Елшілер 17 - Zhana Osiet

¹ Олар Амфипол мен Аполлония арқылы өтіп, Салониқа қаласына келді, ол жерде яһудейлердің синагогасы бар болатын.

² Пауыл, әдеттегідей, үш сенбі қатарынан сол жерге барып, олармен Жазбаны талқылады,

³ онда Мәсіхтің азапталып, Оның өлімнен қайта тірілетіні туралы нақты айтылғанын түсіндірді. -Исаның (уәде етілген) Мәсіх екенін дәлелдеп, сол Мәсіхті уағыздап жүрмін, - деді Пауыл.

⁴ Сонда олардың арасынан кейбіреулері осы айтылғанға сенді. Сөйтіп, олар Пауыл мен Сыйластың қатарына қосылды, олардың арасында Құдайды қастерлеуші гректер мен біраз беделді әйелдер де болды.

⁵ Бұған қызғаныш білдірген яһудейлер сауда алаңдарына барып, сол жерден кейбір жексұрын (бұзық) адамдарды жинап алып, қалада тәртіпсіздік орнатты. Содан кейін Пауыл мен Сыйласты іздеп, баса-көктеп Ясонның үйіне барды, оларды ұстап алып, халықтың алдына алып шықпақ болды.

⁶ Бірақ оларды сол жерден таппаған соң, Ясон мен басқа бауырластарды сүйреп, шу шығарып, қала басшысының алдына алып келді. -Бүкіл әлемді аралап, көтеріліске шақырып жүргендер енді осында келіпті, -деп айғайлады олар,

⁷ -мына Ясон оларды үйіне қабылдапты. Олар Рим императорының шығарған жарлығына қарсы әрекет жасап, Иса деген басқа Патша бар деп айтып жүр, - деді.

⁸ Олардың бұл айтқандары халықтың да, қала басшыларының да тыныштығын бұзды.

⁹ Олар Ясоннан және басқаларынан жеткілікті мәлімет жинап алып, оларды босатып жіберді.

¹⁰ Бауырластар Пауыл мен Сыйласты сол түні-ақ Береяға қарай шығарып жіберді. Олар сол жерге келген соң, яһудейлердің синагогасына барды.

¹¹ Алайда бұл жердің адамдары салоникалықтарға қарағанда ізгі ниетті болып шықты. Олар бар ынталарымен сөзді беріліп тыңдап, қабылдап, естігендері шындықпен сәйкес келе ме деп, Жазбаны күнде зерттеумен уақыттарын өткізді.

¹² Олардың көпшілігі сенімді осылай қабылдады, олардың арасында гректердің беделді әйелдері мен біраз ер-азаматтар да болды.

¹³ Салониқадағы яһудейлер Пауылдың Береяда Құдай сөзін жариялап жүргенін біліп қойып, сонда келіп халықты азғырып, дүрліктірд.

¹⁴ Ал бауырластар Пауылды сол сәтте теңізге шығарып жіберді, Сыйлас пен Тимоте сонда қалды.

¹⁵ Пауылды шығарып салушылар оны Афинаға дейін жеткізіп салған соң, Пауылдың Сыйлас пен Тимотенің оған тезірек жетсін деген нұсқауын алып, қайтадан кері қайтты.

¹⁶ Пауыл оларды Афинада күтетін болғандықтан, сол жерде қалатын болды. Ол қаланы аралап жүріп, қаптаған пұтқа табыну орындарын көргенде, рухы қапаланып, ашуланды.

¹⁷ Ол бұл туралы синагогадағы яһудейлермен де, Құдайды қастерлейтін адамдармен де, сауда алаңындағылармен де бөлісіп, күнде кездесіп, осы нәрсені ортаға салып, олармен бірге талқылады.

