Ефестіктерге 3 - Zhana Osiet

¹ Мен, Пауыл, Иса Мәсіхтің құлы болғандықтан және өзге ұлттық бауырластар, сендер үшін де тұтқында отырмын.

² Әрине, сендерге бола маған берілген Құдайдың рақымы туралы және соны жеткізудің өзі маған тапсырылғанын сендер естідіңдер.

³ Өйткені Құдай маған берген аяны арқылы Өзінің құпиясын ашты, сол туралы қысқаша баяндап жазып қойдым.

⁴ Соны оқысаңдар, Мәсіх туралы құпиядан менің не түсінгенімді байқайсыңдар,

⁵ бұл басқа ұрпақтарға, яғни, адам баласының ешқайсысына осы уақытқа дейін ашылмаған болатын, ал қазір бұл Оның киелі елшілеріне, Оның Рухымен жүрген пайғамбарларға ашылып отыр.

⁶ Енді өзге ұлт өкілдері де осы Ізгі хабар арқылы мұрагер атанып, бір дененің мүшелері ретінде Мәсіх Иса арқылы берілген уәдеге олар да ортақтасатыны аян болды.

⁷ Ал мен Құдайдың сыйлаған рақымымен Оған қызмет етіп, Оның маған берген күшіне сай әрекет етіп жүрмін.

⁸ Мен киелілердің арасындағы ең елеусізі болсам да, Оның сол рақымдылық жайындағы хабарын жариялау маған жүктелген екен. Мұнда адамның ақылымен зерттеп, білуге болмайтын Мәсіхтегі шексіз байлықты, яғни, Ізгі хабарды, өзге ұлттарға жариялап,

⁹ бүкіл әлемді жаратқан Құдайдың басшылығымен ғасырлар бойы жасырын болып келген Оның осы бір құпия жоспарын барлығына бірдей ашып беру маған сеніп тапсырылды.

¹⁰ Сол арқылы Құдайдың жан-жақты әрі көпқырлы даналығы енді қазіргі кездің басшылары мен көкті билеп тұрған билік иелеріне (Мәсіхтің соңынан еретін) қауым арқылы ашылуы тиіс.

¹¹ Міне, сондықтан да Ол Өзінің алдын ала бекітіп, ғасырлар бойы сақтап келген бұл жоспарын Ол біздің Иеміз Иса Мәсіх арқылы іске асырды.

¹² Осының арқасында Құдайға жақындай алатын құқық пен мүмкіндікке қол жеткіздік, біз бұған Оған деген сенім арқылы қол жеткіздік.

¹³ Сондықтан сендерге бола менің басыма түскен ауыртпалық туралы ойлап, уайымға салынбауларыңды өтінемін, себебі бұл сендерге даңқ әкеліп, абыройларыңды асырмақ.

¹⁴ Мен сол үшін де Әкенің алдында келіп,

¹⁵ көктегі және жердегі барлық ұрпақ Оны Әке деп атап, өмірге ие болуы үшін, тізерлеп мінәжат етемін.

¹⁶ Сол себептен Оның даңқының байлығына сәйкес, құдіретті күшімен Өзінің Рухы арқылы сендердің жан дүниелеріңді байытып, нығайта берсін.

¹⁷ Сөйтіп, сендердің сенімдерің арқылы Мәсіх жүректеріңнен орын алып, Өзінің сүйіспеншілігімен тамыр жайып, басты және тұрақты негізге айналсын.

¹⁸ Сонымен, сендер Құдайдың барлық киелі адамдарымен қатар тұрып, Мәсіх арқылы келетін сүйіспеншіліктің қаншалықты кең және ұзақ, биік әрі терең екенін

¹⁹ түсініп, Мәсіхтің сүйіспеншілігінің соншалықты *шексіз екенін білсеңдер екен деп, Құдайға мінәжат етемін, сонда ғана Құдайды толық танып-біле алатын боласыңдар.

²⁰ Біздің өмірімізде әрекет ететін Мәсіхтің күші арқылы Құдай сұрағанымыздан да, білгенімізден де артық етіп, асып-төгіп бере алады.

²¹ Сондықтан Оның қауымдағы және Мәсіх Исадағы даңқы ғасырдан ғасырға артып, ұрпақтан-ұрпаққа жете берсін! Аумин!