Елшілер 19 - Zhana Osiet

¹ Апаллос Қорынт қаласында болған кезде, Пауыл таулы аймақтағы елді мекендер арқылы Эфеске келді. Сол жерден шәкірттердің бірнешеуін кездестірді.

² - Сендер сенімге келген кезде, Киелі Рухты қабылдадыңдар ма? -деп сұрады олардан. - Біз Киелі Рухтың бар екенін, әуелі, естіген де жоқпыз, - деп оған жауап берді.

³ - Қандай шомылдырудан өттіңдер? -деп сұрады Пауыл олардан. - Жақияның суға батырып шомылдыруынан өттік, - деп жауап берді олар.

⁴ - Жақия халықты суға батырып шомылдырған кезде, ол өзінен кейін келген Исаға сенуді, сондықтан ой-өрісті өзгертіп, тәубеге келуді айтқан болатын, - деді Пауыл.

⁵ Олар осыны естігеннен кейін Иеміз Исаның атымен суға батырылып шомылдырудан өтті.

⁶ Пауыл оларға қолын қойған кезде, Киелі Рух келіп қонды, сол кезде олар бөтен тілдерде сөйлеп, пайғамбарлық сөз айта бастады.

⁷ Сол жерде, шамамен, он екі ер адам болды.

⁸ Осыдан кейін ол синагогада уағыздады. Ол сол жерде үш ай бойы Құдай Патшалығы туралы батылдықпен айтып, оларды сенімге баулыды.

⁹ Дегенмен, олардың арасынан кейбіреулері сенімді қабылдамай, жүректері қатайып, қасарысты, олар көптің алдына шығып, осы жолды жамандай бастады. Сонда Пауыл оларды өз жайларына қалдырып, шәкірттерді олардан бөліп алды да, олармен Тиранның мектебінде күнде кездесіп, әңгімелесіп жүрді.

¹⁰ Осылайша бұл іс-әрекет екі жылға созылды, сонда бүкіл Азия аймағында тұратындардың бәрі, яһудейлер мен гректер Жаратушы Иеміздің сөзін естіді.

¹¹ Құдай Пауыл арқылы Өзінің күшін көрсетіп, оның қолымен бұрын-соңды болмаған кереметтер жасады.

¹² Ауырып жатқандар Пауылдың денесіне байланған орамалына немесе оның белбеуіне қолдарын тигізетін болса, ауруларынан жазылып, зұлым рухтар шығып жатты.

¹³ Тіпті, кейбір яһудейлік кезбе сиқыршылардың өзі Иеміздің атымен зұлым рухтың жетегіндегілерге қолдарын қойып, Пауыл жариялап жүрген Иеміз Исаның атымен бұйырып, қуып шығаратын болды.

¹⁴ Скеуа деген яһудейлік бас қызметкер болды, соның жеті ұлы да осылай істемекші болды.

¹⁵ Сонда зұлым рух оларға: -Исаны білемін, Пауылмен де таныспын, ал сендер кімсіңдер? - деді.

¹⁶ Сол зұлым рухтың жетегіндегі адам оларға қарсы шығып, күш көрсетіп, тап беріп, жеңіп кетеді, ал олар жараланып, тыр жалаңаш күйі сол үйден қашып шығады.

¹⁷ Бұл оқиға туралы Эфесте тұрып жатқан барлық яһудейлер мен гректер білгенде, оларды қорқыныш биледі, Иеміз Исаның есіміне аса құрметпен қарап, дәріптейтін болды.

¹⁸ Сеніммен жүргендердің көпшілігі өз еріктерімен келіп, жасаған іс-әрекеттерін ашық айтып, қателіктерін мойындады.

¹⁹ Сонымен қатар, сиқыршылықпен көптен бері айналысып жүргендер жинаған кітаптарын бір жерге жинап, бәрінің көзінше оларды өртеп жіберді. Сол өртелген кітаптардың бағасын күміс ақшамен есептегенде, елу мың күміс ақша болады екен.

²⁰ Иеміздің сөзі осылай өсіп, күшейіп, кеңінен тарала берді.

²¹ Өзіне жүктелген міндет аяқталуға жақындағанда, Пауыл рухында Македония мен Ахая аймағын аралап, одан кейін Иерусалимге барып, сосын Римді көргісі келетінін айтты.

