Luka 6 - Zimba Nouveau Testament Portions

Yɛsu ne mokoo we lusu lwe sabatɔ

¹ Lɔmɔ lusu lwe sabatɔ, Yɛsu na kosaboka masio me ngano. Baeyechwa bakɛ na kɔɔlɔla bichɛngɛ bye ngano, kubiikinya mo mesani yaabɔ na kubilya.

² Bamɔ Bafalisayɔ na kobocha baeyechwa: «Ko booni kotoketa baanu bitokandelwa ne Salia lusu lwe sabatɔ?»

³ Yɛsu na kobasaolea: «Muunayɔɔla byaketa Lauli aungwa awɛ njaa, awɛ ne bando bakɛ?

⁴ Waingea mo ndabo ya Kakua, na koenda mikati yaocha bando kwa Kakua. Awɛ na komelya, ne kɔɛcha kabee bando babɛa naakɛ, bɔbɔ ne mikati ya ɔyɔ mutindɔ etolewa ne bando bakinɛ bataasi basia ikɛɛsa.»

⁵ Awɛ na kokondoa kobasaolea itɛ: «Mee Mwaana we Mondo ne mokoo wee sabatɔ.»

Yɛsu osoolola waoma kɔ kɔbɔkɔ

⁶ Lukinɛ lusu lwe sabatɔ, Yɛsu na kwingea mu sinakɔki, na kobangoa koeyekya: Mo elya sinakɔki, mwabɛchaya mondo walɛbɛa chanja lye isandome.

⁷ Baeyechi be Salia ne Bafalisayɔ, na koyongobechea Yɛsu miisɔ kɔ kɔmɔa ingɛ otaolole olya mondo mu lusu lwe sabatɔ, bakonje kɛɛyameo kye komotaeka ko nganya.

⁸ Awɛ na kocheba lokani lwabɔ, na kosaolea walɛbɛa chanja: «Byoka, imaa mwingya bando.» Awɛ na kobyoka, na kwimana mwingya abɔ.

⁹ Kɔmɔngɔ Yɛsu na kobasaolea: «Nae ne lɛmɔ ikomo lye kobabocha: Salia yiito etototomaya koketa bwaachi ɔbɛɛ bwabea ku lusu lwe sabatɔ? Koolola mondo ɔbɛɛ kumuchia?»

¹⁰ Yɛsu na kɔlɔla basɛ babɛa naakɛ alya, na kosaolea olya mondo: «Ɔnɔnɛka chanja lyao.» Awɛ na kɔlɛɔnɔnɛka, chanja lyaakɛ, na kooloka, na koongwa mwɛchɔ.

¹¹ Abɛa ndɔmbɛ che Salia ne Bafalisayɔ abɔ na kochaa moemo, na kobochana baketee Yɛsu eke.

Yɛsu ɔɔsɔbɔa ndomwa ikumi na babee

¹² Kɔ maɔ masu Yɛsu na konena ko keembe kwaiyaye. Awɛ na koketa kaboombo mu kwiyaya kwa Kakua.

¹³ Akya butu, awɛ na kwitana baeyechwa bakɛ, awɛ na kɔsɔbɔa asambea abɔ ikumi ne babee na kɔbaɛbɛcha chiina lye ndomwa.

¹⁴ Ngombo chabɔ na chichi: Simɔni (waɛcha Yɛsu chiina lya Pɛtɛlɔ) na Andele mobotwa naakɛ, Yakɔbɔ na Yɔana, Filipɔ na Balatimayɔ,

¹⁵ Matayɔ na Tɔmasi, Yakɔbɔ mwaana wa Alufayɔ, na Simɔni waitaniwa Sɛlɔtɛ,

¹⁶ na Yula mwaana wa Yakɔbɔ, na Yula Isikaliɔta waocha Yɛsu.

Yɛsu otoeyecha ne koolola balwachi

¹⁷ Yɛsu na kwika ne baeyechwa bakɛ. Aolea awɛ ataasi ketoo, awɛ na kwimana amɔsa ne baeyechwa bakɛ na kosanga ndongo yee bakinɛ baeyechwa bakɛ ne ndongo mekataa yee bando bakinɛ batokea mɔsɛngɛ ɔɔsɛ we Yulɛa, nɛ Yɛlusalɛma, nɛ Tilɔ nɛ Silɔna mɔ mɔkɔngɛ we kichibachiba.

