Malikɔ 9 - Zimba Nouveau Testament Portions1 Yɛsu na kobasaolea: «Kiinɛkinɛ kiinɛ na tobasaolea, ko baanu bae ana, bamɔ baakakwe baana baanamɔa boombe bwa Kakua botabaake ne bɔkɛtɛ.» Yɛsu usutuuka lulungi ( Mat 17:1-13 ; Luk 9:28-36 ) 2 Kusia masu motoba, Yɛsu na koenda Pɛtɛlɔ, Yakɔbɔ na Yɔana na kwisɔka mo nganda mwe keembe. Awɛ na kutuuluka luungi kombaa kwabɔ, 3 ngubɔ chaakɛ na kɔkɛnya, ne koama tɔɔ, naanga ne mondo ɔmɔɔsa ndakasɛngɛ ngubɔ ya ama boa. 4 Ɛlia na Musa na kobaolea; baɔchaya na Yɛsu. 5 Pɛtɛlɔ na kosaola Yɛsu: «Mweyechi, biitowaena ne bae kuchikaa ana; toaboke bitanda bisato, kɛmɔ kyao, kikinɛ kya Musa, kikinɛ kya Ɛlia.» 6 Ndachebaya kabee bye kɔɔcha kɔmɔa wabɛchaya usuungwa bɔɔba. 7 Ikongo kwika na kobabwekea ne chuuki letoola mwikongo: «Oona ne Mwaana waanɛ ngondwa yaanɛ. muungwe chuuki lyaakɛ!» 8 Akaɛ alya, kɔlɔla mɔsɛɛsɛ mwabɔ ndebamɔa kabee mondo, Yɛsu ikɛɛsa na ososaa naabɔ. 9 Abɔ mu kwika keembe, awɛ na kobasaolea baɔchaya lea ikomo ko mondo lɛmɔɛchi abɔ, ɛka alya ataubuke Mwaana we Mondo kotoka ko bakwo. 10 Basɛ na kuungwa lea ikomo, ne basɛ bae mukwibocha «kuubuka ko bakwo». 11 Abɔ na komobocha: «Ko booni bakunyi be Salia batɔɔcha itɛ Ɛlia ne otowaena kɔɔtɔka kombaa?» 12 Awɛ na kobasaolea: «Kiinɛkinɛ, Ɛlia otatabaka kombaa ne koongoseka biisɛ, chɔ booni butukunyiwa itɛ Mwaana we Mondo otamɔɛ manɛnɛ mabua ne kɔnyɛkwa? 13 Natomosaolea, Ɛlia obee bamoketee biisɛ bikondee abɔ, ko boa butukunyiwa kombanga yaakɛ.» Kooloka kwe mwaana kabɛchaya ne isombo lye kaluma ( Mat 17:14-21 ; Luk 9:37-43a ) 14 Mɔ kɔɔtɔka ko baeyechwa, na kɔmɔa ketongo kye bando kesobakombea ne bakunyi be Salia bae mo koangechana naabɔ. 15 Amɔa abɔ Yɛsu, ketongo kɛsɛ na kokanakana na koya mbeo kwa mwinokee. 16 Awɛ na kobabocha: «Bike bitoangechana baanu nabɔ?» 17 Ɔmɔ mo elya ndongo na kɔɔcha: «Mwaame, nasokobea ne mwaana waanɛ: oe ne isombo le kauma. 18 Kɔsɛ kutumubunda alyo, na lesomokecha, ne luulu losomoola, ne kwinya ngyɛɛkɛtɔ ne lɔkɔba losokanganyaa. Na saolee baeyechwa bao balilikite, ndebaba nɛ bɔkɛtɛ.» 19 Yɛsu na kɔɔcha: «Ibota letaasi kotena Kakua, ndamoende ɛka ani? Mombee naakɛ.» 20 Abɔ na komoyea naakɛ. Amɔa awɛ Yɛsu, Isombo na komolwacha kasaolelwa; na komokecha ase, ne otae kukunya ne koocha luulu. 21 Yɛsu na kɔɛngɛa kwa Kakua: «Lee ikomo lesoketa masu?» Awɛ na kɔɔcha: «Byabangoa ne okee mwamɔtɔ. 22 Isombo lemokosoaye kotoya, lukinɛ mo maache kokoenga kumuchia. Alakini kende otaɔsɔnɛ koketa keemo kwe awɛ, tokwea lokwa, tɔɛbɔa.» 23 Yɛsu na kɔɔcha: «Kende otokonda! Biisɛ bitɔɔsɔnɛka ko olya oe ne Iekekeo.» 24 Akaɛ alya isa mwaana na kokandoka «Naswimenya! Ngwasa kɔkɛna iekekeo kwaanɛ!» 25 Yɛsu kɔmɔa ketongo kesokumbakana, na kokandokea Isombo: «Isombo le kauma, nasokosaolea, oola mo oona mwaana ne ndɛɛkɔɔtɔka kabee!» 26 Isombo na koola mu kumuchingya ne myabo. Mwaana ne koya kebai, keemo kyaɔcha bando itɛ: «Osokwa.» 