Аян 19 - Zhana Osiet

¹ Осыдан кейін мен топтанып жиналған қалың халықтың даусына ұқсас дауысты естідім. Көкте олар дауыстап: -Аллилуия! Құтқару да, даңқ та, күш те біздің Құдайда,

² өйткені Оның соты шынайы әрі әділетті! Ол осы әлемді арсыз азғындығымен бүлдірген (жезөкше) әйелді соттап, оған әділ үкім шығарды, одан зардап шеккен Құдайдың құлдарының қаны үшін, сол әйелді жазалады.

³ Олар қайтадан айғайлады: -Аллилуия! Енді мәңгілікке оның үстінен түтін арылмайтын болады!

⁴ Сол кезде жиырма төрт ақсақал мен төрт хайуан тақта отырған Құдайға бастарын иіп, тағзым етіп: -Аумин! Аллилуия! - деді.

⁵ Сонда тақтан: -Оның барлық құлдары, Одан қорқатындардың бәрі, кішілерінен ұлыларына дейін біздің Құдайды мадақтаңдар! - деген дауыс шықты.

⁶ Осыдан кейін шуылдаған көп адамдардың даусына, біресе таудан аққан сарқыраманың гүріліне, біресе күннің күркіріне ұқсаған дауысты естідім: -Аллилуя! Бүкіл әлемді Билеуші біздің Құдай Иеміз Патшалық құрды!

⁷ Келіңдер, қуанып, шаттанайық! Құдайдың даңқын мадақтайық! Тоқтының үйленетін уақыты келді! Оның қалыңдығы сол салтанатты сәтке дайын!

⁸ Оған сол салтанатқа киетін ақ бәтестен тігілген аппақ, тап -таза көйлек берілді, өйткені аппақ бәтес -әділдіктің белгісі, Құдайдың киелі халқының істері әділ дегенді білдіреді.

⁹ Содан кейін Ол маған былай жаз деді: -Тоқтының салтанатты үйлену тойына шақырылғандар бақытты! Сосын тағы былай деп қосты: -Бұл-шынайы сөздер, себебі Құдай солай айтты.

¹⁰ Ол осылай деген соң, мен Оған тағзым етпек болып, аяғына жығылдым, сонда ол маған: -Абай бол! Маған тағзым етуші болма! Мен де сен және сенің бауырластарың сияқты Құдайға қызмет етіп жүрген құлдың бірімін, менде Исаның куәлігі бар. Сен Құдайға ғана тағзым ет! Исаның куәлігінде пайғамбарлықтың рухы бар, - деді.

¹¹ Осы сәттен кейін мен көктің ашылғанын көрдім, міне, ақ боз аттың үстінде Адал және Ақиқат деп аталатын Біреу отырды. Ол әділ үкім шығарады және әділ соғысады.

¹² Оның көздері оттай лаулап жанып тұрды, Оның басында көптеген әшекейлермен безендірілген тәж болды. Ал басындағы тәжде Оның Өзінен басқа ешкім білмейтін бір есім жазылыпты.

¹³ Ол киімінің сыртынан қанмен жуылған жамылғы жамылыпты, Оның есімі - Құдайдың Сөзі.

¹⁴ Оның соңынан ақ боз атқа мініп, тап-таза, аппақ бәтестен киім киген салт атты көктің әскерлері еріп жүрді.

¹⁵ Ал оның аузынан өткір қылыш шығып тұрды. Ол сол қылышпен халықтарды жаулап, оларды темір асатаяқпен бағып, оларды бүкіл әлемді билеуші Құдайдың қаһарына беріп, жүзімнің шырынын сыққандай таптап, оларға бар ашуын төкпек.

¹⁶ Оның сыртындағы жамылғысына және беліне: «Патшалардың патшасы, Иелердің Иесі», -деп жазылыпты.

¹⁷ Осыдан кейін мен күннің көзінде отырған бір періштені көрдім. Ол көктің ортасында ұшып жүрген құстарға қатты дауыстап: -Барлығың мында келіңдер! Құдайдың кешкі үлкен асына жиналыңдар!

¹⁸ Сендер патшалар мен әскери қолбасшылардың өлігін, күшті адамдардың, аттар мен оған мінген шабандоздардың денесін, барлық еркіндіктегі адамдар мен құлдардың, үлкендер мен кішілердің өлі денесін жейтін боласыңдар, -деді.

¹⁹ Осы кезде мен хайуанның және жердің патшаларының әскерлерін біріктіріп, ат үстінде Отырғанға және Оның әскеріне қарсы соғыс ашуға жиналып жатқан сәтін көрдім.

²⁰ Алайда хайуан мен олардың алдында кереметтер жасап жүрген жалған пайғамбар қолға түсіп, тұтқындалды, өйткені ол алдап, оларға хайуанның таңбасын қабылдатып, оған тағзым етуге мәжбүрлеген болатын. Олардың екеуі де тірідей жанып жатқан күкіртті отты теңізге лақтырылды.

²¹ Ал қалғандары ат үстінде Отырғанның аузынан шыққан қылыштың жүзінен өлім құшты, құстар ұшып келіп, олардың өлекселерін жеп, тойынды.