Аян 18 - Zhana Osiet

¹ Мен осыдан кейін тағы бір періштенің көктен төмен қарай түсіп келе жатқанын көрдім, оның билігінің ұлылығы соншама, жер беті оның даңқымен нұрланып тұрды.

² Ол құдіретті даусымен былай деді: -Құлады, ұлы Бабыл құлады, сайтандардың мекені мен неше түрлі таза емес рухтардың баспанасы болған, барлық таза емес, жексұрын құстар мен сан алуан арам хайуандарды, жиіркеніштінің бәрін қамайтын абақтыға айналған ұлы Бабыл құлады.

³ Оның азғындық шарабынан бүкіл халық ішіп, дәмін татса, жердің патшалары онымен азғындыққа түсті, оның сән-салтанатқа деген шексіз құмарлығын білген жердегі саудагерлер оның масайрап жүрген сәтінен пайда тауып, байып отырды.

⁴ Осыдан кейін мен көктен басқа бір дауыстың шыққанын естідім. Ол былай деді: -Халқым менің, оның күнәларының жетегінде кетіп, оған жіберілген қасіреттен зардап шекпеуің үшін, одан шығып кет,

⁵ өйткені оның ауыр күнәлары көкке жетті, оның әділетсіз істерінің бәрі Құдайдың есінде.

⁶ Сондықтан ол сендерге не істеген болса, сендер де оған соны істеңдер, оның сол істегендерінің қарымтасын екі есе етіп қайтарыңдар. Оның өз шарабын араластырған тостағанға қосқан қоспасына екі есе етіп қосып беріңдер.

⁷ Ол қаншама (даңқ пен сән-салтанатқа бөленіп), соншама масайрап, азғындыққа берілген болса, оған соншама азап пен қайғы-қасірет тартқызыңдар. Өйткені ол жүрегінде: «Мен жесір емеспін, патшайыммын! Мен патшайым сияқты тақта отырмын! Мен қайғы-қасірет шекпеймін!» - дейді.

⁸ Сондықтан қасірет те, өлім де, азап та, аштық та оған бір күннің ішінде басына түседі, содан кейін ол отқа өртеледі, себебі оны соттаған мәңгілік Құдай құдіретті.

⁹ Ал онымен бірге азғындыққа түсіп, онымен бірге сәнсалтанатқа рақаттанған жердің патшалары оның түтінге оранып, жанып жатқанын көргенде, зар еңіреп жылап, оны жоқтайтын болады.

¹⁰ Олар алыста тұрып, оның азапқа түсіп, қиналғанын көргенде, қорқыныш билеп: -Қасірет! Қасірет! О, ұлы қамалдай берік Бабыл қаласы, саған келді! Бір сағаттың ішінде сен жазаланып, сотталып кеттің! - деді олар.

¹¹ Олармен бірге жер бетіндегі саудагерлер де оның артынан жоқтау айтып, боздап жылайды, өйткені енді олардың заттарын ешкім де сатып алмайды.

¹² Сонымен, олардың мынадай заттары: алтыны мен күмісі, құнды бағалы тастары мен маржан тастары; қымбат бәтес және күлгін түсті маталары, жібек, алқызыл түсті кездемелері; әр түрлі хош иісті ағаштары; пілдің сүйегінен жасалған өнімдері, мыс, темір, мәрмәр тастары;

¹³ даршын, дәмдеуіштер, түтетуге арналған хош иісті миро, ладан майлары, шарап, зәйтүн майы; ұн, бидай, ірі қара мал мен қойлары, жылқылар мен арбалары, құлдар мен соғыста қолға түскен тұтқындары, қысқасы, адамның тәні мен жанына қажеттінің бәрі сатылмай қалды. Сонда олар:

¹⁴ -Сонымен Бабыл қаласы, сенің қалауыңның жемісі болған, яғни, сенің жаның нені қаласа, солар сенің уысыңнан шығып кетті. Сенің байлыққа толы сәттерің мен сенің жарқырап жүрген сән-салтанатың құрыды, ол енді жоқ, ешқашан қайтып келмейді.

¹⁵ Ал осы заттардың бәрін сатып, соның арқасында байыған саудагерлер оның азапқа түскенін көргенде, оларды қорқыныш билеп, шетте тұрады. Олар қайғыра жылап, быдай дейді:

¹⁶ -Қасірет! Қасірет! О, ұлы Бабыл қаласы, сен кезінде қымбат бәтестен, күлгін және алқызыл түстен киім киіп, алтынмен, қымбат асыл тастармен, інжу-маржанмен малынған қала едің!

¹⁷ Енді міне, осыншама байлықтан бір сағаттың ішінде айрылдың! Барлық кеме капитаны мен сол жерден кемемен өтетіндер де, теңізшілер де, теңіз бетінде саудамен айналысатындар да алыстан бақылап тұрып,

¹⁸ оның түтінге оранып, өртеніп жатқанын көргенде: -Бұл ұлы қалаға тең келетін қала бар ма екен? -деп жылаумен болады.

¹⁹ Олар бастарына күл шашып, зар еңіреп жылап, күйіне былай деді: -Қасірет! Қасірет келді ұлы қалаға! Теңізге шығатын кемелердің иелері осы ұлы қаланың байлығы арқылы байып отырған еді. Енді сол қала бір сағаттың ішінде жойылып кетті!

²⁰ -Бұл жағдай Бабыл қаласының басына түскені үшін, көк аспан, киелілер мен елшілер, пайғамбарлар, қуана шаттаныңдар! Құдай сендер үшін оны соттап, төлемін төлетті.

²¹ Осыдан кейін бір күшті періште диірменнің тасындай бір тасты алды да, теңізге тастап жіберіп: -Ұлы қала Бабыл да дәл осындай екпінмен төмен тасталады, ол енді жойылады, оны ешкім еш жерден таба алмайды, - деді.

²² Енді бұдан былай сенің төріңде кифаршылар мен музыканттардың, сыбызғышылар мен кернейшілердің әуендері ешқашан естілмейтін болады, сенің аулаңнан бірде-бір ұсталарды не қолөнер шеберлерін де ешқашан таппайсың, диірмен тастарының даусы да ешқашан естілмейтін болады.

²³ Бұдан былай ешқашан шамдар жарқырамайды, ешқашан күйеу жігіт пен қалыңдықтың дауыстары да естілмейтін болады. Сенің саудагерлерің жер бетінің ұлы қожайындары болды, сен сиқырлығыңмен бүкіл халықты алдап келдің.

²⁴ Алайда пайғамбарлар мен Құдайдың киелі халқының, жер бетінде өлтірілгендердің бәрінің қаны осы қалада төгілді.