²² Содан кейін өзімен бірге қызмет етіп жүрген Тимоте мен Ерасты Македонияға жіберді де, өзі Азияға баратын ыңғайлы уақытты күтіп, сонда қалды.

²³ Міне, осы уақыттың арасында Иеміздің сапарына байланысты пайда болған дүрбелең аз болған жоқ.

²⁴ Деметір деген бір күміс шебері күмістен Артемида ғибадатханасының үлгісін жасап, сол арқылы жергілікті қолөнер шеберлерінің мол табыс табуларына мүмкіндік жасайтын.

²⁵ Деметір сондай іспен айналысып жүрген жұмысшыларды қасына жинап алып, оларға: -Ер-азаматтар, біздің әлауқатымыздың жағдайы осы табыс көзімен байланысты екенін өздерің білесіңдер.

²⁶ Бірақ мына Пауыл деген адам тек Эфесте емес, бүкіл Азия өңірінде халықтың көбін шатастырып, адамның қолы арқылы жасалынған мүсіндер сендердің құдайларың емес деп жүргенін өздерің естіп те, көріп те жүрген шығарсыңдар.

²⁷ Біз енді соған бола өз үлесімізден айрылып, жеккөрінішті болып қаламыз ба деген қауіп төніп тұр. Ұлы құдайымыз Артемида ғибадатханасы да түкке тұрғысыз болып, бүкіл Азия аймағы қастерлейтін оның ұлылығы осылай аяққа тапталып жатыр, - деді.

²⁸ Бұл сөзді естігендердің барлығын ашу кернеп: -Эфестіктердің ұлы Артемидасы жасасын! -деп айғайлаумен болды.

²⁹ Осылай бүкіл қалада дүрбелең басталды, жиналғандардың бәрі театрға лап қойып, Пауылға жолсерік болып жүрген Гай мен македондық Арыстарқты ұстап алды.

³⁰ Пауыл топырлаған халықтың арасына кірмек болғанда, оны шәкірттері жібермей, ұстап қалды.

³¹ Сонда онымен дос болып жүрген Азияның кейбір басшылары оның театрға жиналғандарға көрінбеуіне кеңес берді.

³² Өйткені сонда жиналғандардың біреуі бір нәрсе айтып жатса, басқалары айғайлап, мүлдем басқа нәрсені айтып, жиналған халықты одан сайын дүрліктіріп жіберді, тіпті, сонда келгендердің көбі не үшін жиналғандарын білмей шатасты.

³³ Сол кезде кейбір яһудейлер ұсыныс жасап, халықтың ортасына Ескендірді шығарды. Ескендір қолымен белгі беріп, халықтың алдында оларды қорғап сөйлей бастады.

³⁴ Алайда олар оның яһудей екенін біліп қойып, бәрі бір дауыспен: -Эфестіктердің ұлы Артемидасы жасасын! -деп айғайлап тұрып алды. Осы жағдай екі сағатқа созылды.

³⁵ Тек бәрі тынышталып, тыныштық орнағаннан кейін, қала басшыларының біреуі ортаға шығып халыққа: -Эфестің ер-азаматтары, осы Эфес қаласы ұлы Артемида мен көктен түскен Зевстің мүсіндеріне ғибадатхана болып, соларға қызмет етіп жатқанын білмейтін адам бар ма?

³⁶ Егер де осыған ешқандай таласымыз жоқ десеңіздер, онда сіздер тыныштық сақтап, ағаттық әрекетке бармаңыздар.

³⁷ Өйткені бұл адамдарды сіздер ғибадатхананы тонаушылар немесе біздің құдайымызға тіл тигізді деп, оларды айыптап әкелген жоқсыздар.

³⁸ Егер Деметір мен басқа шеберлердің біреуге қарсы айтатын сөзі болса, оны сотта қарап, оның шешімін шығаратын аймақ басшылары бар, олар сонда барып, бірбіріне қоятын кінәсін сонда барып айтсын.

³⁹ Егер де қоятын талаптарыңыз бұдан басқа нәрсе туралы болса, онда оны жиынға салу қажет, сонда ол заң арқылы шешіледі.

⁴⁰ Өйткені бүгін бүлік тудырғанымыз үшін, бізге кінәлі болып, жауапқа тартылатын қауіп төніп тұр. Бұл жиының өтуіне ешқандай себеп жоқ, сондықтан біз бұған ешбір баға бере алмаймыз, -деді. Осылай деп, жиынды таратып жіберді.