Malikɔ 12 - Zimba Nouveau Testament Portions

Kisimo ke batemi babea

¹ Kusia Yɛsu na kobangoa kɔɔcha mo bisimo mama makomo ko baa bakoo: «Ɔmɔ mondo na kobyaa isio lye misabibu na kolechombya ne kengombea, na kɔsɛnga iboa lye kwinea misabibu, na kɔyɛnga munala, awɛ na kuungwana nɛ batɛmi na koya lwɛndɔ kɔ mɔsɛngɛ wɛ njɔɔ.

² Ko kyanya kye kokaola, awɛ ne kotoma ɔmɔ mocha ko batɛmi ko kokonja bimuka bye misabibu;

³ alakini, batɛmi na kumubunda, kumwikinya na kɔmɔɔtɔa mabɔkɔ bokata.

⁴ Awɛ na kotoma kabee ukinɛ mocha, ne ko olya, abɔ na komokomoa ko motwe, na kɔmɔbɛngɛa byatɔba

⁵ Awɛ na kotoma ukinɛ, abɔ na kumuchia, ne bakinɛ babua na kobaikinya na kuchia bakinɛ.

⁶ Awɛ waba kabee ne kita kyakondiwa, awɛ na kobatomea kita, awɛ kabee wɛ kɔbɔnga na kɔɔcha: ‹Batanyɛmyɛ mwaana waanɛ.›

⁷ Alakini baa batɛmi na kwiyɔchɛa asambea abɔ: ‹Ona ne mbyana; ko bobo, tumuchie, ne boyani bɔtabɛ bwito.›

⁸ Amubunda abɔ, abɔ na kumuchia na komokosoa ko banda kwe isio lye misabibu.

⁹ «Mokoo we isio lye misabibu otakete booni? Otabee ne kuchiekya batɛmi na ɔtaɛchɛ bakinɛ isio lye misabibu.

¹⁰ Ne banu ndemwayɔɔla byakunyiwa: ‹Iwɛ lyakosoa baaboki, letae leno ne iwɛ lye kakoma.

¹¹ Mwaame ne waketa lee ikomo, nalyo lee kwito ne lye kokanyakanya.›»

¹² Abɔ baenga kumukuma, alakini baba nɛ bɔɔba bwe ndongo. Bacheba bwaachi itɛ waba ne mo kobasaolea abɔ kɛɔ kisimo. Amusia abɔ, abɔ na koya.

Bie bwaachi kolamboa?

¹³ Abɔ na komotomea bamɔ Bafalisayɔ ne Baɛlɔlɛ ko komoongea mɔ mɛɔcha.

¹⁴ Abɔ na koba na komobocha: «Mweyechi, totocheba itɛ oe we kiinɛkinɛ, na awɛ ndotoonga mondo naa nawɛ; kɔmɔa ndótɔlɔla kyeema kye mondo, alakini otoeyekya kiinɛkinɛ njea ya Kakua. Binaɔsɔnɛka aɔ kuusi kuuta molambo?»

¹⁵ Alakini Yɛsu, acheba awɛ lokani lwabɔ, na kobasaolea: «Ko eke kotonongea banu mɔ mɛɔcha? Mombee ne linali natalɛmɔa.»

¹⁶ Abɔ na komobea ne lɛmɔɔsa: «Ketemba keke ne kya naani? Ne byakunyiwa? Abɔ na kɔɔcha: «Bya Kaisali.»

¹⁷ Akaɛ alya Yɛsu na kobasaolea: «Mɔɛchɛ Kaisali bie bya Kaisali na Kakua bie bya Kakua.» Abɔ na komokanakana.

Bakwa bataubuke?

¹⁸ Basandukayɔ na komobea, ko baa batɔɔcha itɛ kuusi kuubuka, na abɔ na komobocha:

¹⁹ «Mweyechi, Musa watukunyea: Ingɛ mondo oe ne mobotwa naakɛ osokwa ne kusia mokachi bila mwaana, olya mobotwa oende mwamokachi na komobotea baana.

²⁰ Kwaba babotwa motoba na mwenji. We kombaa koenda mokachi na kokwa ndekusia baana;

²¹ Wabee na koenda mokachi na kokwa bila kusia baana, na bɔbɔ ne wasato;

²² naa nɛ ɔmɔɔsa ko baa mosambo ndasia baana. Kɔmɔngɔ kwe basɛ, mwamokachi na kokwa kabee.

²³ A kuubuka, naani asambea abɔ okaba mwɛɛnɛ we mokachi? Kɔmɔa ɔɔsɛ olya wamotomba.»

²⁴ Yɛsu na kobasaolea: «Mɔtɔkɔsa sambo, botaasi banu mocheba Byakunyiwa naa ne bɔkɛtɛ bwa Kakua?

