Елшілер 20 - Zhana Osiet

¹ Бұл айқай-шу басылғаннан кейін, Пауыл шәкірттерді шақырып алып, оларға жігер берді, олармен қоштасып, Македонияға жүріп кетті.

² Сол аймақтарға барған соң, көптеген бауырластарды сөзбен жігерлендірді. Кейін ол Грекияға (Элладаға) келіп,

³ үш айдай сонда болды. Енді сол жерден Сирияға бармақ болып жинала бастағанда, яһудейлердің оған арам ниетпен арандатушылық әрекет ұйымдастырып жатқанын біліп, ойын өзгертіп, Македония арқылы қайтпақ болып шешті.

⁴ Сол кезде оның қасында болып, онымен бірге жүргендер: Береялық Пирдің ұлы Сопатер мен салоникалық Аристрақ пен Секунд, дербиялық Гай мен Тімоте және Азия аймағынан Түхік пен Трофим болатын.

⁵ Олар бізден бұрын алға кетіп қалып, Троададан күтіп алды.

⁶ Біз Ашымаған нан мейрамын өткізгеннен кейін, Філіп қаласынан кемемен жүзіп шығып, бес күннен соң, Троадаға келіп, оларға қосылдық. Сол жерде жеті күн болдық.

⁷ Сенбі күні болатын, біз жиналып, нан үзу рәсімін өткізбек болдық. Пауыл келесі күні жол жүретін болғандықтан, оның айтар сөзі түннің бір уағына дейін созылып кетті.

⁸ Біз жиналған бөлме жоғарыда болатын және сол жерде жарық беретін шамдар жеткілікті еді.

⁹ Еутіх есімді бір жас жігіт терезенің алдында отырған болатын. Пауылдың әңгімесі ұзаққа созылып кеткендіктен, ол отырған жерінде қалғып кетіп, үшінші қабаттан төмен қарай құлап түсті. Оны жерден көтеріп алғанда, оның өліп қалғаны белгілі болды.

¹⁰ Сол кезде Пауыл төмен түсті де, оның үстіне жата қалып, құшақтап: -Уайымдамаңдар, -деді, -ол өлген жоқ! - деді.

¹¹ Одан кейін ол жоғары көтеріліп, нан үзу рәсімін өткізді, таң атқанда әңгімесін аяқтап, сол жерден жолға шығып кетті.

¹² Әлгі өлімнен тірілген жігітті үйіне алып барды, бұл бәріне шексіз қуаныш әкелді.

¹³ Біз кемеге отырып, Асс аймағына қарай жүзіп кеттік, себебі сол жақтан Пауылды алып кетпек болдық. Оның өзі бізге солай нұсқау берді, өйткені ол құрлық арқылы барғысы келетінін білдірді.

¹⁴ Сонымен, ол бізді Аста қарсы алды, біз оны кемеге отырғызып алып, Мітілинге келдік.

¹⁵ Ол жерден кемемен жүзіп шыққан соң, келесі күні Хиосқа жеттік. Бір күннен соң, Самосқа өтіп кеттік те, тағы бір күннен кейін, біз Мілітке жеттік.

¹⁶ Пауыл уақытын Азияда бекерге жоғалтып алмайын деген ойда болды, сондықтан Эфеске соқпай өтіп кеттік, өйткені ол Иерусалимде өтетін Елуінші күн мейрамына қатты асықты.

¹⁷ Сондықтан ол Міліттен Эфеске хабаршы жіберіп, ондағы қауымның ақсақалдарын сол жерге шақыртты.

¹⁸ Олардың бәрі жиналып, Пауылдың алдына келді, сонда ол: -Мен осы Азияға қадам басқан уақыттың алғашқы күнінен бастап өздеріңмен бірге болғанымды білесіңдер.

¹⁹ Иемнің құлы ретінде барлық жағынан кішіпейілдік көрсетіп, көз жасымды төге жүріп, яһудейлердің мені сынау үшін жасаған арам пиғылды іс-әрекеттеріне төзе отырып, маған жүктелген қызметті атқара бердім.

