдан кейін Пауыл Римде өзі жалға алған үйде екі жыл тұрып, сол жерде өзіне келгендердің бәрін қабылдады.

³¹ Оларға Құдай Патшалығы туралы уағыздап, үнемі бар ынтасымен Иеміз Иса Мәсіх жайында батыл, ашық тәлім берумен болды.