Аян 16 - Zhana Osiet

¹ Осы кезде мен көктегі Құдайдың үйінен шыққан бір дауысты естідім, сол дауыс жеті періштеге: -Құдайдың қаһарына толы жеті тостағанды жерге төгіңдер, - деді.

² Бірінші періште барып, Құдайдың қаһарына толы тостағанды жерге төгіп жіберді, сонда хайуанның таңбасы бар адамдарда және сол хайуанның мүсініне табынып жүргендердің денесінде қорқынышты іріңді жаралар пайда болды.

³ Екінші періште барып, Құдайдың қаһарына толы тостағанды теңіздің үстіне төкті, сонда теңіз қанға айналды, қанның түсі өлген адамның қанына ұқсас болды, сонда теңіздегі бүкіл тіршілік иелерінің бәрі қырылып қалды.

⁴ Одан кейін үшінші періште барып, Құдайдың қаһарына толы тостағанды өзендер мен су көздеріне төкті, олар да қанға айналды.

⁵ Сол кезде суға билік ететін періштенің былай деген лаусын естідім: -Құдай, Сен-әділеттісің, Сен-қазір де бар Құдайсың, Сен әуел бастан бар болдың, Сен киелісің, бұл сот-Сенің сотың, сондықтан Ол-әділетті.

⁶ Олар Сенің киелі халқыңның және пайғамбарлардың қанын аяусыз төкті, сондықтан Сен оларға қан ішкіздің, олар соған лайықты болды, - деді.

⁷ Сол сәтте құрбандық үстелінің жанынан шыққан дауыстың: -Иә, Жаратушы Құдай Ие, бүкіл әлемнің Билеушісі, Сенің сотың шынайы әрі әділ, -деп айтқанын естідім.

⁸ Төртінші періште барып, Құдайдың қаһарына толы тостағанды күнге төкті, күнге адамдарды күйдіретін мүмкіндік берілді.

⁹ Сонда аспан айналып жерге түскендей ыстық болып, күн адамдарды қызуымен күйдіре бастады. Адам төзгісіз, ми қайнатар ыстықта олар осы қасіреттің үстінен билік ететін Құдайға тіл тигізді. Құдайдың даңқын дәріптейтін мүмкіндіктері болса да, олар тәубеге келіп, теріс жолдарынан қайтпады.

¹⁰ Міне, бесінші періште барып, Құдайдың қаһарына толы тостағанды хайуанның тағының үстіне төкті, сонда оның тағын қараңғы түнек басты. Адамдар ауырсына қиналып, тістене ыңқылдады.

¹¹ Олар денелеріндегі жаралардан қатты азап шексе де, не тәубе етпеді, не өздерінің істерінен бас тартпады, керісінше, көктегі Құдайға тіл тигізді.

¹² Ал алтыншы періште Құдайдың қаһарына толы тостағанды Ефрат деген үлкен өзеннің үстіне төкті. Сонда оның суы тартылып, өзен құрғап қалды, себебі шығыс жақтан келетін патшаларға сол жақтан жол дайындау қажет болды.

¹³ Сонда мен айдаһардың аузынан, хайуанның аузынан және жалған сөйлейтін пайғамбардың да аузынан құрбақаға ұқсаған таза емес үш рухтың шыққанын көрдім.

¹⁴ Бұлар кереметтер жасайтын сайтанның рухтары болатын. Олардың негізгі мақсаты жер бетіндегі барлық патшаларға барып, басын біріктіріп, оларды ұлы күнге, яғни, бүкіл әлемнің билеушісі Құдаймен соғысатын күнге дайындау еді.

¹⁵ -Абай болыңдар! Мен ұры секілді аяқ астынан келемін! Өзінің ұятты жерін көрсетпей, жалаңаш жүрмей, киімдерін сақтап, сергек жүрген жан бақытты.

¹⁶ Сонымен, әлгі рухтар патшалардың басын қосып, оларды еврейше Армагедон деген жерге жинады.

¹⁷ Міне, жетінші періште Құдайдың қаһарына толы тостағанды ауаға шашып жіберді. Сол кезде Құдайдың көктегі үйіндегі тақтан: -Орындалды! -деген қатты дауыс шықты.

¹⁸ Сонда найзағай ойнап, дауыстар естіліп, күн күркіреп, күшті жер сілкінісі болды. Дәл мұндай алапат жер сілкінісі адам баласы жер бетін мекендеген кезден бері бұрын-соңды болған емес.

¹⁹ Жер сілкінісі кезінде Ұлы қала үшке бөлінді, басқа халықтар тұрып жатқан қалалар жермен жексен болып қирады. Осылайша ұлы Бабылдың іс-әрекетін есінде сақтап жүрген Құдай Өзінің қаһарына толы тостағандағы шараптан оған осылай ішкізді.

²⁰ Аралдар түгелдей жоғалып кетті, таулар тып -типыл болды.

²¹ Көктен адамдардың үстіне салмағы бір талант (27 кг) тартатын бұршақ жауды, бұл адамдарға үлкен қорқыныш әкелді, сол бұршақтан жарақат алған адамдар Құдайды тілдеді.