Елшілер 11 - Zhana Osiet

¹ Яһудеяда жүрген елшілер мен бауырластар Құдайдың сөзін өзге ұлт өкілдері де қабылдап жатқанын естіді.

² Петір Иерусалимге келген кезде еврейлердің арасынан шыққан сенушілер оны жазғырып:

³ -Сен ер адамдары сүндеттелмеген үйге кіріп, олармен бірге тамақ ішіпсің, - деді.

⁴ Сонда Петір оларға болған жағдайдың бәрін басынан бастап айтып, рет-ретімен түсіндіріп берді:

⁵ -Мен Иоппеде мінәжат етіп отырған кезімде, -деді ол, -белгісіз бір күйге еніп, көктен төмен қарай төрт бұрышынан байланған бір жалпақ заттың түсіп келе жатқанын көрдім, сол маған жетпей тоқтады.

⁶ Мен содан көзімді алмай қарап тұрдым, сонда оның үстіненжерде жүретін төрт аяқты аңдар мен бауырымен жорғалаушыларды және аспан құстарын көрдім.

⁷ Сол кезде мен: «Петір, орныңнан тұр, мыналарды ал да, сойып же», - деген дауысты естідім.

⁸ Сонда мен: «Ием, олай болмайды! Мен арам әрі таза емес нәрселерді ешқашан аузыма алған емеспін», - дедім.

⁹ Сонда көктегі әлгі дауыс екінші рет: «Сен Құдай тазартқанды арам деп айтушы болма», - деді.

¹⁰ Осы нәрсе үш рет қайталанды да, одан кейін бәрін қайтадан көкке көтеріп алып кетті.

¹¹ Міне, сол сәтте біз тұрып жатқан үйге мені іздеп, Кесарияға шақыруға келген үш ер адам келіп тоқтады.

¹² Сол кезде маған Рух: «Сен төмен түс, ештеңеге күмәнданбай, солармен бірге бар», -деді. Сол жердегі бауырластардың алтауы маған еріп шыққан еді, сөйтіп, біз сол адамның үйіне келдік.

¹³ Біз сол адамның үйінде болғанда, ол періштені қалай көргенін және оның: «Иоппеге адамдарды жіберіп, Петір деп аталатын Шимонды шақырт,

¹⁴ сол адам сені және үй ішіңді құтқаратын хабарды түгел айтып береді», - дегенін айтып берді.

¹⁵ Мен сөйлей бастағанда, Киелі Рух басында бізге қалай қонған болса, оларға да дәл солай Киелі Рух келіп қонды.

¹⁶ Сонда менің есіме Иеміздің: «Жақия сендерді суға батырып шомылдырды. Енді сендер Киелі Рухқа батырылатын боласыңдар», - деп айтқан сөзі түсті.

¹⁷ Сонымен, егер де Құдай Иса Мәсіхке сенген біздерге уәде етіп берген сыйын бізбен бірдей етіп оларға да беріп тұрса, онда Құдайға қарсы тұратын мен кіммін? -деді Петір.

¹⁸ Олар мұны естігеннен кейін, тынышталды, сосын: -Құдай өзге ұлт өкілдерінің де өмірге деген ойларын өзгертіп, тәубе етуге мүмкіндік берген екен! -деп олар Құдайды мадақтады.

¹⁹ Алайда Степанмен болған жағдайдан кейін қуғынға ұшырап, жан-жаққа шашырап кеткен елшілер тек яһудейлерден басқа ешкімге сөз (уағыз) айтпады, олар Финикия мен Кипрге дейін жетіп, одан әрі Антиохияға өтіп кетті.

²⁰ Алайда олардың кейбіреуі кипрліктер мен күрендіктердің арасынан шыққан ер-азаматтар болатын, олар Антиохияға келіп, грекше сөйлейтін еврейлерге Иеміз Исаның Ізгі хабарын жариялады.

²¹ Жаратушы Иенің қолы олармен бірге болды, Иемізге бет бұрып, Оған сенім артқандардың саны көбейді.

²² Бұл хабар Иерусалимдегі қауымға да жетті, сонда олар Барнабаға арнайы тапсырма беріп, оны Антиохияға жіберді.

²³ Барнаба сонда келгенде Құдайдың оларға берген рақымын көріп, қатты қуанды, олардың жүректерінде Иемізге адал болып қалуға көздерін жеткізді.

²⁴ Барнаба ақ пейілді және Киелі Рухқа, сенімге кенелген азамат болатын, көптеген халық Иемізге келіп, оларға қосылып жатты.

²⁵ Осыдан кейін Барнаба Тарсқа барып, сол жерден Пауылды іздеп тауып алды.

²⁶ Оны тауып алып, Антиохияға ертіп келеді. Олар сонда бір жыл бойы антиохиялықтарды қауымға жинап, халыққа тәлім берді, осылайша Антиохиядағы шәкірттер алғаш рет Мәсіхшілер деген атқа ие болды.

²⁷ Сол күндері Иерусалимде жүрген пайғамбарлардың біразы Антиохияға келген болатын.

²⁸ Солардың арасынан Ағаб деген біреуі орнынан тұрып, Рух арқылы берілген аянға сүйеніп, бүкіл жер бетінде ашаршылық болатынын, соған дайын болу керектігін айтты. Бұл Рим императоры Клаудияның кезінде орындалды.

²⁹ Осыдан кейін шәкірттердің әрқайсысы өзінде бар қаражатына сай қор жинап, соны Яһудея аймағында қызмет етіп жүрген бауырластарға жіберуге шешім қабылдады.

³⁰ Жинап болған соң, оны Барнаба мен Саулдың қолына тапсырып, сондағы ақсақалдарға тапсыруға жіберді