Ефестіктерге 6 - Zhana Osiet

¹ Балалар, Иемізбен байланыста болғыларың келсе, атааналарыңды тыңдаңдар, әділдік содан басталады,

² өйткені ата-ананы құрметтеу-бізге берілген ең алғашқы өсиет әрі уәде,

³ егер осыны орындайтын болсаң, бұл өзіңе жақсы, сонда сен жер бетінде ұзақ өмір сүретін боласың.

⁴ Әкелер, балаларыңның ашуына тиіп, олардың еңсесін түсірмеңдер, керісінше, оларды ақылмен жетелеп, жігер беріп, Иеміздің жолына тәрбиелеңдер.

⁵ Құлдар, сендер өз қожайындарыңды тыңдап, оларға сый-құрмет көрсетіңдер, жұмыстарыңды ұқыптылықпен атқарып, Мәсіхке таза жүрекпен мойынсұнғандай, оларға да солай қараңдар.

⁶ Мұны адамдарға ұнау үшін емес, керісінше, Мәсіхтің құлы секілді болып, әрбір жасаған істеріңді Құдайдың еркіне сай, бар ықыластарыңмен,

⁷ ізгі ниетпен орындаңдар, атқаратын қызметтеріңді адамдарға арнап емес, Иемізге қызмет етіп жүргендей істеңдер.

⁸ Жақсылық жасаған әркімді, мейлі, ол құл болсын, мейлі, еркіндіктегі адам болсын, Иеміздің сыйын өзінің орындаған ісіне сай алатынын әрқайсысың білесің.

⁹ Қожайындар, осы нәрсе сендерге де қатысты, сондықтан құлдарыңа зорлық-зомбылық көрсетіп, мәжбүрлеуді доғарыңдар. Олардың да, сендердің де Иелерің-Біреу, Ол -Көкте және ешкімнің де бет-жүзіне қарамайды, мұны сендердің білгендерің дұрыс.

¹⁰ Соңында айтарым: Иемізбен бірлікте Оның құдіретті күшімен нығая беріңдер.

¹¹ Сайтанның өздеріңе қарсы бағытталған айла-әрекеттеріне қарсы тұра алуларың үшін, Құдайдың берген барлық қару-жарағын асыныңдар.

¹² Алайда біз қан мен тәннен тұратын адаммен күреспейміз, біз осы әлемді басқарып отырған қара түнектің басшылары мен билік иелеріне әрі аспан астындағы зұлым *рухтарға қарсы тұрып, солармен күресеміз.

¹³ Сол себепті Құдайдың өздеріңе берген барлық қаружарағын асыныңдар, сонда сендер сол зұлымдық шабуыл жасаған кезде, оларға табандылықпен қарсы тұрып, бәрін жеңіп шығып, жеңімпаз боласыңдар.

¹⁴ Енді соған қарсы нық тұру үшін, белдеріңді шындықпен бекем буып, әділдікті сауыт қылып киіп алыңдар

¹⁵ және осы әлемге Ізгі хабар таратуға дайын болу үшін, аяқ киімдеріңді де киіп алыңдар,

¹⁶ барлық жағдайда сенімдеріңді қолға алып, оны қалқан ретінде пайдаланыңдар, сонда зұлымдықтың барлық отты жебелерін өшіріп тастай аласыңдар.

¹⁷ Құтқарылғандарыңды дулыға етіп киіп, Құдайдың Сөзін Рухтың семсері етіп пайдаланыңдар.

¹⁸ Кез-келген уақытта Құдайға барлық өтініштеріңді жеткізу үшін, Рухта мінәжат етіңдер, сол үшін әрқашан сергек болыңдар әрі Құдайдың барлық киелі адамдары үшін мінәжатта тұрақты болыңдар.

¹⁹ Сонымен қатар, мен сөйлеген кезде, Ізгі хабардың құпиясын тыңдаушыларға түсінікті етіп жеткізе алатын қажетті сөз аузымнан шықсын, сол үшін де мінәжат етіңдер,

²⁰ мен-бұғауда отырған елшімін, сондықтан Мәсіхке деген сенімімді басқаларға қорықпай айта алатын болайын.

²¹ Сонымен, мен жайында немесе менің не істегенім туралы білгілерің келсе, оны менің сүйікті бауырым және Иеміздің адал қызметкері Түхіктен сұрап білерсіңдер.

²² себебі біз Сол үшін, біз туралы сендерге айтып берсін және сендердің жүректеріңе жұбаныш ұялатсын деген оймен оны сендерге жібердік.

²³ Бауырластар, біз сендерге Құдайдың бейбіт тыныштығын және Құдай Әкеміз бен Иеміз Иса Мәсіхке деген сенім, сүйіспеншілік тілейміз!

²⁴ Құдайдың рақымы Иеміз Иса Мәсіхті сүйетіндердің бәріне кіршіксіз күйінде жетсін!