²⁰ Сендерге пайдасы тисін деген оймен тура жолдан таймай, халықтың алдында болсын, үйлеріңде болсын, сендерге қажет дегеннің бәрін өздеріңе тәптіштеп жеткіздім.

²¹ Бұған қоса, яһудейлер мен гректерге де куәлік айтып, олардың тәубе етіп, Құдайға келуін және біздің Иеміз Исаға сенуін жарияладым.

²² Қазір мен Рухтың жетегіне көніп, Иерусалимге бара жатырмын, ол жерде мені не күтіп тұрғанын білмеймін.

²³ Алайда Киелі Рухтың жеткізген куәлігіне көңіл бөлсем, ол қалада мені абақты мен азаптар күтіп тұрғанын білдіреді.

²⁴ Бірақ мен өз өмірімді бағалы деп санамаймын, Ием Исадан қабылдап алған қызметімді аяғына дейін жеткізуге тырысып, барымды салып жүгірдім, осылай Құдайдың рақымының арқасында Ізгі хабарды уағыздап, жариялап, куәлікпен бөлістім.

²⁵ Өздеріңмен бірге болған кезімде Құдай патшалығы туралы жариялағанымды сендер білесіңдер. Енді менің білетінім: бұдан былай сендер мені көрмейсіңдер.

²⁶ Міне, сол себепті де мен осы уақытты пайдаланып, сендерге мына куәлікті айтпақпын: бәріңнің алдыңда менің арым таза, егер біреу құрып кеткен болса, мен оған жауапты емеспін,

²⁷ өйткені мен тура жолдан таймай, Құдайдың еркін өздеріңе жария етіп, Ол туралы толық жеткіздім.

²⁸ Енді өздеріңе сақ болыңдар, Құдайдың бүкіл отарын қорғап, оған ие болыңдар, себебі Құдай оны Өзінің қанымен сатып алды, ал Киелі Рух сендерді сол Құдайдың қауымының қамын ойлап, оны бағатын бағушы етіп тағайындады.

²⁹ Мен кеткен соң, сендерді де, Құдайдың отарын да аямайтын жауыз қасқырлар орталарыңа келіп кіретінін мен білемін.

³⁰ Әуелі, орталарыңнан өздерімен бірге шәкірттерді бөліп алып кету үшін, шындықты бұрмалап сөйлейтін ер адамдар шығады.

³¹ Сондықтан өте қырағы әрі сақ болыңдар! Мен үш жыл бойы еш тоқтаусыз, түн демей, күн демей, көз жасымды төгіп, әрқайсысыңды жетелеп, өздеріңе үйреткен тәлімді естеріңнен шығармаңдар.

³² Қазір осы сәттен бастап, Өзінің құдіретімен қалыптастырып тұрғызатын әрі Оған бағышталғандардың бәріне мұралық енші беретін және Өзінің сөзі бойынша әрекет ететін рақымды Құдайға мен сендерді тапсырамын.

³³ Мен ешқашан күміс пен алтынға немесе киім-кешекке ие болуға ұмтылған емеспін.

³⁴ Мен өз мұқтаждықтарымды өзім көтеріп, өз қолыммен еңбек еткенімді білесіңдер.

³⁵ Мен сендерге қалай еңбек етіп, сол арқылы әлсіздерге қалай қолдау көрсету керек екенін үйреттім. Иеміз Исаның сөзін еске алатын болсақ, Ол: «Алғаннан гөрі берген бақытты», - деп айтқан болатын.

³⁶ Пауыл осыны айтып болған соң, тізесін бүгіп, олардың бәрімен қатар тұрып, мінәжат етті.

³⁷ Пауылмен қоштасарда бәрі жылап, оны құшақтап, бетінен сүйді.

³⁸ Олардың жүректерін ауыртқаны Пауылдың енді мені қайтып көрмейсіңдер деген сөзі болатын, олар бұған қатты қайғырды. Содан кейін олар оны кемеге шығарып салды.