Luka 4 - Zimba Nouveau Testament Portions

Kɔɛlɛkiwa kwa Yɛsu

¹ Yɛsu na kotoka ko looche Yɔlɔlani wa chekwa ne Motema wa Ama. Motema wa Ama na kɔlɔmbɔcha Yɛsu mwilongo.

² Koa waɛlɛkiwa ne Isombo mo masu makumi manachi. Ko maɔ masu ndalya naa nɛ kɛmɔ. Kɔmɔngɔ kwa maa masu, awɛ na utuungwa njaa.

³ A kɛɔ kyanya Isombo na komosaolea: «Kende awɛ oe kiinɛkinɛ Mwaana wa Kakua, saolea mama mawɛ matuuluke mukati.»

⁴ Yɛsu na komosaolea: «Bie bukunyiwe mu Ikomo lya Kakua itɛ: ‹Mondo ndaongwe mwɛchɔ mo kolya mukati ikɛɛsa.›»

⁵ Kɔmɔngɔ kwa bia, Isombo na kokobecha Yɛsu a iboa lyaendoka, akaɛ alya na komoangoecha boombe bɔɔsɛ bwɛ mɔsɛngɛ.

⁶ Na komosaolea: «Ndakɔɛchɛ bɔkɛtɛ bɔɔsɛ ne byɛndɔ bya boa boombe. Kɔ kɔmɔa naɛchiwa bia biisɛ, na mee ninabiɛcha ɔɔsɛ otakonde mee.

⁷ Ko boa, kende usumbungea malu makɔngɔ, bia biisɛ bitaongwe byao.»

⁸ Alakini Yɛsu na komosaolea: «Bie bukunyiwe mwi Ikomo lya Kakua itɛ: ‹Otabungaye malu makɔngɔ Mwaame Kakua wao ne komokambeya awɛ ikesa.›»

⁹ Kɔmɔngɔ Isombo na komochaa bwakaɛ Yɛlusalɛma na kɔmɔtɛcha mo nganda mwe Ɛkalu na komosaolea: «Kende oe Mwaana wa Kakua, ikosoa ase;

¹⁰ kɔmɔa bitukunyiwa mu Ikomo lya Kakua itɛ: ‹Kakua otasaolee meombo yaakɛ ekokengee.

¹¹ Ne batakoende mo mabɔkɔ mabɔ, ndwitɔndɔkaya moende ku kwiwɛ.›»

¹² Yɛsu na komosaolea: «Bie bukunyiwe mu Ikomo lya Kakua itɛ: ‹Ndɔɛlɛkaya Mwaame Kakua kao.›»

¹³ Kɔmɔngɔ kwe Isombo kɔɛlɛka Yɛsu ko njea chisɛ, awɛ na kosambokana naakɛ ko kyanya.

Yɛsu osobangoa meemo mɔ mɔsɛngɛ we Kalilaya

¹⁴ Yɛsu na kɔɔtɔka Kalilaya wachekwa ne Motema wa Ama. Boombe bwakɛ na konyaa mo olya mɔsɛngɛ ɔɔsɛ.

¹⁵ Waeyechaya bando mo masinakɔki, ne bando bamosekaya.

Bando be Nasalɛti baɔkɔna Yɛsu

¹⁶ Lɔmɔ lusu Yɛsu koolea Nasalɛti, kalya kabotekea awɛ. Lusu lwe sabatɔ awɛ na kwingea mu sinakɔki bwabɛchaya awɛ mo koketa. Awɛ na kwimana kɔ kɔyɔɔla Ikomo lya Kakua.

¹⁷ Na abɔ na kɔmɔɛcha kibungu kye mokanda we ndɛnda ya Kakua Isaya. Awɛ na kukibugula, na kosanga a iboa akunyiwa itɛ:

¹⁸ «Motema wa Mwaame oe mo nganda mwaanɛ, kɔmɔa ɔnjɔbɔɛɛ ko mee kosaola bakɛna Ilɔngɔ Lyaachi, ondomee kwa saolee bakakiwa itɛ batakakoiwe ne itɛ mbufu batamɔɛ. Ondomee ko baa bae mo manɛnɛ baongwe ne kobwanda,

¹⁹ Kwasaole bando itɛ, mwaka otaangoeche Mwaame bwaachi bwakɛ ko bando, osoolea.»

²⁰ Kusia bɔbɔ awɛ na kubunga kibungu kye mokanda wa Kakua, na kɔɛcha mokambi we sinakɔki, na kuchikaa ase. Ne basɛ babɛa mu sinakɔki na komoyongobechea miisɔ.

²¹ Awɛ na kobangoa kobasaolea: «Leno lee, byaɔcha Tuchimba bisoolea ko baanu batubiungwa.»

²² Basɛ na kuimenya ne kokanakana ne mɛɔcha myaachi yaolaya mo kanwa kaakɛ, na kɔɔcha: «Ona ndaasi mwaana wa Yusufu?»

²³ Yɛsu na kobasaolea: «Kiinɛkinɛ natocheba itɛ motaɔchɛ keke kisimo: ‹Munganga iolola awɛ mwɛɛnɛ?› Ne motanjaolee itɛ: ‹Keta ana, mo kalya kao, biisɛ biungwee bae itɛ ubiketee ko Kapɛlɛnaumu.›»

²⁴ Awɛ na kɔɔcha kabee: «Natomosaolea bye kiinɛkinɛ, kuusi ndɛnda lya Kakua lɛtɔsɛkɛwa bwaachi mo kalya kabɔ.

