Аян 1 - Zhana Osiet

¹ Құдай Өзінің құлдарына болашақта болатын жағдайларды аян арқылы ашып көрсеткісі келгендіктен, бұл аянды Құдай Иса Мәсіхке берген. Мәсіх періштесі арқылы Өзінің құлы Жоханға осы аянды ашып берді,

² ал Жохан Құдайдың сөзі туралы және Иса Мәсіхті көргені жайында куәлік береді.

³ Бұл пайғамбарлық сөзді оқып және тыңдап, онда жазылғанды есінде сақтап, соны орындайтын адам бақытты, себебі бұлардың орындалатын уақыты жақындап келеді.

⁴ Жохан Азия өлкесіндегі жеті қауымға былай дейді: қазіргі уақытта нақты бар және әуел бастан бар болған, болашақта да келетін, мәңгі Болатыннан әрі Оның тағының алдында тұрған жеті рухтан,

⁵ адал Куәгер атанып, өлімнен тірілгендердің ең Алғашқысы, жер бетіндегі патшалардың Патшасы Иса Мәсіхтен сендерге рақымдылық пен тыныштық тілеймін! Ол бізді сүйгендіктен, Өзінің қанымен күнәларымыздан тазартып, азат етті.

⁶ Ол бізді Өзінің Құдай Әкесінің Патшалығының қызметкерлері етіп тағайындады. Оның даңқы, Оның күшінің құдіреті ғасырдан ғасырға арта берсін! Аумин!

⁷ Біліп қойыңдар! Оның бұлттың үстімен келе жатқанын әркім көретін болады. Оны найзаның ұшымен түйрегендер де өз көздерімен көреді, сонда жер бетіндегі барлық *ұлттар Оның сол екенін танып, (өкініп) зар еңіреп жылайтын болады. Иә, бұл дәл солай болады! Аумин!

⁸ Мен -Альфа және Омегамын, -дейді Жаратушы Құдай Ием, -Мен әуел бастан бармын, Мен қазір де нақты бармын, болашақта келетін де, бүкіл әлемнің Билеушісі де мына - Мен!

⁹ Мен, Жохан -сендердің бауырластарың, сендерге сенімді серіктес бола жүріп, Құдайдың Патшалығы мен Иса үшін тартқан азапқа төзе білдім, сөйтіп, Құдайдың сөзі үшін, Иса туралы айтқан куәліктерім үшін, Патмос аралына жер аударылдым.

¹⁰ Иеміздің жетегімен жүрген күндердің бірінде мен Рухқа бөлендім, сонда мен арт жағымнан кернейдің даусына ұқсас қатты бір дауысты естідім.

¹¹ Ол маған: -Көзіңмен көрген мына көріністерді кітапқа жазып, жеті қауымға: Ефеске, Ізмірге, Перғамға, Тиятирге, Сардқа, Філаделфіге және Лаодікиге жібер, - деді.

¹² Маған сөйлеген дауыстың кім екенін білейін деп, мен артыма бұрылдым, қараған кезде жеті алтын шырағданды көрдім.

¹³ Сол шырағдандардың ортасында үстіне киген киімі өкшесіне дейін түскен, ал кеудесін алтын белдікпен буынған Адам Ұлына ұқсас Біреудің тұрғанын көрдім.

¹⁴ Оның басындағы шашы жуылған жүн сияқты және қардай аппақ еді, ал Оның көздері жанған оттай жалындап тұрды,

¹⁵ Оның аяқтары Ливанның пеште балқытылған мысындай болса, Оның даусы сарқыраманың гүріліне ұқсас болды.

¹⁶ Ол оң қолына жеті жұлдыз ұстап тұрды, ал Оның аузынан екі жүзді өткір семсер шығып тұрды, Оның бет -жүзі барша жарығын шашқан күн сияқты еді.

¹⁷ Мен Оны көрген сәтте, Оның аяғына жығылып, өлген кісідей алдына құлап түстім. Сол кезде Ол Өзінің оң қолын менің үстіме қойды да: -Қорықпа, Алғашқы да, Ақырғы да Мен боламын.

¹⁸ Мен -тірімін! Мен өлген едім, енді, міне, мәңгілікке тірілдім! Өлімнің де, тозақтың да кілті Менің қолымда!

¹⁹ Сондықтан сен көргеніңді, қазір болып жатқанды, осыдан кейін де болатын жағдайлар туралы жаз.

²⁰ Менің оң қолымдағы сен көрген жеті жұлдыз бен алтын жеті шырағданның құпиясы мынадай: жеті жұлдыз жеті қауымның періштелерін, ал жеті шырағдан жеті қауымды білдіреді, - деді.