Malikɔ 3 - Zimba Nouveau Testament Portions

Yɛsu osoolola mondo lusu lwe sabatɔ

¹ Kɔmɔngɔ kwe bɔbɔ Yɛsu waingea kabee mu sinakɔki. Moa mwabɛchaya mondo wɛ kɔbɔkɔ lyɛ ɛlɛɛlɛ.

² Bando babechaya monda na kɔlɔla Yɛsu kwe kumusingeecha bamɔɛ ingɛ otaolole olya mondo lusu lwe sabatɔ, kɔmɔa bakonje kɛɛyameo kye komotaeka ko nganya.

³ Yɛsu na kosaolea olya mondo we kɔ kɔbɔkɔ le ɛlɛɛlɛ: «Taoka mwingya bando.»

⁴ Kusia Yɛsu na kobabocha baa bando itɛ: «Salia yiito etotosaolea tokete eke lusu lwe sabatɔ? Koketa bwaachi ɔbɛɛ bwabea? Koolola mondo ɔbɛɛ kumuchia?» Baa bando na konyamea.

⁵ Yɛsu na kobabakya miisɔ ne moemo mo kochabwa ko kokoba kwe metema yaabɔ. Kɔ bɔbɔ awɛ na kosaolea olya mondo: «Ɔnɔnɛka chanja lyao.» Awɛ na kɔlɛɔnɔnɛka, akaɛ alya alyo na kooloka.

⁶ Akaɛ alya Bafalisayɔ na koola anjɛ na koya kwaumbane ne bando ba Ɛlɔlɛ ko kubunda lwango lwe kuchia Yɛsu.

Ndongo ya bua yee bando esoba kwamɔɛ Yɛsu

⁷ Yɛsu ne baeyechwa bakɛ na koola alya abɔ ikɛɛsa na koya mɔ mɔkɔngɛ we kichibachiba kye Kalilaya. Ndongo ya bua yee bando na komoyea. Baa bando batoka kɔ mɛsɛngɛ yee Kalilaya ne Yulɛa.

⁸ Bakinɛ batokea ko mosomba we Yɛlusalɛma, nɛ mɔsɛngɛ we Ilumɛa, nɛ kɔ mɛsɛngɛ ikinɛ mbanga yee looche lwe Yɔlɔlani, nɛ mɛsɛngɛ ee mɔsɛɛsɛ mwe tolya twe Tilɔ ne Silɔna. Babaaka ndongo kwa Yɛsu kɔmɔa baungwa biisɛ byaketaya awɛ.

⁹ Ku bwise, Yɛsu na kosaolea baeyechwa bakɛ bamosangyee ketange kɛkɛɛkɛ bando baba mu kumukungunyeka.

¹⁰ Waɔcha bɔbɔ kɔmɔa waolola bando babua. Bolwachi basɛ babɛchaya mu kusukuana kokoenga baolee a iboa abɛchaya Yɛsu bamɔkɔbɔchɛ.

¹¹ Ne babɛchaya ne masombo amɔa abɔ, abɔ na kwikosoa mo meende yaakɛ mo kokandoka itɛ: «Awɛ ne Mwaana wa Kakua!»

¹² Alakini Yɛsu na kobakandokea itɛ bamochebekyaya ko bando.

Yɛsu ɔɔsɔbɔa ndomwa ikumi ne babee

¹³ Kusia Yɛsu na konena ko keembe, awɛ na kwitana bando bakonda awɛ mwɛɛnɛ, abɔ na koolea a iboa lyabɛchaya awɛ.

¹⁴ Aolea abɔ, awɛ na kɔsɔbɔa asambea abɔ, ikumi ne babee. Na kobaitana ndomwa. Waketa bɔbɔ kɔmɔa baongwe bakɛ ne obatome kwasaole Ilɔngɔ Lyaachi ko bando.

¹⁵ Kabee na kɔbaɛbɛcha bɔkɛtɛ bwe kulikita masombo.