²⁵ Natomosaolea bye kiinɛkinɛ: mɔ mɔsɛngɛ we Isilaɛli, kwabɛchaya balyangɔ babua mo keeko kya ndɛnda lya Kakua Ɛlia. A kee keeko, ndekwaɔka mbua meaka esato ne songe motoba. Kɔ bɔbɔ, njaa ne konyaa mɔ mɔsɛngɛ ɔɔsɛ.

²⁶ Kakua ndatoma Ɛlia kwa kwakwase naa ne mwalyango ɔmɔ asambea abɔ. Wamotoma ko mwalyango ɔmɔɔsa ikɛɛsa we kalya ke Salapata, mɔ mɔsɛngɛ we Silɔna.

²⁷ Kwabɛchaya kabee, mɔ mɔsɛngɛ we Isilaɛli, be baacha babua mo keeko kya ndɛnda lya Kakua Ɛlisha. Ndekwaba waololwa, Naamani ikɛɛsa, we mɔsɛngɛ we Sulia.»

²⁸ Bando basɛ baba mo elya sinakɔki na koemoka bokoo aungwa abɔ mao makomo.

²⁹ Abɔ na kotaoka, na kusukua Yɛsu kɔnjɛ kwe kalya, na komochaa ko nganda kwe keembe, kwabɛchaya mosomba we Nasalɛti. Bakonda kumusukua ko mweenga.

³⁰ Yɛsu na koeta mwingya mwabɔ na kwiyea.

A Kapɛlɛnaumu, Yɛsu usulikita masombo ko mondo

³¹ Kɔmɔngɔ kwa bibi, Yɛsu na kwika ko kalya ke Kapɛlɛnaumu, mɔsɛngɛ we Kalilaya. Aolea lusu lwe sabatɔ, awɛ koeyecha bando.

³² Bando na kokanakana byabua ne maeyechi maakɛ kɔ kɔmɔa waɔchaya ne bɔkɛtɛ.

³³ Monda mwa ɛyɔ sinakɔki, mwabɛchaya ɔmɔ mondo wabɛchaya ne isombo. Ɔyɔ mondo na kokandoka byabua itɛ:

³⁴ «Ee! Yɛsu we Nasalɛti, keke ketotoenga nao? Obee ne kwatusie njɛngɔ? Natocheba bwaachi oe naani: Awɛ ne wa Ama wa Kakua.»

³⁵ Yɛsu na kokandokea isombo na kɔɔcha: «Nyamea, tooka mo ona mondo!» Akaɛ alya lea isombo na kokanda olya mondo ase mwingya bando, na isombo na komoola kotaasi komoketea bwabea.

³⁶ Bando basɛ na kokanakana byabua, abɔ na kobochana itɛ: «Lee ne leke ikomo? Ona mondo oe mu kulikita masombo ko bokoo nɛ kɔ bɔkɛtɛ bwakɛ namɔ matoola!»

³⁷ Ko bobo, malɔngɔ ma Yɛsu na konyaa mo olya mɔsɛngɛ ɔɔsɛ.

Yɛsu osoolola balwachi babua

³⁸ Yɛsu na koola mu sinakɔki, na koya ko ndabo yee ɔmɔ mondo waitaniwa Simɔni. Aolea awɛ aɔ, na kosanga inakɛ mwɛnɔ na Simɔni oe mo kochanja ne kebokoboko kya angamaa. Kɔ bɔbɔ, abɔ na kwiyaya kwa Yɛsu omoolole.

³⁹ Awɛ na koemaa mɔsɛɛsɛ mwaakɛ na kokandokea kea kebokoboko, akyo na komoola. Akaɛ alya awɛ na kotaoka na kobangoa kobakambea byiebwa.

⁴⁰ Ayaka chooba, abɔ na komobea Yɛsu ne bando basɛ babɛa balwachi ne bolwachi bwe mitindɔ ɛɛsɛ. Yɛsu na kobabekeaya manja mo nganda mwe ɔɔsɛ olya, na kobaolola.

⁴¹ Masombo na koola mo bando babua mo kokandoka: «Awɛ ne Mwaana wa Kakua!» Yɛsu na kokandokea masombo na komachiba tonywa, kɔmɔa macheba itɛ awɛ ne Kilisito.

Yɛsu oe mo ko saola Ilɔngɔ Lyaachi mɔ mɔsɛngɛ we Yulɛa

⁴² Ngɛcha yaakɛ, aola chooba, Yɛsu na koola mo kalya na koya ataasi bando. Ketongo kye bando na kobangoa komoenga. Amɔmɔa abɔ, bakonda kuchikaa naakɛ, ndabasiaya.

⁴³ Yɛsu na kobasaolea: «Biengye nasaole Ilɔngɔ Lyaachi lye boombe bwa Kakua mo tolya tukinɛ kabee, nɛ kɔ bɔbɔ kondomee Kakua.»

⁴⁴ Yɛsu wasaoleaya Ilɔngɔ Lyaachi mo masinakɔki mɛ mɔsɛngɛ we Yulɛa.