Аян 8 - Zhana Osiet

¹ Тоқты жетінші мөрді ашқан кезде, көкте жарты сағатқа жуық тыныштық орнады.

² Мен Құдайдың алдында тұрған жеті періштені көрдім, олардың жетеуіне жеті керней берілді.

³ Содан кейін тағы бір періште келді, хош иісті заттарды түтетуге арналған алтын ыдысымен құрбандық үстелінің жанына келді. Сол кезде оған түтеуге арналған өте көп хош иісті заттар берілді, ол сол хош иісті заттарды алып, барлық киелілердің өтініші мен мінәжаттарына қосып, оларды тақтың алдында орналасқан құрбандық үстелінің үстіне қойды.

⁴ Сонда періштенің қолымен түтетілген хош иісті заттардың түтіні киелілердің өтініш мінәжаттарымен бірге әуе кеңістігіне жайылып, Құдайдың алдына жетті.

⁵ Сол кезде періште хош иісті зат түтететін ыдысты алып, оны құрбандық үстелінде жанып жатқан оттың шоғымен толтырып, жерге лақтырып жіберді. Сол сәтте күн күркіреп, айғайлаған дауыстар шығып, найзағай жарқылдап, жер сілкінді.

⁶ Сонда қолдарында кернейлері бар жеті періште кернейлерін тартуға дайындала бастады.

⁷ Бірінші періште кернейін тартқан кезде, көктен қан мен от аралас бұршақ жауып, жерге түсіп жатты, сонда жердің үштен бір бөлігі және ағаштардың үштен бір бөлігі, жердегі көк шөптің бәрі өртке оранды.

⁸ Екінші періште кернейін тартқан кезде, тау сияқты отқа оранған үлкен бір нәрсе жердегі теңізге тасталды, сонда теңіздің үштен бір бөлігі қанға айналды.

⁹ Теңіздегі тірі жәндіктерінің үштен бір бөлігі қырылып, кемелердің үштен бір бөлігі қирап қалды.

¹⁰ Үшінші періште кернейін тартқан кезде, көктен алау секілді лаулап жанған бір үлкен жұлдыз жер бетіндегі өзендер мен су көздерінің үштен бір бөлігіне құлап түсті.

¹¹ Құлап түскен жұлдыз Жусан деп аталады. Сонда судың үштен бір бөлігі жусан сияқты ащы болып, одан ішкен адамдардың көбі өліп кетті, өйткені Жусан түскен су толығымен ащы болды.

¹² Төртінші періште кернейін тартқан кезде, күннің үштен бір бөлігі, айдың үштен бір бөлігі, жұлдыздардың үштен бір бөлігі зақымданып, олардың үштен бір бөлігі жарық бермей, жер қара түнекке айналды, сонымен қатар, күннің де үштен бір бөлігі жарық бермей, түндей түнеріп тұрды.

¹³ Осыдан кейін мен аспанның қақ ортасында қалықтап ұшып жүрген бір бүркітті көрдім, ол: -Енді қалған үш періште кернейлерін тартуға дайындалып тұр, олардың кернейлерінің даусы шыққан кезде, жерде өмір сүріп жатқан адамдар, сендер қасіретке қаласыңдар! Қасіретке қаласыңдар! Қасіретке қаласыңдар! -деп ол қатты дауыстап айғайлады.