Елшілер 2 - Zhana Osiet

¹ Елуінші күн аталған мейрам мезгілі келгенде, елшілердің бәрі жиналып, бірге болды.

² Кенет көктен күшті дауылды желдің гуілі естіліп, олар жиналған үйдің ішін толтырып жіберді.

³ Бұдан кейін одан от сияқты көзге көрінетін тілдер бөлініп шықты да, сонда отырғандардың әрқайсысының үстіне бір-бірден барып қонды.

⁴ Сөйтіп, олардың бәрі Киелі Рухқа толды және Рухтың берген қабілетіне сай, олар әр түрлі тілде сөйлей бастады.

⁵ Осы кезде бұл жерге Иерусалимде тұратын яһудейлермен қатар, әлемнің түкпір-түкпірінен келген Құдайдан қорқатын әр елдің ер азаматтары да сонда жиналған болатын.

⁶ Алайда сол дыбыстың шуылы сонда жиналғандардың көпшілігін абыржытты, өйткені олардың әрқайсысы сол жерде айтылған сөздерді өз тілдерінде естіген еді.

⁷ Олар бұған қатты таңданып: -Мына сөйлеп тұрғандардың бәрі де ғалилеялықтар емес пе?

⁸ Біздің әрқайсымыз өзіміздің туған тілімізді қалайша олардан естіп тұрмыз?!

⁹ Мұнда парсылар, мидияндықтар, еламдықтар, месопатамиялықтар, яһудейлер, каподокиялықтар және Понт пен Асия,

¹⁰ Фрагия, Памфилия, Мысыр және Ливия өңірі мен Киринея өлкесінен және Римде тұратын

¹¹ яһудейлер мен Таурат заңын қабылдаған өзге ұлттың өкілдері, криттіктер мен арабтар да бар. Міне, солардың бәрінің Құдайдың Ұлылығы жайлы жариялап жатқан хабарын өз тілдерімізде естіп тұрмыз! - десті.

¹² Олар бұған таңданып, ештеңе түсіне алмай, бір-бірінен: -Бұл нені білдіреді? - деп сұраса,

¹³ басқалар оларды келемеждеп: -Тәтті жас шарапқа тойып алған ғой, - деп жатты.

¹⁴ Сонда он бір елшінің арасынан Петір орнынан тұрып, оларға даусын көтеріп, былай деді: -Яһудеяның еразаматары мен Иерусалимнің барлық тұрғындары! Сіздерге түсінікті болу үшін, менің сөздерімді мұқият тыңдап алыңыздар.

¹⁵ Бұлар сіздер ойлағандай мас емес, өйткені қазіргі уақытқа қарасақ, сағат таңғы тоғыз.

¹⁶ Алайда Жоел пайғамбар арқылы мынадай сөз айтылған болатын:

¹⁷ «Соңғы күндері, -дейді Жаратқан Ие, -Мен Өз рухымнан алып, Оны әрбір пендеге төгемін, сонда сендердің ұлдарың мен қыздарың пайғамбарлық сөз айтады, жас жеткіншектерің аян, қарттарың түс көретін болады.

¹⁸ Міне, сол күндері Мен Өзімнің құлдарым мен күңдерімнің үстіне Өз Рухымды оларға төгетін боламын, сонда олар пайғамбарлық сөз айтады.

¹⁹ Көктен, яғни, жоғарыдан ғажаптар көрсетемін, жерде, яғни, төменде қан мен отты әрі түтінді түтетемін.

²⁰ Сонымен, ұлы даңққа бөленіп, Иеміздің келетін күні анық болғанда, күн алдын ала қара түнекке айналып, ай қанға боялатын болады.

²¹ Міне, сол кезде Иеміздің есімін кім атап шақыратын болса, сол ғана құтқарылатын болады».

²² Исраилдің ер-азаматтары, назареттік Иса туралы айтатын сөзімді тыңдап алыңдар: сендердің орталарыңда болған Ол Өзінің кереметтері мен ғажайыптарын Құдайдың күшімен сендер үшін жасағанын және сол арқылы Оның Құдайдан келгенін көрсеткенін білесіңдер.

²³ Алайда Құдайдың еркімен тағайындалған Сол Адамды сендер өздерің арнайы кеңеске салып, Оны заңға бағынбайтын өзге ұлт адамдарының қолымен шегелетіп өлтірдіңдер.

