Аян 4 - Zhana Osiet

¹ Осыдан кейін мен көктегі бір есіктің ашық тұрғанып көрдім, сонда ең алғаш кернейдің үніндей болып естілген дауыс маған: -Жоғары көтеріліп, мына жерге кел, Мен саған осыдан кейін не болатынын көрсетемін, - деді.

² Сол сәтте мен бірден Рухқа бөленгенімді білдім. Сонда мен көкте тұрған бір тақты және сол тақта отырған Біреуді көрдім.

³ Тақта Отырғанның бейнесі яспис пен сардис (сердолик) тастарына ұқсап, жарқырап тұрды, ал тақтың айналасын зүбәржатқа ұқсаған кемпірқосақ қоршап тұрды.

⁴ Тақтың айналасында тағы да жиырма төрт тақ тұр, сол тақтарда аппақ киім мен бастарына алтыннан тәж киген жиырма төрт ақсақал отырды.

⁵ Тақтан найзағай мен күннің күркіріне ұқсаған дыбыстар шығып жатты, тақтың алдында жеті алау жанып тұрды, бұл Құдайдың жеті Рухы болатын.

⁶ Сонымен қатар, тақтың алдында кристалл секілді әйнектей жалтыраған теңіз орналасыпты. Ал дәл ортада, тақтың айналасында, алдында да, артында да көптеген көздері бар төрт жануар тұрды.

⁷ Бірінші жануардың бейнесі арыстанға ұқсайды, екінші жануардың бейнесі өгізге, ал үшінші жануардың бейнесі адамның бет-әлпетіне ұқсайды, төртінші жануардың бейнесі қыран бүркітке ұқсас болды.

⁸ Бір-біріне қарама-қарсы тұрған төрт жануардың әрқайсысында алты қанаттан болды, қанаттарының айналасында, ішкі жағында да көптеген көздер орналасыпты. Олар күні-түні: -Ол киелі, Ол киелі, Бәрін билеуші Құдай, Жаратқан Ие киелі, Ол әуел баста бар болатын, Ол қазір де бар, Ол болашақта да болады, Ол келеді! - деп тынбай сөйлеп тұрды.

⁹ Әлгі жануарлар тақта Отырғанды даңққа бөлеп, мәңгілік өмір Сүретінге тағзым етіп, құрмет көрсеткен кезде,

¹⁰ жиырма төрт ақсақал тақта Отырғанның алдына тізерлеп жығылып, ғасырдан ғасырға, мәңгі өмір Сүретінге тағзым етіп, тәждерін тақта Отырғанның алдына тастап:

¹¹ -Біздің Жаратушы Иеміз әрі біздің Құдайымыз даңқ пен құрметті, ұлы күшті қабылдауға лайықты, өйткені бәрін жаратқан Сенсің, бәрі Сенің еркіңмен жаратылған! -деп мадақтаумен болды.