Аян 9 - Zhana Osiet

¹ Осыдан кейін бесінші періште кернейін тартты, сол кезде мен көктен жерге құлап түскен бір жұлдызды көрдім. Оған түпсіз тұңғиықта жатқан құдықтың кілті берілді.

² Сонда ол жұлдыз түпсіз тұңғиықта жатқан құдықтың бетін ашты, сол кезде әлгі құдықтан бір алып пештен шыққандай қою түтін сыртқа шықты. Сол түтін ауаға таралды, ол күннің көзін жауып, айналаны қара түнекке айналдырды.

³ Одан кейін әлгі түтіннен шегірткелер пайда болып, олар бүкіл жер бетін басып алды, жердегі шаяндарға қандай күш берілген болса, оларға да дәл сондай күш берілді.

⁴ Оларға жердегі шөпке, кез-келген жасыл өсімдіктер мен ағаштарға зиян келтіруге тыйым салынды, бірақ ол маңдайларында Құдайдың мөрі басылмаған адамдарға зиянын тигізе алатын еді.

⁵ Сонымен, шегірткелердің мақсаты адамдарды өлтіру емес, оларды бес ай бойы қинау болатын. Олар адамдарды шаққанда, оларға келтіретін зияны шаянның шаққанымен бірдей болды, сонда адамдар азап шегіп, қатты қиналатын.

⁶ Міне, адамдардың басына, шынымен де, сол күндер туғанда, олар өз-өзіне өлім тілейтін халге душар болады, бірақ өлімді іздесе де таба алмайды, өлгісі келсе де, өлім олардан қашып кетеді.

⁷ Шегірткелер ұрысқа дайын тұрған аттардың бейнесіне ұқсас болды. Олардың бастарында алтын сияқты сары түсті, жылтыр тәж болды, ал бет-әлпеті адамдардікіне ұқсас еді.

⁸ Олардың шаштары әйелдердің шашына ұқсас болса, тістері арыстанның тістеріндей болды.

⁹ Шегірткенің үстінде қатты, темір сияқты сауыт болды және олардың қанаттарының суылы шайқасқа шыққан сансыз көп аттың шапқан шабысын және атқа жеккен соғыс арбаларының шуылын еске салады.

¹⁰ Сонымен қатар, олардың құйрықтарында шаянның құйрығына ұқсаған өткір істік болды, құйрықтарындағы сол істікте бес ай бойы адамдарға зиян туғызатын күш болды.

¹¹ Олардың үстінен тұңғиықтың періштесі патшалық етті. Еврей тілінде оның аты -«Аввадон», ал грек тілінде оны «Аполлион» (Құртушы) деп атайтын.

¹² Сонымен, бірінші қасірет өтіп кетті, енді осыдан кейін тағы да екі қасіреттің кезегі келіп жетті.

¹³ Алтыншы періште кернейін тартқан кезде, мен Құдайдың алдында орналасқан алтыннан жасалған құрбандық үстелінің төрт бұрышында тұрған төрт мүйіздің біреуінің сөйлеген даусын естідім.

¹⁴ Ол кернейі бар алтыншы періштеге: -Үлкен Евфрат өзенінің бойында байлауда жатқан төрт періштені босатып, олардың байлауын шешіп жібер, - деді.

¹⁵ Сол сағатқа, сол күнге, сол айға, сол жылға дайындалған төрт періште адамдардың үштен бір бөлігін өлтіру үшін босатып жіберілді.

¹⁶ Мен олардың атты әскерінің саны екі он мыңдық бөлімшеден тұратын он мың бөлімшенің бар екенін естідім.

¹⁷ Сонда мен аян арқылы сол аттарды және салт аттыларды көрдім. Ат үстінде отырғандардың киген сауыттары от түстес әрі қара көк пен күкірт түстес болды. Ал олар мінген аттардың басы артыстанның басына ұқсас болды, аттарының ауыздарынан жалындаған от пен түтін және күкірт шашырап тұрды.

¹⁸ Олар ауыздарынан үш рет от пен түтін және күкірт шашып, адамдардың денелеріне жара салды, содан адамзаттың үштен бір бөлігі қырылып қалды.

¹⁹ Аттардың күші олардың ауыздары мен құйрықтарында болды. Олардың құйрықтары басы бар жылан секілді болатын, олар сонымен адамдардың денесін шағып, жаралайтын.

²⁰ Олардың зиянды әрекеттерінен өлмей, аман қалғандар өздерінің жасағандарына еш өкінбеді. Олар бұрынғыдай сайтанға, алтын, күміс, қола, тас пен ағаштан жасалған не көрмейтін, не естімейтін, не жүрмейтін пұттарға табынуларын тоқтатқан жоқ, олардан бас тартып, ойсаналарын өзгерту үшін тәубеге келмеді.

²¹ Олар өздерінің кісі өлтіргендеріне, сиқырлық жасағандарына, неке адалдығын бұзып, азғындықпен айналысқандарына да еш өкінбеді, солардан бас тартып, тәубеге келмеді.