Аян 20 - Zhana Osiet

¹ Осыдан кейін мен көктен төмен қарай түсіп келе жатқан бір періштені көрдім. Әлгі періштенің қолында түпсіз тұңғиықтың кілті және үлкен шынжыр болды.

² Міне, сол періште ежелгі жылан айдаһарды ұстап алып, оны мың жыл мерзімге дейін бұғаулап тастады, өйткені ол өтірікті судай сапырып, адамдарға жала жауып келген сайтан еді.

³ Одан кейін періште оны түпсіз тұңғиықтың түбіне тастап, мөрмен бекітіп, жауып тастады. Ол халықты тағы да алдап, оларды тура жолдан тайдырмас үшін, мың жыл уақыт өткенше, ол осылай байлаулы жатуы тиіс. Ал белгіленген уақыт біткен кезде, оның байлауы тек аз уақытқа ғана шешіледі.

⁴ Осы сәттен кейін мен сот жүргізетін тақтарды көрдім, сол тақтарда сот үкімін жүргізетіндер және Иса туралы куәлік айтып, Құдайдың сөзі үшін бастары шабылған, хайуан мен оның мүсініне табынбай, маңдайлары мен қолдарына оның таңбасын салғызбағандардың* жандары отырды. Олар қайта тірілді, енді олар Мәсіхпен бірге мың жыл патшалық құрады.

⁵ Ал өлімге кесілген қалғандары мың жыл уақыт аяқталғанша, өлімнен қайта тірілмейді. Бұл бірінші өлімнен қайта тірілудің алғашқы кезеңі болып саналады.

⁶ Өлімнен қайта тірілудің алғашқы кезеңіне іліккендер бақытты әрі киелі болып саналады, өйткені екінші өлімнің билігі оларға жүрмейді, бұлар Құдай мен Мәсіхке қызмет ететін қызметшілер болғандықтан, олар Мәсіхпен бірге мың жыл патшалық құрады.

⁷ Белгіленген мың жыл мерзімі аяқталған соң, сайтан бостандық алып, қапастан шығады.

⁸ Ол қапастан шығып, жердің төрт бұрышындағы Гога мен Моганың халықтарын алдап, олардың басын қосып, Құдайдың халқына қарсы соғысқа шақырды. Құдайдың халқына қарсы соғысқа шыққан халықтың саны теңіз жағасындағы құм түйіршіктеріндей көп еді.

⁹ Олар сапқа тұрған кезде жердің бұл шетінен арғы шетіне дейін жететін, олар сол сап түзеген күйі Құдайдың киелі адамдары тұратын жерді және Құдайдың сүйікті қаласын қоршай бастады. Сонда көктен от түсіп, оларды жалмап, құртып жіберді.

¹⁰ Оларды алдап, тура жолдан тайдырған сайтанды хайуан мен жалған пайғамбар жатқан отты теңізге лақтырды. Олар енді сол жерде бірге болып, күні-түні, мәңгі отқа күйіп, қиналатын болады.

¹¹ Осы бір сәтте мен үлкен аппақ тақты және сол тақта отырған Біреуді көрдім. Оның бет-жүзі көрінген кезде, жер мен күннің өзі қашуға дайын болды, бірақ қашатын жер таппай қалды.

¹² Міне, мен сол тақтың алдында өлгендер мен тірілердің, үлкендер мен кішілердің тұрғанын көрдім. Сонда кітаптар ашыла бастады. Кітаптардың арасынан Өмір кітабы ашылып, өлгендердің бәрі сол кітапта жазулы тұрған істеріне сай сотталды.

¹³ Сонда теңізде қайтыс болғандарды теңіз қайтарып берді, ал өлім мен тозақ өздерінде болған өлілерді қайтарып берді, осылай әркім өзінің жасаған істеріне сай сотталды.

¹⁴ Осыдан кейін өлім мен тозақ жанып жатқан отты көлге тасталды. Отты көл бұл екінші өлім болып саналады.

¹⁵ Сонымен, егер де кімде-кімнің есімі Өмір кітабына жазылмаған болса, сол отты көлге тасталды.