Елшілер 18 - Zhana Osiet

¹ Осыдан кейін ол Афинадан шығып, Қорынт қаласына келді. Сол жерден

² Понтидің тумасы, жақында ғана Италиядан келген Ақила деген яһудей мен Прискила есімді әйелді тауып алды. Клавдийдің барлық яһудейлер Рим қаласынан шықсын деген бұйрығынан кейін, олар өз мекендерін тастап, осында келген болатын, Пауыл соларға барды.

³ Олардың жасап жүрген кәсіптері бірдей болатын, сондықтан Пауыл олардың қасында жұмыс істеуге қалды, олардың кәсіптері шатыр жасау еді.

⁴ Сонымен қатар, ол әр сенбі сайын синагогаға барып, яһудейлер мен гректерді сөзге тартып, сөйлесіп, оларды сендіруге тырысатын.

⁵ Македониядан Сыйлас пен Тімоте келгеннен кейін, Пауыл уақытын Құдай сөзін айтуға арнап, яһудейлерге Исаның Мәсіх екеніне дәлелді куәліктер келтірді.

⁶ Олар Пауылға қарсы шығып, тіл тигізе бастағанда, ол киімін оларға қарай сілкіп: -Өз қандарың мойындарыңа артылатын болады! Менің арым таза. Енді мен қазірден бастап, өзге ұлт өкілдеріне барамын, - деді.

⁷ Ол сол жерден шығып, үйі синагогаға тиіп тұрған Тит Иуст деген адамның үйіне барды. Ол да Құдайды қастерлейтін еді.

⁸ Синагога басшысы Крисіптің үй іші де түгелімен Жаратушы Иеге сенді. Пауылды тыңдаған қорынттықтардың көбі Иеміз жайында естіп, Оған сеніп, суға батырылып шомылдырудан өтті.

⁹ Түн ортасында Жаратушы Ие Пауылға көрініс арқылы (аян беріп) былай деді: - Қорықпа! Тоқтамай айта бер!

¹⁰ Мен Сенімен біргемін, ешкім де саған қиянат жасай алмайды, себебі бұл қаладағылардың көбі-Менің халқым, -деді.

¹¹ Сонымен, Пауыл сол жерде қалып, оларды бір жыл алты ай бойы Құдайдың сөзіне үйретті.

¹² Ахая аймағын Галлион басқарып тұрған кезде, яһудейлердің барлығы Пауылға қарсы шығып, оны соттың алдына апарды да,

¹³ былай деді: -Бұл адам Заңды ұстанбай-ақ Құдайды қастерлеуге болады деп, Заңға қарсы шығып, адамдардың арасына іріткі салып жүр, - деді.

¹⁴ Пауыл енді аузын ашып, енді сөйлемек болғанда, Галлион яһудейлерге былай деді: -Ей, яһудейлер, егер де ол бір әділетсіздік істесе немесе бір алаяқтық, немесе бір зұлым іс-әрекет жасаған болса, онда мен сендердің айтқандарыңды тыңдар едім.

¹⁵ Бірақ сендердің мына дау-дамайларың тек өздеріңнің Заңдарыңа байланысты болғандықтан, мен бұған төреші бола алмаймын, оны өз араларыңда шешіңдер.

¹⁶ Осылай деп, оларды үкім шығарып, сот жүргізетін орыннан қуып шықты.

¹⁷ Сонда олар синагога басшысы Состенді ұстап алып, бәрі оны сот үкім шығаратын орынның алдында жабылып ұрып тастады, Галлион бұған ешқандай мән бермеді.

¹⁸ Пауыл біраз күн сонда қалды, сосын бауырластармен қоштасып, кемемен Сирияға жүзіп кетті. Прискила мен Ақила да онымен бірге кетті. Пауыл Кеніхреяға келгенде, Құдайға берген уәдесі бойынша, шашын алдыртып тастады.

¹⁹ Эфеске келгенде, ол Прискила мен Акиланы сол жерде қалдырып, өзі синагогаға барып, сол арадағы яһудейлермен сөйлесті.

²⁰ Олар Пауылдың өздерімен бірге біраз болуын қалап, өтініш білдірді, бірақ ол келіспеді.

²¹ -Құдай қаласа, сендерге тағы да келемін, -деді олармен қоштасып, сосын Эфестен кемемен шығып,

²² Кесариядан бірақ түсті, Иерусалимге келіп, қауымдағылармен амандасып, одан Антақияға кетті.

²³ Сол жерде біраз уақыт үзіліс жасап, одан шығып Ғалатия мен Фүргия елді мекендерін бірінен кейін бірін аралап, сонда қалған шәкірттердің бәрін нығайтты.

²⁴ Осы кезде Александрия қаласының тумасы әрі сөзге шешен, Жазбаны өте жақсы білетін Аполлос деген яһудей Эфеске келді.

²⁵ Ол Иеміздің жолы туралы аз білетін, бірақ сөйлеген кезде Рухтың жетегімен жалындап сөйлейтін. Оның білетіні тек Жақияның суға батырып шомылдыруы туралы болатын, соның өзінде ол Иса туралы тәлім бергенде нақты айтатын.

²⁶ Міне, Аполлос синагогадағы адамдарға батыл уағыздай бастады, Прискила мен Ақила оны тыңдағаннан кейін, өздеріне шақырып алып, Құдайдың жолы туралы тереңірек үйретіп, нақтылап түсіндіріп берді.

²⁷ Бір кездері Апаллос Ахая аймағына да бармақшы болды, сонда оны бауырластар да қолдап, сол жақтағы шәкірттерге хат жазып, олардан Аполлосты қабылдауларын сұрады. Апаллос барған соң, сол жердегі Құдайдың рақымымен сенімге келген сенушілерге көп көмек көрсетті.

²⁸ Ол халықтың алдында яһудейлерді әшкерелеп, қайтпас қайсарлықпен Жазба арқылы Исаның Мәсіх екенін оларға дәлелдеп берді.