Malikɔ 1 - Zimba Nouveau Testament Portions

Maeyechi ma Yɔana Mobatisi

¹ Ana na atobangoka Ilɔngɔ Lyaachi lya Yɛsu Kilisito, Mwaana wa Kakua.

² Bwakunyiwa abyɔ mo mokanda wɛ ndɛnda ya Kakua Isaya: «Mee Kakua nɛ ɔtɔɔcha: Ndatome monande waanɛ okwiyambee, ko kokosangyea njea.

³ Mokando we mondo otuungweka mwilongo: ‹Mosangye njea ya Mwaame, mochekye biina motaetee awɛ.›»

⁴ Ko bobo Yɔana Mobatisi na koola papanyo mwilongo, mu kwina bando mbuu ne kobaeyecha na kobasaolea itɛ: «Mutuuluke ko bwabea bwiinu, mwiniwe mbuu, Kakua otabakwee lokwa.»

⁵ Bando basɛ bɛ mɔsɛngɛ we Yulɛa ne be mosomba wɛ Yɛlusalɛma babɛchaya mo komooleleaya Yɔana. Baa bando basɛ babɛchaya mu kuimenya bwabea bwabɔ, kombaa kwe bando basɛ. Na awɛ wabɛchaya mo kobaina mbuu mo looche lwe Yɔlɔlani.

⁶ Yɔana wabɛchaya mo kobwaa ngubɔ yasɛngiwa ne maɔsa me nyama itwitaniwa ngamia, ne kyate kye kɛkɔba. Na awɛ wabɛaya mo kolya booke.

⁷ Wabɛchaya mo koeyekya bando itɛ: «Olya oe mokoba kɔmɔngɔ kwanɛ oe nɛ bɔkɛtɛ kongoela; naa ne mee siengye kobatama ne kokakoa michie yee bilato byakɛ.

⁸ Mee nae mo kobaina mbuu mo maache, alakini awɛ otobaine mbuu mo Motema wa Ama.»

Kwiniwa mbuu kwa Yɛsu ne kɔɛlɛkiwa kwakɛ

⁹ Mo maɔ masu, Yɛsu na kotoka mo mosomba we Nasalɛti mɔ mɔsɛngɛ we Kalilaya, na kwinwa mbuu na Yɔana mo loche lwɛ Yɔlɔlani.

¹⁰ Akaɛ alya aola Yɛsu mo maache, awɛ na kɔmɔa iyoo leochiboka ne Motema wa Ama utwika mo nganda mwaakɛ boe ngulimba.

¹¹ Chuuki na kuungweka kotokea kwiyoo na kɔɔcha: «Awɛ ne Mwaana waanɛ ngondwa yaanɛ, otokonda mee byatɔba.»

¹² Kusia Motema wa Ama na kusukua Yɛsu kwilongo.

¹³ Awɛ na kuchikaa mwilongo masu makumi manachi; na koa Isombo na kɔmɔɛlɛka. Wachikana koa mwingya nyama che chaani, meombo bamokambeaya meemo.

Yɛsu usuitana baeyechwa be kombaa

¹⁴ Kɔmɔngɔ kwe kɔtɛcha Yɔana mo kekako, Yɛsu na koyaka kɔ mɔsɛngɛ we Kalilaya, na koeyecha Ilɔngɔ Lyaachi letotoka kwa Kakua.

¹⁵ Waɔchaya itɛ: «Kyaanya kesokoka, ne boombe bwa Kakua bungaolea. Kɔ bɔbɔ, mutuuluke kotoka ko bwabea bwiinu ne kuimenya Ilɔngɔ Lyaachi!»

¹⁶ Abɛchaya Yɛsu mɔ kɔɛnda mɔsɛɛsɛ mwe kichibachiba kye Kalilaya na kɔmɔa balɔbi bɛ mwɛa babee, Simɔni ne mobotwa naakɛ Andele. Babɛchaya mo koaba makia mɔ kɛɔ kichibachiba.

¹⁷ Yɛsu na kobasaolea: «Mombyee, na mee ndababeke baabi be bando.»

¹⁸ Akaɛ alya na kusia makia mabɔ na komoyea.

¹⁹ Aisɛɛna Yɛsu ndambokwa chi chiinini kombaa, awɛ na kɔmɔa kabee bakinɛ baboteka babee, Yakɔbɔ na Yɔana, baana ba Sɛbɛlayɔ. Babɛchaya monda mwe ketange kyabɔ mɔ koongoseka ikia lyabɔ.

²⁰ Akaɛ alya awɛ na kobaitana. Ko boa, abɔ na kosangameka isabɔ wa Sɛbɛlayɔ monda mwe ketange amɔsa ne ngambi chaakɛ, abɔ na komoyea Yɛsu.

Yɛsu osoolola mondo we masombo

²¹ Kɔmɔngɔ, Yɛsu ne baeyechwa bakɛ na koya ko kalya ke Kapɛlɛnaumu. Aolea lusu lwe sabatɔ, Yɛsu na kwingea mu sinakɔki awɛ na kobangoa kweyecha bando.

