Malikɔ 6 - Zimba Nouveau Testament Portions

Bando be Nasalɛti baɔkɔna Yɛsu

¹ Yɛsu na kotoka koa, awɛ na koya ko kalya kaakɛ ke koboteka, baeyechwa bakɛ na komoyea.

² Aolea lusu lwe sabatɔ, awɛ na kobangoa koeyecha mu sinakɔki. Bando babua bamwiyungweechaya, na kokanakana byabua ne kobangoa kobochana: «Ona osokonja lokani lwebobo kwa naani? Na ena melendo etoketa awɛ osokonja bɔkɛtɛ bwe ko komeketa kotokea koni?

³ Ona ndaasi olya otokamba meemo yee mbao, mwaana wa Malia, mobotwa naakɛ na Yakɔbɔ, na Yɔsɛ, na Yula na Simɔni? Ne metamba yaakɛ eesi ena ituchikaa niito amɔsa?» Kɔ bɔbɔ abɔ na koena kumwimenya.

⁴ Kɔ bɔbɔ Yɛsu na kobasaolea: «Ndɛnda ya Kakua ɛtɔnyɛmiwa kɔɔsɛ, kotosa kalya kakɛ ke koboteka, ne mwingya mwe babotwa naakɛ ne nɔngɔ yaakɛ.»

⁵ Kɔ bɔbɔ Yɛsu ndaɔsɔna koketa koa kisinga naanɛ kɛmɔ, kotosea abekea awɛ balwachi bakɛɛkɛ kɔ kɔbɔkɔ na kobaolola.

⁶ Awɛ na kokanakana byabua kɔmɔa botaasi baa bando ndebaimenya. Kɔmɔngɔ Yɛsu na kochomba chumba mo tolya twɛ mɔsɛɛsɛ mo kweyecha.

Yɛsu osotoma baeyechwa ikumi na babee

⁷ Yɛsu na kwitana Ndomwa bakɛ ikumi na babee na kobatoma babee babee. Na kɔbaɛcha bɔkɛtɛ bye kulikita masombo.

^8-9 Na kobalaa: «Mɔ lwɛndɔ lwinu mochaaya naa nɛ kɛmɔ boe biewa bye koolea mo njea, ɔbɛɛ mosao, ɔbɛɛ tombaambaa, ɔbɛɛ ikinɛ yee kowaa. Alakini ngɔma yɛ kɔɛndɛa ikɛɛsa ne mowae ne bilato.»

¹⁰ Na kobasaolea kabee: «Asɛ atabasɛkɛɛ abɔ mo ndabo, muchikae amo ne botaole banu a lea iboa.

¹¹ Ne asɛ atakɔnɛ abɔ kobasɛkɛa ɔbɛɛ kobaungwa, motoke koa alakini mobakukuele kausi katabunde ko meende yiinu. Ikomo lee letaongwe kisinga kinu ko mbanga yaabɔ.»

¹² Ko boa, ndomwa na kotoka, na koya mo koeyecha bando itɛ batuuke kotoka ko bwabea bwabɔ.

¹³ Balikitaya masombo mabua, na kulisa balwachi babua makuta na kobaolola.

Kokwa kwa Yɔana Mobatisi

¹⁴ Nombe Ɛlɔlɛ na kuungwa malɔngɔ ma Yɛsu, kɔmɔa chiina lyaakɛ lyaekaya kɔsɛ. Bamɔ bando na kobangoa kɔɔcha: «Ona ne Yɔana Utuina mbuu waubuka! Ne ko bobo kookonja awɛ bɔkɛtɛ bwe koketa melendu.»

¹⁵ Alakini bakinɛ na kobangoa kɔɔcha: «Ona ne ndɛnda ya Kakua Ɛlia.» Bakinɛ na kobangoa kɔɔcha: «Ona nɛ ndɛnda ya Kakua boe ɔmɔ wɛ ndɛnda che kaɛ.»

¹⁶ Alakini aungwa Ɛlɔlɛ mamɔ malɔngɔ, awɛ na kɔɔcha: «Oe na olya Yɔana Mobatisi ɔbɛmbɛkyɛɛ mee motwe ne osuubuka!»

¹⁷ Ɛlɔlɛ ɔɔchɛɛ bobo kɔ kɔmɔa awɛ ikɛɛsa ne osaolee bando itɛ babunde Yɔana, bamokake nɛ mɛyɔɔ ne bamokosoe mo kekako. Ɛlɔlɛ waketa bɔbɔ kɔ kɔmɔa bwatomba Ɛlɔlia mokachi wa Filipɔ. Koko ne ona Filipɔ wabɛa ne mobotwa naakɛ na Ɛlɔlɛ.

¹⁸ Yɔana wabɛchaya mo komoana itɛ: «Ndoosi ne sambo yee kotomba mokachi we mobotwa nao!»

