Filɛmɔ 1 - Zimba Nouveau Testament Portions

Kwinokea

¹ Mee Paɔlɔ, oe mo kekako ko mbanga ya Kilisito Yɛsu, natukunya ona mokanda kɔmɔɔsa na Timɔtɛɔ mobotwa niito. Tutukukunyea awɛ Filɛmɔ, ngondwa yiito ne sambe niito we meemo,

² ne kanisa katuumbana mo ndabo yao, ne motamba wiito Apia na Alikipo, utuchiana niito bita kɔmɔɔsa.

³ Tɔtɔbaɛngɛɛa lokwa ne nyaa kotoka kwa Isito Kakua ne Mwaame wiito Yɛsu Kilisito.

Kokonda ne nyaa ya Filɛmɔ

⁴ Natoseka Kakua waanɛ masu masɛ ingɛ nasokoeyoka awɛ Filɛmɔ mu kwiyaya kwanɛ.

⁵ Kɔmɔa natuungwa botokoseka abɔ ku kwimenya Mwaame Yɛsu, ne bwaanga awɛ kokonda bando basɛ ba Kakua.

⁶ Nae mɔ kɔɛngɛa Kakua itɛ lea isamba lee niito koetea iekekeo lito, lekokwase kocheba maachi masɛ maanga niito mo koongwa kwito amɔɔsa na Kilisito.

⁷ Mobotwa naanɛ, koa kokonda kwao kuusukua bando ba Kakua kokonja bɔkɛtɛ. Nɛ kɔ bɔbɔ naswimɛma byabua ne koyobea.

Paɔlɔ osoachea Ɔnɛsimɔ

⁸ Ko bobo, koetea isamba lee niito na Kilisito, nae nɛ bɔkɛtɛ bwe kokosaolea letowaena awɛ koketa.

⁹ Naa nɛ bɔbɔ, kwiyaya ne kotokonda mee kwiyaya koetea kokondana koe niito. Mee Paɔlɔ natae mununu, ne kabee natae mo kekako kombanga ya Yɛsu Kilisito.

¹⁰ Natwiyaya ko mbanga yee mwana waanɛ Ɔnɛsimɔ, obotee mee mu iekekeo abɛɛ mee mo kekako.

¹¹ Kaɛ kaɛ awɛ ndakoketea keemo, mo leno otakoketee awɛ na mee bwakaɛ.

¹² Bono, nasɔkɔɔtɔsɛa awɛ; oe ne boe ibae lyanɛ mee mwɛɛnɛ.

¹³ Ningakonda Ɔnɛsimɔ otachikae naanɛ amɔsa ko kongwasa a iboa lyao akee mee mo kekako ko mbanga yee kosaola Ilɔngɔ Lyaachi.

¹⁴ Sakonda koketa keemo kɛsɛ ketaasi awɛ kokonda. Ɔbɛɛ sakonda kukusukua kongetea byaachi, ningakonda biketeke ko kokonda kwao awɛ mwɛɛnɛ.

¹⁵ Kende Ɔnɛsimɔ otangee kosambokana nao ne ko masu makɛɛkɛ, kɔmɔa uchikae naakɛ masu masɛ.

¹⁶ Ko leno, awɛ ndaekee kabee moocha ikɛɛsa, otae mondo we kobaelwa koeta moocha; kɔmɔa otae ngondwa. Mee natomokonda byatɔba; naa ne awɛ otamokonde byatɔba koeta. otamokonde bwe mondo, kabee bwe mobotwa niito monda mwa Mwaame.

¹⁷ Ko bobo, ingɛ okee mo kombaela bwe sambe nao, mɔsɛkɛɛla bunganjɛkɛɛla awɛ mee mwɛɛnɛ.

¹⁸ Ne kende okoketee bwabea, ɔbɛɛ oe ne ilɛni lyao le keemo kɛsɛ, nɛngɛa mee.

¹⁹ Mee Paɔlɔ, mee ne usukunya mama makomo nɛ kɔ kɔbɔkɔ kwanɛ: Ndakuute. (Naanga nɛ bɔbɔ natokoeyoa itɛ awɛ oe ne ilɛni kwanɛ, na lea ilɛni nɛ mwɛchɔ wao).

²⁰ Mobotwa naanɛ, natwiyaya kwao, ngwasa ko eena njea ko mbanga ya Mwaame, kɔ kɔngɔbɔa motema boe mobotwa naanɛ monda mwa Kilisito

²¹ Atukunya mee, natobaela itɛ otanungwe ne koketa koeta byakosaolea mee.

²² kabee, natwiyaya, njangyea bwakaɛ iboa letakyɛsɛaye mee, kɔmɔa natobaela itɛ koetea kwiyaya kwinu Kakua otangɔtɔsɛ kabee kwinu.

Kolaana

²³ Epafula wakakiwa naanɛ ko mbanga ya Yɛsu Kilisito utukwinokea.

²⁴ Bwakaɛ bwakaɛ Malikɔ, na Alisitalikɔ, na Lɛma na Luka, banjiniito ne meemo nabɔ, batukwinokea.

²⁵ Lokwa lwa Mwaame Yɛsu Kilisito loongwe niinu.