27 Alakini Yɛsu na kumubunda ko mesani, mwaana kobyoka na kotamaoka. 28 Aɔtɔka Yɛsu ko ndabo, baeyechwa bakɛ na komobocha kwɛwɛ ikɛɛsa: «Ko eke kotaasi bae nditwaɔsɔna kulikita lea Isombo?» 29 Awɛ na kobasaolea: «Isombo lye boa, kuusi kɛtaɔsɔnɛ koleocha, kende, nde koetea kwiyaya.» Yɛsu ɔsɔɛbɛcha kokwa kwakɛ ( Mat 17:22-23 ; Luk 9:43b-45 ) 30 Koola alya, na koetea ko Kalilaya Yɛsu ndakondaya bamochebe. 31 Kɔmɔa wa eyechaya baeyechwa bakɛ ne kobasaolea: «Mwaana we Mondo otaochiwe mo mesani yee bando; batamuchie, kusia kokwa, otaubuke monda mwe masu masato.» 32 Alakini ndebafandakanya lɛɔ ikomo ne batotenaya komobocha. Naani otaongwe mokoo ( Mat 18:1-5 ; Luk 9:46-48 ) 33 Na batoya Kapɛlɛnaumu. koolea ko ndabo, Yɛsu na kobabocha: «Bike bitoangechana baanu mo njea?» 34 Basɛ na konyamea, kɔmɔa mo njea baɔndɔana mo koenga kocheba naani otaongwe mokoo waabɔ. 35 Yɛsu kuchikaa na kwitana baa ikumi na babee; awɛ na kobasaolea: «Kende mondo osokonda koongwa we kombaa, uibeke kɔmɔngɔ kwe basɛ ne kobakambea meemo.» 36 Koenda mwaana mɔkɛɛkɛ, na komobeka mwingya mwabɔ, kusia kumukukutea, na kobasaolea: 37 «Ɔɔsɛ otasɛkɛɛlɛ mwaana bwe oona ku chiina lyanɛ. Ɔnjɛkɛlɛɛ mee mwɛɛnɛ; ɔɔsɛ ɔtɔnjɛkɛɛla ndatonjɛkɛɛla mee ikɛɛsa alakini ɔtɔsɛkɛɛla na olya wa wandoma.» Isamba mo kokambea Kakua ( Luk 9:49-50 ) 38 Yɔana na kɔɔcha: «Mweyechi, tɔsɔmɔa ɔmɔ oe mu kulikita masombo mu chiina lyao toengee komokangea kɔmɔa ndaasi we ketongo kiito.» 39 Alakini Yɛsu na kɔɔcha: «Ndakomokandea, kɔmɔa, kuusi mondo otakete molendo mu chiina lyanɛ, koko ne oe mɔ kɔmbɔchɛa byabea. 40 Olya otaasi moangani niito oe kombanga yiito. 41 Ɔɔsɛ ɔtamɔɛchɛ maache mɛ kɔsɔa ku chiina lyanɛ, kiinɛkinɛ natomosaolea, ndakaene sebo.» Mwilɔlɛ ne bwabea ( Mat 18:6-9 ; Luk 17:1-2 ) 42 «Ɔɔsɛ otakechekye naanga ne ɔmɔɔsa ko baba bakɛɛkɛ bae ne Iekekeo, biitowaena ne komokaka iwɛ lekatala mu ngingo ne komokosoa mu kichibachiba. 43 Kende kɔ kɔbɔkɔ lyao lisukwingesha mo bwabea, lɛbɛmba; bie bwaachi uingee ne kɛɛma mo mwɛchɔ we meombo, kotasi kwingea ne mabɔkɔ mabee mo toya twe meombo, totaasi kuchima 44 [Moa moe tuchimo totaasi totokwa ne toya twe meombo.] 45 Kende moende wao usukuingecha mo bwabea, mɔbɛmba; bie bwaachi kwingea mo mwɛchɔ we meombo ne kɛɛma, kotasi kwingea ne meende ebee mo toya twe meombo. [ 46 Moa moe tuchimo totaasi totokwa ne toya twe meombo.] 47 Kende liisɔ lyao lisukwingecha ko bwabea, lɛfɔkɔa; bie bwaachi kwingea nɛ kɛtɔnɛ mo mwɛchɔ we moombo, kotaasi kwingea ne miisɔ mambee mo toya twe meombo, 48 Moa moe tuchimo totaasi totokwa ne toya twe meombo 49 Kɔmɔa mondo ɔɔsɛ otatɛbwɛ musiki mo toya twe meombo. 50 Musiki ne keemo kyaachi. Alakini kende musiki usuchimbecha itɛɛtɛ lyawo, bike bitatɛbwɛ amo kɔmɔa ɔtɔbɛ? Moongwe ne musiki monda mwiinu ne koongwa nyaa mwingya mwiinu.» |
©2022 Seed Company in coordination with Forum Communautaire des Traducteurs de la Bible et Alphabétisation
The Seed Company