Аян 13 - Zhana Osiet

¹ Осыдан кейін мен бір хайуанның теңізден шығып келе жатқанын көрдім, әлгі хайуанның он мүйізі мен жеті басы бар екен. Оның он мүйізіне он патшалықтың тәжі киілген, оның басында Құдайды қорлайтын есімдер жазылған.

² Мен көрген хайуан қабыланға ұқсас болды, аяқтары аюдың аяқтарына, ал аузы арыстанның аузына ұқсас еді. Айдаһар әлгі хайуанға өзінің күші мен тағын ұсынып, оған үлкен билік берді.

³ Бірақ әлгі хайуанның жеті басының біреуінде оны өлімге жеткізетіндей жарақаты болды, бірақ сол жарақат тез арада жазылып кетті. Бұған жердегілердің бәрі таңтамаша болып, олардың бәрі әлгі хайуанның соңынан еріп кетті.

⁴ Сөйтіп, әлгі хайуанға билік берген айдаһарға барлығы тағзым етті. Содан олар хайуанның өзіне тағзым етіп: -Бұл хайуанға тең келетін кім бар? Кім оған қарсы шығып, онымен соғыса алады? - десті.

⁵ Сол хайуанға қырық екі ай бойы (тәкаппарлықпен) Құдайға тіл тигізіп, қорлайтын үлкен ауыз бен билік берілді.

⁶ Міне, содан бастап оның аузынан былапыт сөздер шықты, Құдайдың Өзін, Құдайдың есімін, Құдайдың мекенін және Құдаймен бірге көкте тұратын көктің тұрғындарын балағаттай бастады.

⁷ Оған Құдайдың киелі халқына қарсы соғысып, оларды жеңетін мүмкіндік және әрбір тайпалар мен халықтардың, әр түрлі тілдер мен нәсілдердің үстінен қарайтын билік берілді.

⁸ Сонымен, оған жер бетіндегі тұрғындардың бәрі құлшылық ете бастады, осы әлем жаратылғаннан бері кімнің есімі Тоқтының Өмір кітабына жазылған болса, солардан басқаның бәрі әлгі хайуанға тағзым етіп, соған табынады.

⁹ Құлағы барлар, жақсылап тыңдап алсын!

¹⁰ Егер кімге тұтқынға түсу тағайындалған болса, онда сол тұтқынға түседі, ал кімге семсерден өлу бұйырған болса, сол семсерден өледі. Міне, Құдайдың киелі халқына сенім мен табандылық осы кезде қажет болады.

¹¹ Осыдан кейін мен басқа бір хайуанның жерден шығып келе жатқанын көрдім. Оның басында қозынікіндей екі мүйізі болды, бірақ ол айдаһар сияқты сөйледі.

¹² Ол алғашқы хайуанның алдына барды да, оның да дәл сондай билігі барын көрсету үшін, жер бетінде тұрып жатқандардың бәрін өлімге әкелетін жарақатынан жылдам жазылып кеткен хайуанға табынуға мәжбүрледі.

¹³ Ол зор кереметтер жасап, әуелі, адамдардың көз алдында жанған отты көктен түсіреді.

¹⁴ Сөйтіп, ол алғашқы хайуанның алдында өзінің зор кереметтерін жасап, сол арқылы жердің барлық тұрғындарын алдап, оларды түгелдей жалған жолға түсіріп жібереді. Ол оларға семсердің жүзінен алған жарақатынан өліп, қайта тірілген хайуанның мүсінін жасауға бұйырып, оларды соған табынуға міжбүрледі.

¹⁵ Сол үшін оған алғашқы хайуанның жансыз мүсініне жан бітіретін рух берілді, сонда мүсінге жан бітіп, ол сөйлейтін болды. Ал кімде-кім алғашқы хайуанның мүсініне табынбайтын болса, солардың бәрі өлтірілді.

¹⁶ Ол үлкендер мен кішілердің, байлар мен кедейлердің, ерікті мен құлдардың әрқайсысына, олардың оң қолы мен маңдайларына мәжбүрлеп таңба салдырады.

¹⁷ Кімнің таңбасы болмаса, онда ол еш нәрсе сатып та, сата да алмайтын болады, ал сол таңбада хайуанның аты немесе оның атының саны көрсетілген.

¹⁸ Мұны түсіну үшін, даналық қажет! Кімде зерделі ақыл болса, сол хайуанның есіміне байланысты санды есептеп шығарсын, өйткені ол сан адаммен байланысты, ол сан-алты жүз алпыс алты.