¹⁹ Kɔ bɔbɔ Ɛlɔlia na kobekea Yɔana mɔsɔna na kokonda kumuchiekya, alakini ndaɔsɔna,

²⁰ Kɔ kɔmɔa Ɛlɔlɛ watenaya Yɔana. Kabee wachebaya itɛ Yɔana wabɛchaya we kiinɛkinɛ kombaa kwa Kakua, kabee wa ama. Ko bobo awɛ na komokongoseka. Kabee wakondaya kwiungweecha makomo ma Yɔana ɔbɛɛ mabɛchaya mo komochombya lokani.

²¹ Lɔmɔ lusu Ɛlɔlia wakonja kyanya kye kuchiekya Yɔana. Lɔɔ lusu lwaba ne lwe koeyoka koboteka kwa Ɛlɔlɛ. Ko bobo, Ɛlɔlɛ na kosangya ketokoyoo. Awɛ na kwitana basangi be boombe bwakɛ ne bakoo be bakɔlɔbɔyɔ, ne bakoo bɛ mɔsɛngɛ we Kalilaya.

²² Abɛchaya abɔ mo ketokoyoo, katombe ka Ɛlɔlia waingea ne kobangoa kokacha. Kɔɔ kokacha kwakɛ kwamɛmɛkya Ɛlɔlɛ ne baitana awɛ. Kɔ bɔbɔ nombe na kosaolea kaa katombe: «Nɛngɛa kɛsɛ ketokonda awɛ nakɔɛchɛ.»

²³ Kusia Ɛlɔlɛ na kɔsɔa kɛsɔlwa na komosaolea: «Nakɔɛchɛ kɛsɛ kɛtanɛngɛɛ awɛ, naa ne keba kye boombe bwaanɛ.»

²⁴ Ko boa, kaa katombe na kotoka, na koya kwɛngɛa iyani kwa inakɛ: «Inanɛ, naɛngɛa eke?» Inakɛ na komosaolea: «Ɛngɛa ne motwe wa Yɔana Utuina mbuu.»

²⁵ Akaɛ alya kaa katombe na kɔɔtɔka lobeo kwa nombe na komosaolea: «Natɔɛngɛa ano ano mbɛɛcha mɔ mbɛɛ motwe wa Yɔana Mobatisi.»

²⁶ Aungwa nombe bɔbɔ, awɛ na koemoka byabua. Alakini kɔmɔa waba ne uusia kɔsɔa kɛsɔlwa kombaa kwe baitana awɛ, awɛ na koomaa kɔkɔna lea ikomo.

²⁷ Akaɛ alya nombe na kotoma ɔmɔ ko bakɔlɔbɔyɔ bakɛ basangi na komosaolea oyake kwaende motwe wa Yɔana Mobatisi. Olya kɔlɔbɔyɔ na koyaka mo kekako, na kɔbɛmba Yɔana motwe.

²⁸ Kusia, na komobesa mɔ mbɛɛ, na awɛ na kɔɛcha kaa katombe, na akɔ na kɔmwɛcha inakɛ.

²⁹ Aungwa baeyechwa ba Yɔana lɛlyɔ ilɔngɔ, abɔ na koya kwaende ketomba kyaakɛ na kokecheka.

Yɛsu ɔsɔɛbɛkya tununu totanu twe bando

³⁰ Aɔtɔka ndomwa cha Yɛsu a iboa lyabɛchaya awɛ; na komosimbokecha makomo masɛ maketa abɔ ne maeyechi masɛ maeyecha abɔ.

³¹ Bando babua bamoolelea Yɛsu kwingea ne koola, awɛ ne ndomwa chaakɛ na koena naa ne kyanya kye kolya. Ko bobo awɛ na kosaolea Ndomwa chaakɛ: «Toyakɛ a iboa ataasi bando kɔmɔa mubunde mbomo.»

³² Kɔ bɔbɔ abɔ na koyaka ikɛɛsa monda mwe bwato a iboa letaasi bando.

³³ Alakini bando babua babamɔa atoka abɔ na kocheba kotoya abɔ. Kɔ bɔbɔ abɔ koola motolya tɔɔsɛ, ne koya lobeo ne meende kwabɛchaya Yɛsu mo koya ne ndomwa chaakɛ. Baa bando na koolea koa kombaa kwe Yɛsu ne ndomwa chaakɛ.

³⁴ Aika Yɛsu mo boato, na kɔmɔa elya ndongo yee bando, awɛ na kobaungwea lokwa, kɔmɔa babɛchaya boe mɛkɔkɔ etaasi ne mosangi. Awɛ na kobangoa kobaeyecha makomo byabua.

³⁵ Aolea kyɔlwa, baeyechwa ba Yɛsu na komobea na komosaolea: «Ana ae ne iboa letaasi bando, kabee ketae kyɔlwa.