²⁴ Бірақ Құдай Оны азапты өлімнің құрсауынан босатып, Оны қайта тірілтіп алды, өйткені Оны ұстап тұруға өлімнің күші жоқ.

²⁵ Ол туралы Дәуіт былай деген: «Мен Иемнің әрдайым көз алдымда жүргенін көретінмін. Ол әрқашан менің оң жағымда жүретіндіктен, мен әлсіремеймін (шайқалмаймын).

²⁶ Міне, сондықтан менің жүрегім қуанады, тілім де шаттық сөзге толы, әуелі, менің тәнім де үмітпен өмір сүреді.

²⁷ Менің жанымды тозақта қалдырмайсың және Өзіңе бағышталғандардың құрып кетуіне жол бермейсің.

²⁸ Өзіңді танып-білу үшін, Сен өмір жолын маған бердің, Өзіңнің бет-жүзіңді көргенде, мені қуанышқа бөлейсің».

²⁹ Ер-азаматтар мен бауырластар, арғы бабамыз Дәуіттің өліп, жерленгені жөнінде мен сендерге нақты айта аламын. Оның қабірі бүгінгі күнге дейін сақталған.

³⁰ Ол пайғамбар болғандықтан, өзі отырған таққа оның ұрпағынан біреуді Құдайдың көтеретінін алдын ала білді.

³¹ Дәуіт Мәсіхтің тірілетінін де алдын ала көрді, сондықтан: «Ол тозақта қалған жоқ, Оның денесі құрып кеткен жоқ», - деп айтып кеткен болатын.

³² Құдай Исаны қайта тірілтіп алды, осы жерде тұрған бәріміз бұған куә болдық!

³³ Ол көкке көтеріліп, Құдайдың оң жағына барып жайғасты. Сөйтіп, Әкенің Оған уәде еткен Киелі Рухын қабылдаған соң, Оны осында төкті, енді сендер Соны көріп, Оның даусын естідіңдер.

³⁴ Дәуіт көкке көтерілген жоқ, бірақ ол: «Ием менің Иеме: «Мен Сенің жауларыңды Сенің табаныңның астына салып бергенше,

³⁵ Сен Менің оң жағымда отыр», - деп айтқан.

³⁶ -Сондықтан бүкіл Исраил үйінің әулеті, мынаны нақты біліп алыңдар: Сендер айқышқа шегелеген Сол Исаны Ие әрі Мәсіх етіп Құдай тағайындады!

³⁷ Бұл сөз тыңдап тұрғандардың жүректеріне шаншудай қадалды, сонда олар Петр мен басқа елшілерге: -Бауырластар, ер-азаматтар, енді біз не істесек болады? -деп сұрады.

³⁸ -Ой-саналарыңды өзгертіп, тәубе етіңдер, -деді Петр, -күнәларыңның кешірілуі үшін Исаның атымен әрқайсыларың суға батырылып шомылдырудан өтіңдер, осылай Киелі Рухтың сыйын алыңдар.

³⁹ Құдай Иелерің бұл уәдені сендерге, балаларыңа және сонау алыстан шақырылғандардың бәріне берген болатын, -деді.

⁴⁰ Сөйтіп, ол бұдан да басқа бірнеше куәліктер келтіріп: -Осы бір қыңыр, азғын ұрпақтан сақтанып, аулақ жүріңдер, -деп кеңес берді.

⁴¹ Оның осы сөзін қабылдағандар суға батырылып шомылдырудан өтті. Сол күні оларға үш мыңға жуық адам қосылды.

⁴² Осыдан кейін олар елшілердің тәлімін ұстанып, нан үзу рәсімінде және мінәжат еткенде бірге болды.

⁴³ Елшілер арқылы көптеген ғажайыптар мен кереметтер жасалып жатқандықтан, адамдардың барлығын қорқыныш биледі.

⁴⁴ Сенушілердің бәрі бірге жиналып, қажет заттарын да ортақ ұстады.

⁴⁵ Мұқтаждық көрген кейбіреулерге басқалары жеке заттары мен мүліктерін сатып, оларға қолдау көрсетті.

⁴⁶ Олар күнде ғибадатханада бір кісідей бас қосып, бірге болды, үйде өтетін нан үзу рәсімін қуанышпен, қарапайым жүрекпен қабылдайтын.

⁴⁷ Осылайша олар Құдайды мадақтады, бүкіл халық рақымдылыққа ие болды. Иеміз күн сайын оларға құтқарылған адамдарды қосып, біріктіріп отырды.