Елшілер 21 - Zhana Osiet

¹ Біз олармен қоштасып, кемемен Қосқа келдік. Келесі күні Родосқа, одан кейін Патарға жеттік.

² Ол жерден Финикияға баратын кемені тауып алып, одан әрі бағыт алдық.

³ Кипр көзге көрінетіндей жерге келгенде, одан өтіп, Кипрды сол жағымызда қалдырып, Сирияға бет алдық. Тирға келіп түстік, өйткені кемедегі жүктерді осында түсірмек болды.

⁴ Біз сол жерден шәкірттерді тауып алып, жеті күнге олармен қалатын болдық. Олар Рухтан аян алып, Пауылдың Иерусалимге бармауын өтінді.

⁵ Алайда біздің сол жердегі уақытымыз біткен соң, олар бізді шығарып салмақ болды. Олардың әйелдерімен, балашағасымен бірге қаланың сыртына шықтық, жағада тізе бүгіп, мінәжат еттік.

⁶ Бір -бірімізбен қоштасып, кемеге көтерілдік, олар үйлеріне қайтты.

⁷ Біз кемемен жүретін сапарымызды жалғастырып, Тирдан шығып, Потелемайсқа келдік. Сондағы бауырластармен хал-жағдай сұрасып, бір күнге олардың қасында қалатын болдық.

⁸ Ертеңінде біз сол жерден шығып, Кесарияға келдік, сол жердегі жеті Ізгі хабар таратушының бірі болып жүрген Філіптің үйіне келіп, қасында болдық.

⁹ Оның төрт қызы бар болатын, төртеуі де пайғамбарлық сөз айтатын.

¹⁰ Біз біраз күнге сонда қалатын болдық, сол күндері Яһудеядан Ағаб деген бір пайғамбар келді.

¹¹ Ол біздің қасымызға келді де, Пауылдың белбеуін қолына алып, өзінің аяқ-қолын байлап: -Иерусалимдегі яһудейлер осы белбеудің иесінің аяқ-қолын тура осылай байлап, оны өзге ұлттың өкілдеріне тапсыратынын маған Киелі Рух айтты, - деді.

¹² Осы сөзді естігеннен кейін, біз де, сол жердегілердің бәрі де жалынып, Пауылдың Иерусалимге бармауын қатты өтіндік.

¹³ Сондағы Пауыл бізге: -Сендер неге жылап, менің жүрегімді ауыртасыңдар? Мені байламақ тұрмақ, Ием Исаның аты үшін Иерусалимде өлуге де дайынмын, -деп жауап берді.

¹⁴ Сонымен, біз оны көндіре алмаған соң: -Иеміздің еркі болсын, - деп тынышталдық.

¹⁵ Содан кейін біз жолға дайындалып, Иерусалимге қарай өрлеп кеттік.

¹⁶ Бізбен бірге Кесариядан шәкірттер ілесіп шыққан болатын. Олар бізді бұрыннан бері шәкірт болған бір кипрлық Мнасонның үйіне ертіп келді, сонда қондық.

¹⁷ Иерусалимге келгенде, бізді бауырластар қуанышпен қарсы алды.

¹⁸ Келесі күні Пауыл бізбен бірге шығып, Жақыпқа кетті, себебі ақсақалдардың бәрі сонда жиналған болатын.

¹⁹ Пауыл олармен амандасып, өзінің қызметі арқылы Құдайдың басқа ұлттар арасында жасаған әрбір ісін басынан тізіп айтып берді.

²⁰ Олар бәрін тыңдап болған соң, Құдайды мадақтады, сосын Пауылға: -Бауырым, яһудейлер арасындағы сенушілердің өзі он мыңға жуық, солардың бәрі де Заңды қызғыштай қорғайды.

²¹ Олардың бәрі сен туралы өзге ұлттың арасында жүрген яһудейлердің бәрін Мұсаның Заңынан бас тартып, балаларын сүндетке отырғызбауға, біздің салт-дәстүрімізбен жүрмеуге үйретіп, теріс жолға тәрбиелеп жүр деп жеткізген.

²² Енді не болмақ? Олар, әрине, сенің осында келгеніңді естиді.

²³ Сол үшін сен біздің өзіңе айтқанымызды істе. Біздің арамызда өз еріктерімен ант берген төрт азамат бар.

