Ефестіктерге 5 - Zhana Osiet

¹ Сонымен, Құдайдың сүйікті балары ретінде Құдайға еліктеп,

² сүйіспеншілікпен өмір сүріңдер. Мәсіх бізді қалай сүйсе, сендер де бір-біріңді солай сүйіңдер, себебі Ол бізді сүйгендіктен, біз үшін Құдайға Өзін тарту етіп, құрбандықтың хош иісіне айналды.

³ Сендердің араларыңда неке адалдығын бұзу, ашкөздікке әкелетін таза емес, лас нәрселердің, тіпті, аты да аталмасын, өйткені мұндай іс-әрекет Құдайдың киелі адамдарына лайықты емес.

⁴ Сонымен қатар, сендерге ұятсыз қылықтар жасап, орынсыз қалжың айту да жараспайды, одан да Құдайға көбірек алғыс айтыңдар.

⁵ Сондықтан сендер мынаны білуге тиіссіңдер: азғындықтың неше түрімен айналысып, тазалық дегенді білмейтін, тойымсыздыққа беріліп, пұтқа табынатын әркім Мәсіх пен Құдайдың Патшалығына мұрагер бола алмайды.

⁶ Ешкім де сендерді өздерінің бос сөздерімен алдап кетпесін, өйткені осындай іс-әрекет жасап, Құдайға мойынұсынбай жүргендерге Құдайдың қаһары төгілмек.

⁷ Сондықан Сендер олардың істеген істеріне араласып, олармен *сыбайлас болмаңдар.

⁸ Сендер бір кездері түнек болдыңдар, қазір Иемізде жарқыраған жарық болдыңдар, сондықтан енді сендер Сол жарықтың балаларына лайықты өмір сүріңдер.

⁹ Ал жарықтың беретін жемісі мынадай: ол кез-келген жағдайда жақсылық жасайды, әрбір кезде әділдік пен шындықты қолдайды.

¹⁰ Демек, Иемізге не ұнамды екенін біліп алыңдар.

¹¹ Жеміс бермейтін түнектің істеріне араласпаңдар, қайта олардың істерін көбірек әшкерелеңдер,

¹² себебі олардың құпия түрде жасап жүрген істерін, тіпті, айтудың өзі ұят.

¹³ Бірақ барлық құпия тек жарық арқылы ашылып, әшкере болады.

¹⁴ Жарық бәрін ашып береді. Сондықтан: «Тұр, ұйқыңнан оян! Өлімнен тіріл! Мәсіх саған нұрын төгіп тұр!», -деп бекер айтылмаған.

¹⁵ Сондықтан абайлаңдар, жүріс-тұрыстарыңа мұқият болыңдар, жүріс-тұрыстарың ақымақтікіндей емес, ақылды адамдікіндей болсын.

¹⁶ Кез-келген уақыттарыңды тиімді пайдаланыңдар, өйткені күндеріміз өте алдамшы (зұлымдыққа толы).

¹⁷ Ақылсыз болмаңдар, Иеміздің еркін түсініп алуға тырысыңдар.

¹⁸ Шарап ішіп, мас болмаңдар, ол жүгенсіздікке апарады, оның орнына Рухқа кенеліп,

¹⁹ бір-біріңе Забур жырларын, рухани мадақтау әндерін айтып, жүректеріңнен шыққан жырлармен Иемізді мадақтаңдар.

²⁰ Иеміз Иса Мәсіхтің Әкесі Құдайға әрқашан алғыс айтыңдар.

²¹ Мәсіхті дәріптеп, Оны құрметтей отырып, бір-біріңе мойынұсыныңдар.

²² Әйелдер, Иемізді қалай құрметтесеңдер, күйеулеріңді де солай құрметтеңдер.

²³ Мәсіх-қауымның Басы әрі Құтқарушысы, сол секілді әйелдің басы-оның күйеуі.

²⁴ Сонымен, қауым Мәсіхке қалай бағынса, әйелдер де дәл солай барлық жағдайда күйеулеріне бағынуы тиіс.

²⁵ Күйеулер, әйелдеріңді жақсы көріңдер, себебі Мәсіх қауымды жақсы көрді, сондықтан Ол Өзін құрбандыққа беріп,

²⁶ оны киелі ету үшін, сөз арқылы судан өткізіп, тазалады.

²⁷ Ол мұны тек Өзіне тиесілі және тек Өзін құрметтейтін қауым жасап шығару үшін істеді, енді онда ешбір дақ, не болмаса ешбір кемшілік болмайды, керісінше, ол киелі әрі кіршіксіз таза болады.

²⁸ Күйеудің міндеті де дәл солай, ол өз денесін қалай сүйсе, әйелін де солай сүюі тиіс. Өз әйелін сүйе білген өзін де сүйеді.

²⁹ Ешкім өз денесін жек көрмейді, қайта, оған нәр беріп, оны жылы ұстауға тырысады, сол секілді Мәсіх те Өзінің қауымына дәл солай қарайды,

³⁰ өйткені біз Оның денесінің бір-бір мүшесіміз.

³¹ «Адам өз әке-шешесін тастап, әйеліне барып қосылады, сөйтіп, екеуі бірігіп, бүтін бір дене болады».

³² Осының астарында терең бір сыр бар, мен мұны тек Мәсіхпен және қауыммен байланыстырып айттым.

³³ Алайда сендердің әрқайсысың өздеріңді қалай сүйсеңдер, әйелдеріңді де дәл солай сүюге тиіссіңдер, ал әйелдер күйеуін қадірлеп, қастерлейтін болсын.