¹⁶ Baa ikumi ne babee basɔbɔa awɛ na baba: Simɔni (waɛcha Yɛsu itambo lye Pɛtɛlɔ)

¹⁷ na Yakɔbɔ ne mobotwa naakɛ Yɔana. Baa babee babɛchaya baana ba Sɛbɛlayɔ (baba ne baɛcha Yɛsu itambo lye Boanɛlɛkɛ, nɛ kɔɔcha kaanga ke ngoba)

¹⁸ na Andele na Filipɔ, na Balatimayɔ, na Matayɔ, na Tɔmasi, na Yakɔbɔ mwaana wa Alufayɔ, na Talɛɔ, na Simɔni we ndongo yee Basɛlɔti,

¹⁹ na Yula Isikaliɔta, olya walamboa Yɛsu.

Babotwa naakɛ na Yɛsu basoya kwa moende

²⁰ Kusia Yɛsu na kɔɔtɔka mo ndabo. Ndongo yee bando na komoyea kabee, ndekwaba kyaanya kye Yɛsu ne baeyechwa bakɛ kokonja kyaanya kye abɔ kolya?

²¹ Kɔmɔa boa, babotwa naakɛ na koba kwa moende, kɔmɔa bacheba itɛ osochimbecha lokani.

Baeyechi be Salia batwitana Yɛsu itɛ Bɛlɛsɛbulu

²² Baeyechi be Salia batoka mo mosomba we Yɛlusalɛma na kɔɔcha bobo ko mbanga ya Yɛsu: «Ona osonyaiwa na Bɛlɛsɛbulu, kabee abɔ na kɔɔcha itɛ ona Bɛlɛsɛbulu ne mokoo we masombo, nɛ kɔ bɔkɛtɛ bwakɛ ne kulikita Yɛsu masombo.»

²³ Kɔ bɔbɔ Yɛsu na kobaitana na kobasaolea mu bisimo: «Isombo lɛtaɔsɔnɛ kwilikita alyo lyɛɛnɛ?

²⁴ Ingɛ bando be boombe bɔmɔɔsa bataekuchiana abɔ bɛɛnɛ na bɛɛnɛ, nɛ kɔɔcha itɛ boa boombe bookea.

²⁵ Ne kende bando be nɔngɔ ɛmɔsa baswaɔndɔa abɔ bɛɛnɛ na bɛɛnɛ, nɛ kɔɔcha itɛ elya nɔngɔ eokea.

²⁶ Ko bobo, kende Isombo lɛsɔɔndɔa alyo lyɛɛnɛ, ne boombe byakɛ bwasoabaniwa, bɔkɛtɛ bwakɛ bokachikane, alakini botakee.

²⁷ «Kuusi mondo otaɔsɔnɛ kwingea mo ndabo yee mondo wɛ bɔkɛtɛ, ne koenda biemo byakɛ biisɛ kende kombaa ndinamokaka michie ne kɔmɔngɔ na koenda biemo byakɛ biisɛ.

²⁸ «Kiinɛkinɛ natobasaolea, bando bataɔsɔnɛ kokwelwa lokwa ko bwabea bwabɔ bɔɔsɛ ne bitɔndɛ byabɔ biisɛ bitɔndɛɛ abɔ Kakua.

²⁹ Alakini ingɛ mondo ndaswaabea kɔtɔnda Motema wa Ama, ndakakwewe lokwa ne bwabea bwakɛ botachikae meombo ne meombo.»

³⁰ Yɛsu waɔcha bɔbɔ kɔ kɔmɔa bando baɔcha itɛ oochekiwa ne masombo.

Babotwa naakɛ na Yɛsu na inakɛ

³¹ Kusia, babotwa naakɛ na Yɛsu na inakɛ na koolea, na kwimana anjɛ, abɔ na kotoma mondo koya kwa mwitane.

³² Wabɛchaya mo kokombelwa ne ndongo yee bando babɛchaya ase, abɔ na komosaolea: «Lɔla, inao ne babotwa nao bae kɔnjɛ, bae mo kokoenga.»

³³ Yɛsu na kobabocha: «Naani ne inanɛ ne banaani ne babotwa?»

³⁴ Kɔmɔngɔ awɛ na kobalɔla basɛ bamokombea, na kɔɔcha: «Baba ne inanɛ ne babotwa naanɛ.

³⁵ Kɔ kɔmɔa ɔɔsɛ otoketa bitokonda Kakua, olya ne mobotwa naanɛ, kabee motamba waanɛ ne kabee inanɛ.»