Елшілер 24 - Zhana Osiet

¹ Бес күн өткеннен кейін, қасына бірнеше ақсақалдар мен сөзге шешен Тертул атты біреуді ертіп, Анания келді. Пауылға қарсы шағым айтып, аймақ басшысына барған осылар болатын.

² Пауылды шақыртып алған соң, Тертул өзінің айыптауын былай бастады: -Ұлы мәртебелі, Феликс! Мына халық сенің көрегенділігіңнің арқасында тыныштыққа молынан кенеліп, көптеген игілік пен жетістікке жетті.

³ Біз сол үшін барлығына ризашылығымызды білдіріп, осыны қабылдаймыз әрі мойындаймыз.

⁴ Сонымен, мен уақытыңды алмас үшін, сенің мейірімділігіңе сүйене отырып, біздің қысқа өтінішімізді тыңдауыңды қалаймын.

⁵ Біз мына бір адамды бүкіл әлемге жалған ілімін таратып жүрген назарейліктердің басшысы санаймыз. Себебі ол осындағы яһудейлердің арасына кіріп алып, іріткі салып, оларды бүлікке шақырып жүр.

⁶ Сонымен қатар, ол ғибадатхананы арамдауға әрекет жасады, сол кезде біз оны ұстап алдық.

⁷ Сол кезде мыңбасы Лүси келіп, бізге күш көрсетті, оны бізден тартып алып, осында саған жіберіп отыр.

⁸ Енді сен оны тергеген кезде, біздің оған қандай айып тағып отырғанымызды түсінетін боласың.

⁹ Онымен бірге еріп келген яһудейлердің барлығы бұл айтылғанды шындық деп қолдады.

¹⁰ Бір кезде аймақ басшысы Пауылға сөйлеуге белгі берді. Сонда Пауыл былай деді: -Осы халыққа сен көптен бері билік жүргізіп, төрелік жасап жүргеніңді мен білемін, сондықтан сенің алдыңда мен өзімді-өзім қорғауға қуаныштымын.

¹¹ Менің Иерусалимге Құдайға табыну үшін келгеніме он екі күннен асып бара жатқанына көз жеткізу саған қиын емес.

¹² Менің айыптаушыларым өздері айтып тұрғандай, менің біреумен ғибадатханада дауласқанымды немесе бүлік шыққан жерде, синагогада, немесе қалада халықты жамандық жасауға шақырғанымды көрген жоқ.

¹³ Сондықтан олар дәл қазір маған тағып тұрған айыптарының ешқайсысын да дәлелдей алмайды.

¹⁴ Олардың жалған тәлімнің жолымен жүр деп айтқанына келетін болсақ, мен Заңда жазылғанның бәріне, Пайғамбарлар кітабында жазылғанға да сенемін және соған сенім артып, ата-бабаларымыздың Құдайына қызмет етіп келемін.

¹⁵ Өйткені Құдайдың әділдерді де, әділетсіздерді де өлімнен қайта тірілтіп алатын кезі болады, соған үміт артамын, ал соның болатынын олардың өздері де мойындайды.

¹⁶ Сондықтан мен Құдайдың алдында болсын, адамдардың алдында болсын, барлық уақытта да ар-ұжданымды таза ұстауға жаттығып, тырысып жүрмін.

¹⁷ Көп жылдардан кейін мен халқыма қайырымдылық жасап, арнайы тарту әкелмек болып, Иерусалимге келдім.

¹⁸ Тазару рәсімін жасауға ғибадатханаға келген кезде, олар менімен кездесіп қалды. Сол жерде ешқандай бүлік, шу шығаратын топ та болған емес.

¹⁹ Азия өңірінен келген кейбір яһудейлердің маған тағатын айыбы болса, олар оны осында, сенің алдыңда, айтқандары дұрыс болады.

²⁰ Мен синедерионның алдында тұрған кезде, олар менен қандай әлділетсіздік тапты, соны айтып берсін.

²¹ Мен сол жерде тұрып: «Бүгін мені өлгендер қайта тіріледі деп айтқаным үшін соттап жатқан шығар?» -дегеннен басқа ештеңе айтқан жоқпын.

²² Сонымен, Феликс болған жағдай туралы толық ақпарат алып, бәрін біліп алғаннан кейін: - Оларға бұдан әрі не істеу керек екенін мыңбасы Лүси келгеннен кейін айтамын, алдымен одан сол туралы сұрап білейін, -деп, істі кейінге қалдырды.

²³ Осыдан кейін жүзбасына оны күзетуді және оның еркін жүріп-тұруына мүмкіндік беріп, оған келіп қызмет етем дегендердің ешқайсысына кедергі жасамауға бұйырды.

²⁴ Бірнеше күн өткен соң, Феликс өзімен бірге Друзила есімді әйелін ертіп келді, оның әйелі яһудей болатын. Олар Пауылдың Иса Мәсіхке деген сенімі туралы есту үшін адам жіберіп, оны алдыртты.

²⁵ Әңгіме әділдік пен ұстамдылық және болашақта болатын сот туралы болды, соны естіген кезде Феликсті қорқыныш биледі, сонда ол: -Енді бара бер! Уақыт келгенде, сені тағы да шақыртамын, - деді.

²⁶ Ол Пауыл ақша беретін шығар деп үмітпен оны жиіжиі алдыртып, оның әңгімесін тыңдайтын.

²⁷ Осыдан екі жыл өткенде, Феликстің орнына Порси Фест келіп отырды. Феликс яһудейлерге жағымсып, оларға жақсы көріну үшін, Пауылды сол байланған күйі абақтыда қалдырды.