²⁴ Соларды өзіңмен бірге ертіп алып, олармен бірге сен де тазарудан өт, олардың шашын алуға жұмсалатын қаражатты сен төле, сонда олар сен туралы естіген нәрселердің бәрінің бекер екенін түсінеді және сенің Заңды қалай ұстанып жүргеніңді көреді.

²⁵ Ал өзге ұлт өкілдерінің арасындағы сенушілерге келетін болсақ, осында бәріміз ақылдасып, оларға пұтқа табынушылықтан, оған құрбандық беруден, арам өлген малдың қаны мен неке адалдығын бұзудан сақ болуын айтып, хат жазып жібердік, - деді.

²⁶ Сонымен, Пауыл өзімен бірге әлгі ер-азаматтарды ертіп алып, олармен бірге тазару рәсімін жасады. Келесі күні олармен бірге ғибадатханаға барып, сол жерде тазару күндерінің қашан аяқталатынын және әркімнің жеке басы үшін ұсынатын құрбандық туралы жариялады.

²⁷ Жеті күндік мерзім аяқталуға жақындағанда, Азиядан келген яһудейлер Пауылдың ғибадатханада жүргенін көріп қойып, сол жердегі бүкіл халықты дүрліктіріп, Пауылды сол жерде бас салып ұстап алып, бар дауыспен:

²⁸ -Исраилдік ер-азаматтар! Бізге көмектесіңдер! Мынаухалыққа да, Заңға да қарсы шығып жүрген адам, ол басқа жақта жүрген адамдарды да солай үйретіп жүр және ол ғибадатханаға өзге ұлттық гректерді кіргізіп, киелі орынды арамдады, - деді.

²⁹ Өйткені Олар ефестік Трофимның сол ғибадатханада жүргенін көрген болатын, олар оны ертіп әкелген Пауыл деп ойлады.

³⁰ Бүкіл қала дүрлігіп, халық ағылып келіп, жинала бастады. Пауылды ұстап алғандар оны ғибадатхананың сыртына сүйреп шығарып, тездетіп есіктерді жауып алды.

³¹ Олар Пауылды сол арада өлтірмек болып жатқанда, Рим әскерінің мыңбасына бүкіл Иерусалим көтеріліп жатыр деген хабар жетті.

³² Сонда ол жауынгерлері мен жүзбасын ертіп, сол сәтте жетеді. Яһудейлер мыңбасы мен оның жауынгерлерінің жетіп келгенін көргенде, Пауылды ұрып-соғуды тоқтата қойды.

³³ Мыңбасы Пауылдың қасына барып, оны тұтқынға алған соң, оны екі шынжыр бұғаумен байлауды бұйырды. Сосын халықтан оның кім екенін, оның не істеп қойғанын сұрады.

³⁴ Сол жерге жиналған халықтың біреуі былай десе, басқалары тағы бір нәрсені айтып жатты, у-шудан толық не болғанын түсіне алмаған мыңбасы Пауылды бекініске апаруға бұйырды.

³⁵ Ол баспалдақтан көтеріле бастағанда, анталаған халық оны жан-жақтан қыспақтады, сол кезде жауынгерлерге Пауылды көтеріп алып жүруге тура келді.

³⁶ Олардың артынан ілесіп келе жатқан халық: -Оны алып кетіңдер! - деп айқайлап тұрып алды.

³⁷ Пауылды бекініске кіргізбек болып жатқанда, ол мыңбасына: -Мен саған бір нәрсе айтсам бола ма? -деді. Ол Пауылдан: -Сен грекше білетін бе едің? -деп сұрады.

³⁸ -Сен осыдан бірнеше күн бұрын өзімен бірге төрт мыңдай ер адамды елсіз далаға ертіп шығып, көтеріліс ұйымдастырмақ болған мысырлық емессің бе? - деді.

³⁹ Сонда Пауыл: -Мен-яһудеймін, Киликия өлкесіндегі Тарс қаласының азаматымын. Сенен сұрайтын өтінішім бар, халыққа арнап сөз айтайын деп едім, соған рұқсат берші, - деді.

⁴⁰ Пауыл рұқсат алғаннан кейін, баспалдаққа шығып, қолымен белгі берді, көпшілікті тыныштыққа шақырды. Тыныштық орнаған соң, еврей тілінде сөз бастады.