¹⁸ Baa bando babaka kwa mwiungweeche, ne koololwa bolwachi bwabɔ. Na baa basonga ne masombo nabɔ baololwa kabee.

¹⁹ Bando basɛ na koenga bamɔkɔbɔchɛ kɔ kɔmɔa bɔkɛtɛ bwamoolaya na koolola bando basɛ.

Lɔkɔka ne mokimo

²⁰ Yɛsu na kɔlɔla baeyechwa bakɛ, awɛ na kɔɔcha: «Mɔmɛmɛ banu bakɛna, kɔ kɔmɔa itɛ boombe bwa Kakua ne bwiinu.

²¹ Mɔmɛmɛ banu bae ne njaa leno, kɔ kɔmɔa mɔtaɛbɛ. Mɔmɛmɛ banu bae mo kolela leno, kɔ kɔmɔa mɔtasɛkɛ.

²² «Mɔmɛmɛ atamɔkɔnɛ bando na kɔbaisɔa ne ndongo chabɔ, ne kɔbabɛngɛa, ne kobaakoɛa bwabea ku chiina lyanɛ mee Mwaana we Mondo.

²³ Mɔmɛmɛ atamoolelaye mamɔ makomo mwinande nɛ kɛmɛmɔ, kɔ kɔmɔa itɛ motobekiwa bɔɔngya bokataa mwiyoo. Kɔ kɔmɔa na boa bwasongya ba isabɔ mokoo ndɛnda cha Kakua.

²⁴ Banu ngonji, moe ne mayombe kɔmɔa muusia kokonja kinu kɛmɛmɔ.

²⁵ Na banu basɔɛba leno moe ne mayombe kɔmɔa motaungwe njaa. Na banu bae mɔ kɔsɛka leno moe ne mayombe, kɔmɔa motalele.

²⁶ Mayombe kwinu atobaseka bando, kɔmɔa ba isabɔ mokoo baketa bɔbɔ nɛ ndɛnda che manu.»

Kokondaya baangani

²⁷ Yɛsu na kɔbaɔkɔɛa bando kabee itɛ: «Alakini natobasaolea banu bae mu kunungwa itɛ: Mokondaye baangani niinu. Mobaketee byaachi baa batɔbakɔna.

²⁸ Mwiyayaye kwa Kakua ɔbaɛchɛ lɔkɔka baa bae mo kobakimoa. Ne mwiyayaye kwa Kakua ko baa batobamɔnya manɛnɛ.

²⁹ Ingɛ mondo osobaamea kwitama lɛmɔɔsa, mumutuulee ne likinɛ. Ne ingɛ mondo osokobakoa ikɔti lyao, mɔlɛkɛɛla ne simisi yao.

³⁰ Ɛcha ɔɔsɛ ɔtakɔɛngɛɛ, ne ɔɔsɛ otakobakoe byɛndɔ byao, ndɛ kɔmɔɛngɛa ɔbiɔtɔɛ.

³¹ Boa botokonda banu bando babaketee mobaketee nabɔ bwakaɛ.

³² «Ingɛ motokonda baa batobakonda banu ikɛɛsa, meke sukulani etakonje banu kɔɛbɔ? Kɔmɔa nabɔ bando babea batokonda baa batobakonda.

³³ Ingɛ motoketa bwaachi ko baa bae mo kobaketea bwaachi, meke sukulani etakonje banu kɔɛbɔ? Kɔmɔa nabɔ bando babea batoketa bwakaɛ bɔbɔ.

³⁴ Ingɛ motoambesa mondo ne kobaela kokonja keemo, meke sukulani etakonje banu kɔɛbɔ? Kɔmɔa nabɔ bando babea batɔkɔpɛsa baa batɔbaɔtɔsɛa.

³⁵ «Mokondaye baangani niinu, ne kobaketeaya bwaachi. Ne koambesaya kotaasi kobaela bakɔɔtɔsɛɛ. Mwasoketa bɔbɔ, motakonje ikonja lekatala, kabee mɔtabɛ kiinɛkinɛ baana ba Kakua we Kwiyoo Njɔɔ. Kɔmɔa awɛ otoketa maachi ko bando bataasi batusukulu ne ko baa batoketa bwabea.