²⁵ Kɔmɔa, a kuubuka kotoka ko bakwo, kuusi kotomba mokachi, kɔmɔa totaongwe boe meombo yee kwiyoo.

²⁶ Ko ikomo lye kuubuka kwe bakwo, ndemwayɔɔla mu kitabu kya Musa, atɔɔcha akyo kɔkɔa kwe chaani bila kutumbeka? Kakua wasaolea Musa: ‹Mee ne Kakua ka Abulaamu, Kakua ka Isaka, ne Kakua ka Yakɔbɔ.›

²⁷ Yɛsu na kokondoa: «Kakua ndaasi Kakua we bakwo, alakini wɛ bɛ mwɛchɔ. Moe mɔsɛɛsɛ mwe sambo.»

Salia yee mekoo

²⁸ Ɔmɔ kɔ ndɔmbɛ bamuungwaya oe mo koangecha, bacheba bwaɔkɔlɛa Yɛsu kɔɔkɔlɛa Basandukayɔ, na kwisɛnɛna, na komobocha: Salia yee kombaa ko masɛ na eeni?

²⁹ Yɛsu na komosaolea: «Uungwa salia yee kombaa: ‹Uungwa ɛɛ Isilaɛli, Nombe yiito, Kakua, oe ne Nombe Ɛmɔsa;

³⁰ ne otakonde Nombe, Kakua kao ne motema wao ɔɔsɛ, ne lokani lwao lɔsɛ, nɛ bɔkɛtɛ bwao bɔɔsɛ.›

³¹ Salia ya bee: ‹Otakonde mobotwa nao botwikonda awɛ mwɛɛnɛ.› Kuusi salia ikinɛ yee mo nganda mwa chia.»

³² Ndɔmbɛ na kobocha Yɛsu: «Ee Mweyechi mwaachi, ɔsɔɔcha leeko itɛ Kakua oe ne ɔmɔɔsa, nako kuusi ikinɛ ila awɛ,

³³ ne komokonda ne motema waakɛ ɔɔsɛ ne lokani lwakɛ lɔsɛ, nɛ bɔkɛtɛ bwakɛ bɔɔsɛ, ne kokonda mobotwa nao botwikonda awɛ mwɛɛnɛ, bitoeta koocha biochwa biisɛ.»

³⁴ Amɔa Yɛsu itɛ ɔsɔɔcha ne lokani, na komosaolea: «Ndoosi njɔɔ ne boombe bwa Kakua.» Ne ndekwaba kabee ukinɛ mondo wamobocha.

Ibota ne bokoo bwa Kilisito

³⁵ Yɛsu na koeyecha mɔ Ɛkalu na kɔɔcha: «Booni bɔtɔɔcha ndɔmbɛ itɛ Kilisito oe ne mwaana wa Lauli?

³⁶ Lauli awɛ mwɛɛnɛ, koetea Motema wa Ama waɔcha: ‹Mwaame wiito Kakua waɔcha kwa Mwaame waanɛ: “Chikaa isandome lyanɛ ne akabeka mee baangani bao kiinyeo kyao.”›

³⁷ Lauli mwɛɛnɛ utumuitana Nombe; booni botamwitane awɛ mwaana waakɛ?» Ne ndongo yee bando yabaungweecha nɛ kɛmɛmɔ.

Iyani ko baeyechi be Salia

³⁸ Wabasaolea mo maolecha maakɛ: Mwilɔlɛ nɛ ndɔmbɛ, batoekya kɔɛnda mo makanjo malɛa, ne kwinokewa mo ndongo,

³⁹ botoenga kuchikaa kɔ byɛnɔ bye kombaa mo masinakɔki; nɛ maboa me kombaa mo bitokoyoo.

⁴⁰ Batɔɔna ndabo che balyango, nɛ kɔnjɛ batwiyaya mbanga ya lɛa. Abɔ batamɔɛ manɛnɛ matɔba.

Keochwa kye mwalyango wakɛna

⁴¹ Achikaa Yɛsu kɔlɔlana ne kikapu kye biochwa, alɔla awɛ bwaochaya ndongo tombaambaa. Ngonji chabua chaocha byɛndɔ byabua.

⁴² Ɔmɔ mwalyango wakɛna na koba, awɛ na koocha bikɔlɔti bibee, tombaambaa twaɔma.

⁴³ Kɔ bɔbɔ Yɛsu na kwitana baeyechwa bakɛ na kobasaolea: «Kiinɛkinɛ natobasaole, oona mwalyango osoochaa koetea bando bakinɛ basɛ.

⁴⁴ Kɔmɔa, basɛ baoochee ko byabua bie nabɔ, alakini awɛ, mɔ kɔkɛna kwakɛ, waocha chisɛ chaba naakɛ kɔ mwɛchɔ waakɛ.»