Елшілер 13 - Zhana Osiet

¹ Антиохиядағы қауымда пайғамбарлар мен тәлім берушілер болды, олар: Барнаба мен Қара Шимон аталып кеткен Шимон, киринеялық Луси және төртінші аймақты басқаратын Иродпен бірге тәрбиеленген Манайн және Саул.

² Бірде олар Жаратқан Иеге қызмет етіп, ораза ұстаған кезде Киелі Рух оларға: -Маған Барнаба мен Саулды бөлек шығарып беріңдер, Мен оларға басқа іс тапсырамын, сол үшін Мен оларды шақырып алдым, - деді.

³ Олар ораза ұстап, мінәжат еткен соң, қолдарын қойды да, оларды босатты.

⁴ Киелі Рухтың Өзі жіберген олар Селеукияға келді, сол жерден кемемен Кипрге қарай кетті.

⁵ Саламинге келіп тоқтағанда, олар сол жердегі яһудейлердің синагогаларына барып, оларға Құдай сөзін жеткізді, Жохан оларға көмекші болды.

⁶ Сонымен, олар бүкіл аралды аралап, Пафқа дейін келді. Сол жерден сиқыршылықпен айналысып, жалған пайғамбар болып жүрген Бар-Ешуа атты яһудейді кездестірді.

⁷ Ол сол аймақтың басшысы әрі өз ісіне ұқыпты Серги Пауыл деген адаммен бірге болатын. Сол Серги Құдайдың сөзін естуге құштар болып, Барнаба мен Сауылды іздеп, өзіне шақыртты.

⁸ Сонда әлгі сиқыршы, оның аты Еүлүма да бірге болды, (еврейше: -күшті дегенді білдіреді) сонда ол қарсыласып, аймақ басшысын сенімінен тайдырып жіберетін жолды іздей бастайды.

⁹ Сол кезде Киелі Рухқа кенелген Саул, яғни, Пауыл, оның көзінен көзін алмай қадалып қарап тұрып:

¹⁰ -Ей, барлық қулық-сұмдықтың иесі, алаяқ, бүкіл әділдіктің жауы атанған сайтанның баласы! Сен Құдайдың тура жолынан адастыруды неге қоймайсың?

¹¹ Құдайдың қолы сенің үстіңде тұр, сондықтан сен енді соқыр болып, белгіленген уақытқа дейін күннің көзін көрмейсің, -деді. Міне, сол сәтте -ақ оны қараңғылық пен түнек басты да, шыр айнала сипаланып, қолынан жетектейтін біреулерді іздей бастады.

¹² Осы болған оқиғаны көрген аймақ басшысы Иемізге сеніп, Оның тәліміне таң қалды.

¹³ Бұдан кейін Пауыл қасындағы серіктерімен бірге Пафтан кемемен шығып, Пампүлиядағы Пергеге келді. Жохан олардан бөлініп, Иерусалимге қайтып кетті.

¹⁴ Олар Пергеден өтіп, Пісидиядағы Антақияға келді. Сенбі күні олар сол жердегі синагогаға келіп отырды.

¹⁵ Синагогадағы қызмет бойынша (Таурат) Заң кітабы мен Пайғамбарлар кітабы оқылып болғаннан кейін, синагога басшылары оларға: -Бауырластар және ер-азаматтар, егер де халыққа айтатын насихат сөздерің болса, айтуға болады, - деп сөз берді.

¹⁶ Сонда Паул орнынан тұрып, қолымен ишара білдіріп, былай деді: -Құдайдан қорқатын Исраилдің ер-азаматтары, мынаны тыңдаңыздар!

¹⁷ -Исраил халқының Құдайы біздің ата-бабаларымызды таңдап алды. Мысыр жерінде жат жерлік болып жүрген кезінде осы халықты көбейтіп өсірді. Одан кейін сол жерден оларды Өз қолымен демеп, қолдап алып шықты.

¹⁸ Қырық жыл бойы айдалада оларды тамақпен қамтамасыз етіп, жетеледі.

¹⁹ Онан кейін Ол Ханан жерінен жеті ұлтты қуып шықты, сол жерді осы халықтың еншісіне алып беріп, мөлшері төрт жүз елу жылдың ішінде мұралыққа бөліп берді.

²⁰ Самуил пайғамбардың уақытына дейін, Ол халықтың арасынан билерді көтеріп отырды.

²¹ Алайда олар сол кезде өздерін басқаратын патша сұрады, сонда Құдай оларға патша етіп Бунямин руының азаматы Қишұлы Саулды берді, ол елді қырық жыл басқарды.

²² Оны орнынан алып тастаған соң, Құдай Дәітті патша етіп қойды. Сонда Құдай ол туралы куәлік етіп: «Менің жүрегімнің қалауына лайықты болатын бір ер адамды тауып алдым, ол -Есейдің ұлы Дәуіт, енді Менің жүрегімдегі қалауымды сол іске асыратын болады», - деген еді.

²³ Енді міне Құдай Дәуіттің ұрпағынан Исраилге Құтқарушы етіп Исаны жіберді, бұл Оның берген уәдесіне сай болды.

²⁴ Иса келердің алдында Жақия бүкіл Исраил халқына суға батырылып шомылдырудан өтіп, тәубеге келуді уағыздап жүрді.

²⁵ Сол кезде өз міндетін атқарып жүрген Жақия: «Сендер мені кім деп жүрсіңдер? Мен Ол емеспін. Бірақ Ол менен кейін келсе де, мен Оның аяқ киімінің бауын байлап беруге де лайықсызбын», - деген болатын.