¹⁸ Сонда кейбір эпукирлықтар мен стойкшілердің философтары Пауылмен дауласып қалды. Олардың кейбіреулері: -Мына бір бос сөздің иесі не айтып жүр? -десе, ал басқалары: -Бұл басқа бір құдайлар туралы уағыздап жүрген сияқты, -десті, өйткені Пауыл оларға Исаның өліп, Оның өлімнен қайта тірілгені туралы уағыздаған болатын.

¹⁹ Олар Пауылды Ареопагқа алып барып: -Сенің осы жаңадан жариялап жүрген тәлімің жөнінде білгіміз келеді. Ол қандай тәлім? Сол туралы айтып берші,

²⁰ өйткені сен бізді таңғалдырып, құлағымызға бір нәрселерді құйып жатырсың, біздің осы жайында білгіміз келеді, - деді.

²¹ Афиндықтар мен сол жерде тұратын шетелдіктер жаңадан болып жатқан нәрселер туралы айтып, соны тыңдаумен өздерінің уақыттарын өткізетін.

²² Пауыл Ареопагтың ортасында шығып: -Афиндық еразаматтар! Сендердің әрқайсысыңда Құдайдан қорқыныш бар екеніні мен көріп тұрмын.

²³ Мен сендердің табынатын орындарыңды аралап, мұқият қарап жүріп, құрбандық шалуға арналған бір орынды тауып алдым. Ол жерде: «Белгісіз Құдайға», -деген жазу бер екен. Соған қарап, сендер Оның Кім екенін білмесеңдер де, Оны қастерлеп жүргендеріңді байқадым, ал мен Оны сендерге жариялаймын.

²⁴ Осы әлемді және ондағылардың бәрін жаратқан Құдаймына аспан мен жердің Иесі де Сол. Сондықтан Ол қолдан жасалған орындарда тұрмайды

²⁵ және Ол адамдардың бәріне өмір берді, дем және тыныс берді, Ол адам қолымен жасалатын қызметке де мұқтаж емес.

²⁶ Ол жер бетінде өмір сүріп жатқан барлық халықты бір адам арқылы жаратып, олардың уақыттарын белгілеп, тұратын жерінің шекарасын да белгілеп қойды.

²⁷ Егер адам Құдайды іздейтін болса, онда Оны сезіп, түйсініп тауып алуға болады. Ол сол мүмкіндікті бәрімізге де беріп қойған, сондықтан Ол әрқайсысымыздан алыс емес, Ол бізбен бірге.

²⁸ Өйткені «Біз тек Онымен ғана өмір сүріп, тек Ол арқылы ғана әрекет етіп, тіршілік жасай аламыз», сол сияқты өз орталарыңнан шыққан кейбір ақындар: «Біз Оның ұрпағымыз», - деп айтып кеткен.

²⁹ Сондықтан біз Оның ұрпағы болғандықтан, алтын мен күмістен, не болмаса тастан, немесе адамның кәсібі мен оның ойынан туындаған нәрселерден Оның бейнесін жасау қажет емес.

³⁰ Құдай біздің білместікпен өткізген уақытымызға көңіл аударып тұрған жоқ, керісінше, Ол қазір, осы уақыттан бастап, барлық жердегі адамдарға ойды өзгертіп, тәубеге келуге бұйырады.

³¹ Сол себепті Құдай осы әлемді әділдікпен соттайтын күнді де белгілеп қойды. Ол Өзі алдын ала дайындап қойған Сол Адам арқылы іске асырады. Ал осыны дәлелдеу үшін, Ол Исаны өлімнен қайта тірілтіп алды! - деді.

³² Олар өлгендердің қайта тірілетіні туралы естігенде, біреулері оны мазақ етіп күлсе, басқалары: -Бұл жайында кейінірек тағы естігіміз келеді, - деді.

³³ Осыдан кейін Пауыл олардың орталарынан кетіп қалды.

³⁴ Бірнеше адамдар бұл айтылған сөзге сеніп, оған қосылды, олар: Аеропаг мүшесі Дионис пен Дамар есімді әйел және олардың қасында бірге жүргендер.