²² Bando bauungwa maeyechi maakɛ na kokanakana byabua ne kuungwa byaeyecha awɛ kɔ kɔmɔa awɛ ndaeyecha boe baeyechi babɔ be Salia, alakini awɛ waeyecha ɔbɛɛ mondo oe nɛ bɔkɛtɛ.

²³ Kyakaɛ kea kyanya, ɔmɔ mondo wabundeka ne masombo, na kwingea mu sinakɔki. Akaɛ alya na kobangoa kokandoka mɔ kɔɔcha:

²⁴ «Ɛɛ Yɛsu we Nasalɛti, ototoenga ne eke? Osoba ne kwatusie njɛngɔ? Mee natokocheba awɛ ne naani. Awɛ ne wa Ama watomiwa na Kakua.»

²⁵ Yɛsu na komokandokea lea isombo na kolesaolea: «Nyamea! Toka mo ona mondo!»

²⁶ Lea isombo na kuchingya bokoo olya mondo, na koola monda mwaakɛ mo kokandoka bokoo bokoo.

²⁷ Bando basɛ na kokanakana byabua, na kobangoa kobochana: «Kaka ne kake kaseba? Kiinɛkinɛ maeyechi ma ona mondo mae nɛ bɔkɛtɛ! Otosaolea masombo matoke, namɔ matumuungwa!»

²⁸ Ko boa boombe bwa Yɛsu na konyaa mɔsɛngɛ ɔɔsɛ we Kalilaya.

Yɛsu osoolola balwachi babua

²⁹ Atoka Yɛsu ne baeyechwa bakɛ Yakɔbɔ na Yɔana mo elya sinakɔki, akaɛ alya abɔ na koya ko ndabo ya Simɔni na Andele.

³⁰ Aolea abɔ alya, abɔ na kosaolea Yɛsu itɛ inakɛ mwɛnɔ na Simɔni oe mɔ kɔkɛsa a kyandwa, kɔmɔa wabɛchaya ne kebokoboko.

³¹ Kɔ bɔbɔ Yɛsu na kumwisɛɛnɛa, komokwata kɔ kɔbɔkɔ ne komotaosa. Awɛ na kooloka na kobangoa kobakambea biewa.

³² Aolea kyɔlwa, chooba lesoya, bando na kochaela Yɛsu balwachi basɛ ne babɛchaya ne masombo.

³³ Bando basɛ ba kaa kalya kukumbana kombaa kwe mukinda we alya ndabo.

³⁴ Yɛsu na koolola bando babua babɛchaya ne bolwachi bye mitindɔ ɛɛsɛ. Bwakaɛ bwakaɛ walikita masombo mabua, ndaɛcha naa ne kyanya ko maa masombo kɔɔcha ikomo, kɔmɔa mamocheba itɛ awɛ ne naani.

Yɛsu osoeyecha Ilɔngɔ Lyaachi mɔ mɔsɛngɛ ke Kalilaya

³⁵ Ngɛcha yaakɛ mɛkyɛɔ kokee ikunyɛ, Yɛsu na kobyoka. Awɛ na kotoka mo kalya na koyaka kwaiyaye a iboa letaasi bando.

³⁶ Kɔ bɔbɔ, Simɔni ne banjinakɛ na koyaka kwa moenge.

³⁷ Amɔmɔa abɔ, na komosaolea: «Bando basɛ bae mo kokoenga.»

³⁸ Alakini Yɛsu na kobasaolea: «Toyake a likinɛ iboa mo tolya tukinɛ toe mɔsɛɛsɛ, kɔmɔa naeyeche kabee koa Ilɔngɔ Lwaachi. Kɔmɔa ne bibeele mee.»

³⁹ Ko bobo awɛ na koyaka ko maboa masɛ mɔ mɔsɛngɛ we Kalilaya mo koeyecha Ilɔngɔ Lwaachi mu masinakɔki ne kulikita masombo.

Yɛsu osoolola mondo we baacha

⁴⁰ Lɔmɔ lusu, mondo ɔmɔchi we baacha na koba kwa Yɛsu, awɛ na kɔkɔma malu makɔngɔ kombaa kwakɛ, na kwiyaya, mɔ kɔɔcha: «Ingɛ otakonda, ngolosa.»

⁴¹ Yɛsu na komokwea lokwa, na koendoa kɔ kɔbɔkɔ na kɔmɔtɛchɛa chanja, na komosaolea: «Natokonda, oloka!»

⁴² Akaɛ alya, baa baacha na kusia, awɛ na kooloka.

⁴³ Akaɛ alya Yɛsu na kumusiea nɛ bɔkɛtɛ oyake. Awɛ na komosaolea:

⁴⁴ «Ilɔla, ndɛkɔɔcha ne monda naa nawɛ ko lee ikomo. Alakini yaaka kwa patili na komoangoecha botae awɛ leno. Kusia, ooche keochwa bwaɔcha Musa, boe keangoecho ko basɛ itɛ osooloka.»

⁴⁵ Alakini, ayaka olya mondo, na kobangoa kosaola lea ilɔngɔ kɔsɛ. Ne ko bobo Yɛsu ndaɔsɔna kabee kwingea mɔ kɔmɔɛka motolya tɔɔsɛ, alakini naa nɛ bɔbɔ bando kotoka mbanga chisɛ bamoolelea.