Елшілер 23 - Zhana Osiet

¹ Пауыл синедерион мүшелерін көзімен мұқият сүзіп шыққан соң, сонда отырғандарға: -Бауырлас ер-азаматтар, мен осы күнге дейін Құдайдың алдында ар-ұжданымды таза ұстап өмір сүріп келдім, - деді.

² Бірінші бас қызметкер Анания оның қасында тұрғандарға Пауылдың аузынан ұрып жіберуге бұйырды.

³ Сол кезде Пауыл оған: -Әктелген қабырға, мына сені Құдай ұратын болады, дайын бол! Сен мені Заң бойынша соттауға тырысып жатырсың, мені ұруға бұйрық беріп, бірақ Заңның талаптарын өзің бұзып тұрсың! - деді.

⁴ Оның қасында тұрғандар Пауылға: -Сен Құдайдың бірінші бас қызметкеріне неге тіл тигізесің? - деді.

⁵ Сонда Пауыл: -Бауырластар, мен оның бірінші бас қызметкер екенін білген жоқпын, Заңда: «Өз халқыңды басқарып отырған адамға жаман сөз айтпа», -деп жазылған.

⁶ Сонда Пауыл синедерионның жиынында отырғандардың бір бөлігі-садукейлер, ал екінші жартысы фарисейлер екенін біліп, синедерионда отырғандарға дауыстап: -Ер-азаматтар, бауырластар, мен-фарисеймін әрі фарисейлердің ұлымын, мені өлгендердің қайта тірілетініне үміт артқаным үшін соттап жатыр, - деді.

⁷ Бұл сөзден кейін фарисейлер мен саддукейлер бір-бірімен дауласып қалып, сонда отырған көпшілік екіге бөлінді.

⁸ Өйткені саддукейлер қайта тірілу деген жоқ, періште де, рух та болмайды дейтін еді. Ал фарисейлер олардың бәрі бар деп сеніп, мойындайтын.

⁹ Осылай үлкен айқай-шу басталып кетті, кейбір Кітап зерттеушілері фарисейлерді жақтап: -Біз бұл адамнан ешқандай бір жаманшылық көріп тұрған жоқпыз, егер де оған рух немесе періште сөйлесе, онда тұрған не бар? -деді олар.

¹⁰ Қақтығыс бара -бара күшейіп бара жатқан соң, Пауылды ұрып тастар деп қауіптенген мыңбасы жауынгерлерге оны сол ортадан алып шығып, бекініске апаруға бұйрық берді.

¹¹ Келесі түні Жаратқан Ие Пауылға келіп: -Батыл бол! Иерусалимде Мен туралы қалай куәлік берсең, Римде де дәл солай куәлік беретін боласың, - деді.

¹² Таң атып, күн шыққан кезде кейбір яһудейлер жиналып, Пауылды өлтірмейінше, ештеңе жемеуге, ішпеуге ант берді.

¹³ Бұл қастандық ойды іске асырмақ болған адамдардың саны қырықтан асты.

¹⁴ Олар бірінші бас қызметкерлер мен ақсақалдарға келіп: -Біз Пауылды өлтіріп тынбайынша, ешқандай тамақ ішпейміз деп, өзара серт байласып, бір -бірімізге ант бердік.

¹⁵ Енді сіздер синедериондағылармен бірігіп, мыңбасына оның ісі туралы әлі де анықтап білу қажет, сондықтан оны осында алып келуді мыңбасыдан сұраңыздар, оны осында алып келе жатқанда, біз дайын тұрамыз да, оны осында жеткізбей өлтіреміз, - деді.

¹⁶ Пауылға қарсы қастандық ұйымдастырылып жатқаны туралы Пауылдың қарындасының ұлы естіп қойды. Ол Пауыл жатқан бекініске барып, бұл туралы оған жеткізді.

¹⁷ Сонда Пауыл бір жүзбасын шақыртып алып: -Мына жасөспірімді мыңбасына ертіп бар, оның айтатын бір хабары бер екен, - деді.

¹⁸ Жүзбасы жасөспірімді мыңбасына алып келді де: -Қамауда отырған Пауыл мені шақырып алып, мына жас жігітті саған ертіп баруды өтінді, оның айтатын бір хабары бар екен, - деді.

¹⁹ Мыңбасы оның қолынан ұстап, оңаша жерге апарып, одан: - Маған не айтайын деп едің? - деп сұрады.

²⁰ -Ертең Пауылдың ісін әлі де тереңірек, анықтап қарамақшы болып, оны синедерионға алып келуге алдын ала келісіп алған яһудейлер саған өтініш жасайтын болады.

²¹ Алайда сен олардың бұл істеріне сенбе, өйткені солардың арасынан қырыққа жуық ер адам оған тосқауыл құрмақшы. Олар өзара келісіп, Пауылды өлтірмек, сол уақытқа дейін тамақтан бас тартамыз деп, бір-біріне ант берді. Олар соны орындауға дайын, тек сенің келісіміңді күтіп отыр, - деді ол.

²² Сонда мыңбасы әлгі жасөспірімге: -Маған осы жеткізгеніңді ешкімге айтушы болма, -деп ескертіп, оны жөніне жіберді.

²³ Содан кейін ол жүзбасыларының арасынан екеуін таңдап шақырып алып: -Екі жүз жауынгер мен жетпіс атты әскерді және екі жүз найзашыларды түнгі сағат үшке Кесарияға баруға дайындаңдар.

²⁴ Пауылға ат дайындап, оның билеушінің өкілі Феликске аман-есен жеткізілуін қадағалауды бұйырды. Аймақ басшысы Феликске

²⁵ мынандай мазмұнда жолдау хат жазды:

²⁶ «Құрметті аймақ басшысы Феликске Клавдий Лисийден сәлем!

²⁷ Яһудейлер мына ер адамды өлтіруге дайындалып жүргенде, жауынгерлеріммен барып, оның римдік азамат екенін білген соң, қорғап алдым.

²⁸ Олардың бұл адамды не себепті айыптап жатқанын білу үшін, оны солардың синедериондарына алып бардым.

²⁹ Олардың таққан айыбы тек өздерінің Заңдарына байланысты екенін, оны өлтіруге немесе абақтыға жабуға ешбір себеп жоқ екенін анықтадым.

³⁰ Енді бұл адамға қарсы қастандық ұйымдастырылып жатқаны туралы хабар маған жетті, сондықтан оны сол сәтте саған жібердім, оның айыптаушыларына, ендігі айтатындарын сенің алдыңа шығып айтуға бұйрық бердім».

³¹ Сонымен, жауынгерлер өздеріне тапсырылған тапсырма бойынша Пауылды алып шығып, бір түннен кейін оны Антипатрға жеткізді.

³² Келесі күні Пауылды алып жүруге тек атты әскерлерге ғана рұқсат берілді, сондықтан қалғандары кері қайтып, бекініске оралды.

³³ Олар Кесарияға кіргеннен кейін, олар аймақ басшысына жолданған хатты беріп, Пауылды тапсырды.

³⁴ Ол хатты оқып шыққаннан кейін, Пауылдан оның қай аймақтан екенін сұрады. Оның Киликия аймағынан екенін білген соң Пауылға:

³⁵ -Сенің айыптаушыларың келсін, олар келген соң, сені тыңдамаймын, -деді де, оны Иродтың сарайына апарып, сонда күзетуге бұйырды.