³⁶ Mɔbɛ ne lokwa boe Isinu ne lokwa.»

Nde kɔmɔa bakinɛ ne bwabea

³⁷ Yɛsu na kɔɔcha kabee: «Mɔmɔnyaya bando manɛnɛ, na Kakua ndakamɔmɔnyɛ manɛnɛ. Mosaolaya bamɔnyɛ bakinɛ manɛnɛ, na Kakua ndakaɔchɛ bamɔmɔɛ na baanu. Muungwee bakinɛ lokwa, na Kakua otamuungwee lokwa.

³⁸ Mɔɛchayɛ bakinɛ na Kakua ɔtabaɛchaye. Motakonje ikonja lekoo lya chaa bɛɛ. Kɔmɔa batamochekyee mo kyakaɛ kɛɔmbɔlwa ketochekyea banu bakinɛ.»

³⁹ Kabee Yɛsu na kobasaolea mo meengo: «Mbufu etaangoeche ikinɛ mbufu? Bakakee basɛ babee mu kiina?

⁴⁰ Mweyechwa ndatoeta mweyechi waakɛ; ɔɔsɛ mweyechwa uusia koeyechwa bwaachi, ɔyɔ ne ɔtabɛ boe mweyechi waakɛ.»

⁴¹ Yɛsu na kɔɔcha kabee: «Booni bɔtɔmɔa awɛ kɛsɛsi kee mu liisɔ lye mobotwa nao, na awɛ ndɔtɔmɔa lomafa loe mu liisɔ lyao?

⁴² Ɔbɛɛ booni bɔtaɔchɛ awɛ ne mobotwa nao: ‹Ee mobotwa naanɛ, ndɛkɛa naoche kɛsɛsi mu liisɔ lyao›, na awɛ mwɛɛnɛ ndɔtɔmɔa lomafa loe mu liisɔ lyao? Awɛ wee manu! Taocha kombaa lomafa loe mu liisɔ lyao, kɔmɔngɔ ɔtamɔɛ bwaachi na kotosa kɛsɛsi kee mu liisɔ lye mobotwa nao.»

Mote ne bimuka byakɛ

⁴³ Yɛsu na kɔɔcha kabee: «Kuusi mote mwaachi otaɔsɔnɛ koocha bimuka byabea, ɔbɛɛ mote wabea kowamba bimuka byaachi.

⁴⁴ Kɔmɔa mote ɔɔsɛ otochebekwa ku bimuka byakɛ. Mondo ndakakotoe Tini ɔbɛɛ misabibu ko mɔchɔngɔma.

⁴⁵ Mondo mwaachi ɔtɔɔcha maachi matotoka ko motema waakɛ. Ne mondo wabea, bwabea bɔtɔɔcha awɛ bototoka ne mo bwabea botochaa mo motema waakɛ. Kɔmɔa kanywa ke mondo kaanga kɔɔcha ne makomo matochekya motema waakɛ.»

Mitindɔ ebee yee bayɛngi

⁴⁶ Yɛsu na kɔɔcha kabee: «Ko eke kutumbitana baanu Mwaame, Mwaame, koko ne mootoketa bitobasaolea mee?

⁴⁷ Ne ɔɔsɛ otoba kwanɛ, ne kuungwa makomo maanɛ, ne komaketa ndabaangweche banu bitoeyana na ona mondo.

⁴⁸ Otoeyana ne mondo waaboka ndabo yaakɛ. Awɛ na kochoa kiina kekatala kyaolea ne kwibwe. Kɔmɔngɔ na koaboka ndabo konganda kwe ɔyɔ moota we koanga. Aɔka mbua, maache na kwika ne bɔkɛtɛ mo nganda mwe elya ndabo, elya ndabo ndeyachingana, kɔmɔa yaabokiwa bwaachi.

⁴⁹ Oolya utuungwa makomo maanɛ, na awɛ ndatoketa bitɔɔcha amɔ, otoeyana ne mondo waaboka ndabo yaakɛ mɔ lɔsɛkɛnja. Kɔmɔngɔ, abaka maache mabua me looche kwaɛtamɛ elya ndabo, akaɛ alya ndabo na kokea na kusunjuka.»