³⁶ Ko bobo batoma baba bando bayake ko masio ne kubitanda bye mɔsɛɛsɛ, bayaiolea byekolya.»

³⁷ Yɛsu na kobasaolea: «Banu bɛɛnɛ mobaɛchɛ byekolya.» Alakini, abɔ na komobocha: «Otokonda toye kwaole mikati kwibɛi lye bingɔlɔngɔlɔ ngama chibee bye tombaambaa?»

³⁸ Yɛsu na kobabocha: «Moe ne mikati engaa? Motaye kwalɔlɛ.» Acheba abɔ, na komosaolea: «Toe ne mikati etanu ne tɔmwɛa tobee bokata!»

³⁹ Ko boa Yɛsu na kosaolea baeyechwa bakɛ itɛ basaolee bando basɛ bachikane ase bitongo bitongo mu bisɛsi.

⁴⁰ Bando na kuchikaa bitongo bye bando lokama lokama, ne bitongo bye bando makumi matanu matanu.

⁴¹ Kusia Yɛsu na koenda elya mikati etanu na toa tɔmwɛa tobee, na kɔlɔla kwiyoo, awɛ na koseka Kakua. Awɛ na kubuka elya mikati ne kɔɛcha baeyechwa bakɛ baabanyee bando basɛ.

⁴² Basɛ na kolya na koemboka.

⁴³ Kusia baeyechwa na kɔtɔatɔa byunda byasaela, na kochekya bimbaka ikumi na bibee.

⁴⁴ Ko basɛ balya bia biewa, babaome ikɛɛsa babɛchaya tonunu totanu.

Yɛsu ɔsɔɛmda konganda kwe maache

⁴⁵ Akaɛ alya Yɛsu na kosaolea baeyechwa bakɛ bakobee mo bwato ne kumwiyambea ikinɛ nganda yee kichibachiba kye Kalilaya, kombanga yee kalya ke Bɛtɛsaila. Ko kea kyanya awɛ wasaa mo kolaa elya ndongo yee bando.

⁴⁶ Kusia kobalaa, awɛ na koya ko keembe kwaiyaye.

⁴⁷ Aingea ikunyɛ, bwato bwabɛchaya bosoolea mwingya mwe kichibachiba, alakini Yɛsu awɛ wabɛchaya ikɛɛsa mo nganda.

⁴⁸ Wamɔna baeyechwa bakɛ basɔkɔɛka ne kɔɛnja bwato kɔmɔa lɔɔbɛ lwabɛchaya mo kobaɔtɔa kɔmɔngɔ. Abɛchaya butu bungakya, Yɛsu na kolelea oe mɔ kɔɛnda konganda kwe maache, awɛ na koenga kobaeta.

⁴⁹ Ne amɔmɔa abɔ oe mɔ kɔɛnda konganda mwe maache, abɔ na kuninga itɛ oe ne kesemboelwa, abɔ na kobangoa kokandoka,

⁵⁰ kɔmɔa basɛ amɔmɔa abɔ na kuungwa bɔɔba bwabua. Alakini akaɛ alya Yɛsu na kobasaolea: «Mwitɛchɛ metema! Mee na oono! Mootenaya!»

⁵¹ Kɔmɔngɔ awɛ na kwingea mo bwato mwabɛchaya abɔ, lɔbɛ na konyamea. Kɔ bɔbɔ baeyechwa na kokanakana byabua,

⁵² kɔmɔa ndebacheba bitɔɔcha kea kisinga kye kubucha mikati, kɔmɔa metema yaabɔ yabɛchaya ne kokoba.

Yɛsu osoolola balwachi mo kalya ke Kɛnɛsalɛti

⁵³ Aaboka Yɛsu ne baeyechwa bakɛ kichibachiba, na koolea mɔ mɔsɛngɛ wɛ Kɛnɛsalɛti, na kɔɛyɛka bwato kɔ mɔkɔngɛ.

⁵⁴ Aola abɔ mo bwato, akaɛ alya bando na kocheba Yɛsu.

⁵⁵ Ko boa, bando na koeta lobeo mo olya mɔsɛngɛ ɔɔsɛ kɔmɔa bamobeseaye balwachi bachaiwaya mo mesange, na komoolelea Yɛsu asɛ aungwa abɔ itɛ ɔlɛɔ.

⁵⁶ Ne kɔ lɛsɛ iboa ayaka Yɛsu, motolya ne mesomba ɔbɛɛ mo masio, bando babeka balwachi babɔ mo byambaa bye mosangano, kɔmɔa obaolole. Baba balwachi na koongwa mukwiyaya itɛ uimenye bakɔkɔbɔchɛɛ kɔ lwɛmba lwe kanjo yaakɛ. Ne basɛ bamɛkɔbɔchaya babɛchaya mo kooloka.