²⁶ Ер-азаматтар, бауырластар, Ыбырайым ұрпағының ұлдары, Құдайдан қорқатын сендер мен бізге, Құдай құтқарып алатын сөзін жіберді.

²⁷ Алайда Иерусалимнің тұрғындары мен басшылары Оны танымады, олар Оны соттады, осы іс-әрекеттерімен әр сенбіде оқылып, айтылатын пайғамбарлар сөзі осылай орындалды.

²⁸ Оны өлтіретін ешбір себеп таппаса да, Пилаттан Оны өлтіруді талап етті.

²⁹ Осылай Ол туралы жазылғанның бәрі орындалып болған соң, Оны айқыш ағаштан түсіріп, қабірге апарып қойды.

³⁰ Алайда Құдай Оны өлімнен қайта тірілтіп алды.

³¹ Осыдан кейін Ғалилеядан бастап Иерусалимге дейінгі аралықта Өзімен бірге жүргендердің бәріне Ол бірнеше күнге дейін көрінді, олар қазір халықтың алдында Оның куәгерлері болып жүр.

³² Сондықтан біз сіздерге ата-бабаларымызға берілген уәденің орындалғаны туралы қуанышты хабарды жариялап тұрмыз,

³³ Құдай мұны Исаны қайта тірілту арқылы ата-бабаларымыздың ұрпақтары бізге жеткізді, бұл екінші Забур жырында: «Сен-Менің Ұлымсың, Мен бұдан былай Сенің Әкең деп аталатын боламын», -деп айтқанына сай орындалып отыр.

³⁴ Құдай Исаны өлімнен қайта тірілтті, Оның денесі ешқашан шіріп, құрып кетпейді, сондықтан Құдай: «Мен сендерге Дәуітке уәде етілген киелі және өзгермейтін жарылқауларымды беремін», - деп айтқан болатын.

³⁵ Жазбаның тағы бір жерінде: «Сенің ізгі қасиетіңе ие Ол шіріп, құрып кетпейді, Сен мұны оған көрсетпейсің», -деп те айтылған.

³⁶ Дәуіт өз заманында Құдайдың еркіне сай қызмет етіп болған соң, ол өмірден озып, ата-бабаларына қосылды, оның денесі шіріп, жоқ болды.

³⁷ Ал Құдай өлімнен қайта тірілткен Исаның денесі шірімейді!

³⁸ -Сондықтан ер-азаматтар мен бауырластар, енді сендердің күнәларың Осы адам арқылы кешірілетінін білсеңдер екен. Мұсаның Заңын орындау арқылы Құдай алдында ешкім ақтала алмады, бірақ

³⁹ Оған сенген әркім, яғни, кім Исаға сенсе, сол ақталады.

⁴⁰ Сондықтан байқаңдар, пайғамбарлардың айтқаны орындалып жүрмесін:

⁴¹ «Басқаларды мазақтаушылар! Таңданып жүріп, құрып кетесіңдер! Өйткені Мен Өзімнің осы іс- әрекетімді сендерге сол күндері істейтін боламын. Алайда сол орындалған іс жайында сендерге біреу айтса, оған сенбейтін боласыңдар», -делінген.

⁴² Пауыл мен Барнаба сол жерден шығып бара жатқанда, осы сөздерді келесі сенбіде тағы да айтып беруін олардан өтінді.

⁴³ Синагогадағы жиын тарағаннан кейін, яһудейлердің көбі және Мұсаның заңына бағынып, Құдайды қастерлейтін өзге ұлт өкілдері Пауыл мен Барнабаның соңынан ілесті. Екеуі олармен сөйлесіп, оларды Құдайдың рақымына сенім артып өмір сүруге шақырды.

⁴⁴ Келесі сенбіде бүкіл қаланың тұрғындары Жаратушы Иенің сөзін тыңдау үшін жиналды.

⁴⁵ Сонда яһудейлер халықтың соншама көп жиналғанын көріп, қызғаныштан жарыла жаздады, Пауылдың айтқандарына қарсы шығып, тіл тигізе бастады.

⁴⁶ Сонда Пауыл мен Барнаба оларға батыл сөйлеп, былай деді: -Құдайдың сөзі, ең алдымен, сендерге айтылуы тиіс еді. Бірақ сендер оны қабылдамай, бас тарттыңдар, сөйтіп, сендер өз таңдауларың арқылы өздеріңнің мәңгілік өмірге лайықты емес екендеріңді білдірдіңдер, сондықтан енді біз назарымызды өзге ұлт өкілдеріне бұрамыз.

⁴⁷ Өйткені Құдай бізге: «Сен енді өзге ұлттарға жарық боласың, Мен сені соларға жіберемін, осылай сен Менің құтқаруымды жердің шетіне дейін жеткізесің», -деп бұйырды.

⁴⁸ Өзге ұлт өкілдері мұны естігенде қуанып, Жаратқан Иені сөзі үшін даңқтады, мәңгілік өмірге таңдалғандардың көбі сенушілердің қатарына қосылды.

⁴⁹ Иеміз Иса туралы сөз сол аймақтың барлық жеріне жан-жақты тарап жатты.

⁵⁰ Яһудейлер Құдайды қастерлеп, құрметтейтін әйелдер мен қаланың бетке ұстар азаматтарын еліктірді, Пауыл мен Барнабаға қысым көрсетіп, қуғындап, оларды орталарынан қуып шықты.

⁵¹ Сонда олар аяқтарының шаңын сол жерде қағып тастап, содан кейін Қонияға келді.

⁵² Шәкірттер қуанышқа, Киелі Рухқа тола берді.