Ефестіктерге 2 - Zhana Osiet

¹ Бір кездері сендер өздерің жасаған қылмыстар мен күнәлардың кесірінен өлілердің қатарында болдыңдар,

² Сол кезде сендер де әуе кеңістігінде мекендеуші рухтардың, осы әлемді билеп-төстеуші (зұлым күштер) билеушілерінің, яки, күні бүгінге дейін Құдайға мойынсұнбай, Оған қарсы тұратындардың бойында әрекет ететін сайтанның бұйрығымен әрекет еттіңдер.

³ Бұрын бәріміз де солардың қатарында болдық, біз де тәндік құмарлықтарға беріліп, табиғатымызға сай тәніміз бен санамызға жат ойлардың қалауын орындадық. Басқалар сияқты біз де Құдайдың қаһарына ұшырағандардың қатарында болдық.

⁴ Алайда Құдай өте мейірімді болғандықтан, Ол Өзінің шексіз сүйіспеншілігімен бізді жақсы көріп,

⁵ өзіміздің сол жасаған қылмыстарымыздың кесірінен өлі болған біздерді Құдай Мәсіхпен бірге қайта тірілтіп алды. Сонымен, сендер Оның рақымының арқасында құтқарылдыңдар.

⁶ Құдай бізді Иса Мәсіхпен бірге қайта тірілтіп алған соң, Иса Мәсіхпен бірге көкте өмір сүретіндердің қатарына апарып отырғызды.

⁷ Ол осы арқылы келер ұрпаққа Өзінің рақымының қаншалықты ағыл-тегіл мол екенін және Иса Мәсіхтегі бізге де сол игі істің қандай қатысы бар екенін көрсетті.

⁸ Сендер Оның рақымымен сенім арқылы құтқарылдыңдар, бұл өздеріңнен келген әрекет емес, Құдайдың берген сыйы.

⁹ Сондықтан бұған ешқандай да бір іс-әрекеттің қатысы жоқ, сондықтан ешкім еш нәрсемен мақтана алмайды.

¹⁰ Ол-Жаратушы Ие, біз-Оның жаратқан жаратылысымыз, біз Мәсіх Исамен бірігу арқылы жаратылдық, ендігі міндетіміз-Құдайдың алдын ала белгілеп қойған игі істерін орындау.

¹¹ Өздеріңе тәндік тұрғыдан қарайтын болсаңдар, кезінде сендер де өзге ұлттың өкілдері болғандарыңды естеріңде түсіріңдерші. Сонда тәнін қолмен сүндеттеп жүргендер сендерді «сүндеттелмегендер» деп атайтын.

¹² Себебі сендер сол уақытта Мәсіхсіз болдыңдар әрі Құдайдың Өз уәделеріне сай Исраил халқына берген келісімдерінен тыс қалдыңдар, үмітсіз әрі Құдайсыз болып, осы әлемнің салтына сай өмір сүрдіңдер.

¹³ Ал қазір енді сендер Мәсіх Исамен бірліктесіңдер, бір кездері Одан алыс болсаңдар, енді Мәсіхтің төгілген қаны арқылы Оған жақындадыңдар.

¹⁴ Біздің татуластырушымыз-Мәсіх, өйткені Ол екі ортаны бөліп тұрған қабырғаны Өзінің денесімен бұзды, екі жақтағы өшпенділікті талқандап, екеуін біріктірді.

¹⁵ Заңда берілген ережелер мен нұсқаулардың күшін жойды, екі жақты Өзімен байланыстырып бекітіп, екеуінен бір жаңа адам жасап шығарып, екі жаққа бірдей тыныштық орнату үшін,

¹⁶ екі жақтағы екі денеден айқыш арқылы бір дене жасап шығарды да, оларды өзара Құдаймен татуластырып, екі ортадағы өшпенділікті жойып, алып тастады.

¹⁷ Ол келіп, татулықтың Ізгі хабарын алыстағы сендерге де, жақында жүрген біздерге де жариялады.

¹⁸ Енді біз Әкеге тек Ол арқылы бір Рухта жүріп жақындай аламыз.

¹⁹ Сондықтан енді сендер не жат жерлік немесе келімсек емессіңдер, керісінше, киелілердің қатарына кіріп, олармен отандас әрі Құдайдың отбасының мүшесі болдыңдар.

²⁰ Құдайдың отбасының іргетасын пайғамбарлар мен елшілер қалаған болатын, ал сол құрылыстың негізгі іргетасы -Иса Мәсіхтің Өзі, сендер де енді Соған қаланып жатырсыңдар.

²¹ Міне, сол негізгі іргетастың үстіне салынған құрылыс бірте-бірте өсіп, Иеміздің Киелі үйіне айналмақ.

²² Сол үйге сендер де Иемізбен бірге қаланып жатқандықтан, сол жерде Құдайдың Рухы мекендейтін болады.