Luka 24 - Zimba Nouveau Testament Portions

Yɛsu usuubuka

¹ Mɛkyɛɔ yee lusu lwe yinga baa babakachi na koyaka ko manda, kwasie malasi masangya abɔ.

² Bakee njɔɔ na kɔmɔa iwɛ lwachiba abɔ ko manda lisusukwewa mɔsɛɛsɛ mwe mukinda.

³ Abɔ na kwingea monda, ndebabanga mobee wa Mwaame Yɛsu.

⁴ Abɔ bakee mu kwibocha lee ikomo, bando babee babwaa ngubɔ chakɛnya na koemaa kombaa kwabɔ.

⁵ Abɔ basɛ na kuungwa bɔɔba na kɔlɔla ase. Baa bando na kobasaolea: «Ko booni kotoenga baanu oe mwɛchɔ mwingya mwe bakwo?

⁶ Ndaekee ana, usuubuka. Mwitunduche bia bya basaoleaya awɛ alya okee Kalilaya:

⁷ Bitokoka ne Mwaana we Mondo oochiwe mo mabɔkɔ me bando babea, ɔmɔɛ manɛnɛ me kokwa, ne uubuke mo masu masato.»

⁸ Abɔ na koeyoka mɛɔcha ya Yɛsu.

⁹ Abɔ na kɔɔtɔka, na koyasaola maa makomo masɛ ko baa ikumi na ɔmɔɔsa, ne ko ndomwa chikinɛ.

¹⁰ Babɛchaya ne: Malia we Makitala, Sanɛ, Malia, ina Yakɔbɔ, na baa babakachi bakinɛ, babɛchaya naakɛ, na koolecha bwakaɛ ilɔngɔ ko ndomwa.

¹¹ Alakini baninga itɛ bitɔɔcha abɔ bie ne byebokata, na baba ndebaimenya.

¹² Pɛtɛlɔ na kobangoa mbeo koya ko manda. Koyaingea, kyayasanga awɛ ne ngubɔ chabweka abɔ ketomba, awɛ na kɔɔtɔka mo kokanakana biisɛ byaeteka.

Yɛsu ɔsɔmɔɛka ko baeyechwa bamɔchi

¹³ Lwakaɛ loa lusu, ndomwa chibee chaeyechaya ko kalya kaitanewaya Emausi, ilɛba le ɔbɛɛ bilomɛtɛlɛ ikumi na bibee ne Yɛlusalɛma.

¹⁴ Abɔ na bae mɔ kɔchɔbɔa makomo masɛ maeteka.

¹⁵ Bakee mɔ kɔchɔbɔa ne kochombya ngani chabɔ, Yɛsu mwɛɛnɛ na kobaisɛnɛa na kosambea nabɔ njea.

¹⁶ Miisɔ mabɔ mamɔmɔa alakini keemo kɛmɔɔsa kyabachibea baamochebaya.

¹⁷ Yɛsu na kobabocha: «Mɔtɔchɔbɔa ko leke ikomo?» Abɔ na kwimana mo koemoka.

¹⁸ Ɔmɔ waabɔ we chiina lya Kɛlɛɔpa, na komosaolea: «Oe ne ingaa mɔ Yɛlusalɛma metondoo, otaasi kocheba ikomo lesoeteka mano masu?»

¹⁹ Awɛ na kobabocha itɛ: «Bike bisoeteka?» Mae ne makomo maetekee Yɛsu we Nasalɛti. Wabɛchaya ndɛnda mekoo ya Kakua, wabɛchaya nɛ bɔkɛtɛ mɔ mɛɔcha ne mo bikete kombaa kwa Kakua ne kombaa kwe bando.

²⁰ Bakoo be basia ne bakoo biito bɛ mɔsɛngɛ bamolamboa kɔ kɔbɛmba makomo maakɛ me kokwa. Kubɔngɛɛ na komosongeeka ko mote we maakanu.

²¹ Bae twabɛɛ tosobaela itɛ awɛ ne otaolose Baisilaɛli. Alakini, leno masu masato maokoka, aetekee elya myanda.

²² Kabee bye kokanyakanya ne, bamɔ baabakachi be ketongo kiito batukuumunyee. Bayee ko manda mɛkyɛɔ,

²³ alakini ndebasanga ketomba. Abɔ na kɔɔtɔka kwatosaolee itɛ bakumbakanee ne molendo we kɔmɔa meombo, ebasaolee kiinɛkinɛ itɛ oe mwɛchɔ.

²⁴ Kusia boa, bamɔ ko baa babɛɛ niito, na koya bwakaɛ ko manda, na koyasanga makomo bwakaɛ boa bo saolee baa babakachi; alakini abɔ ndɛbamɔmɔa.

²⁵ Yɛsu na kobasaolea: «Banu bando bataasi ne lokani, batɔtɛa metema ku kwimenya biisɛ byaɔcha ndɛnda cha Kakua.

²⁶ Bitokoka Kilisito okonje mama manɛnɛ kombaa kwe awɛ kwingea mo boombe bwakɛ.»

²⁷ Kusia Yɛsu na kobasaolea makomo makunyewa ko mbanga yaakɛ mu Tuchimba tɔɔsɛ twa Ama. Kobangoea ko mekanda ya Musa, ne koolea ko mekanda yee Ndɛnda chisɛ cha Kakua.

²⁸ Aba abɔ bangaolea mo kalya kayeela abɔ, awɛ Yɛsu na kɔmɔɛka boe oe mo koya njɔɔ.

²⁹ Baa baeyechwa na kumwisingea itɛ: «Chikaa niito chooba lesoya, ne butu bungaila.» Awɛ na kwingea mo ndabo na kuchikaa nabɔ.

³⁰ Basɛ na kuchikaa na Yɛsu mo kolya. Awɛ na kotomba mukati, na koocha mosao kwa Kakua, kusia na kubuka na kɔbaɛcha.

³¹ Akaɛ alya miisɔ mabɔ na kobooloka na batomocheba! Alakini Yɛsu na kobachimbea, ndebamɔmɔa kabee.

³² Abɔ na kobangoa kwiɔchɛa: «Bieko! Abɛɛ awɛ mɔ kɔɔcha niito mo njea, ne kotosaolea makomo me Tuchimba twa Ama, metema yiito na kochaa nɛ kɛmɛmɔ!»

³³ Abɔ na kotaoka ko kyakaɛ kea kyanya, ne kɔɔtɔka ko Yɛlusalɛma. Na batoyasanga baa ndomwa ikumi cha Yɛsu ɔmɔɔsa ne bando bakinɛ be ndongo yaabɔ.

³⁴ Baa basɛ basangwa ne kosaolea baa baeyechwa babee: «Bieko kiinɛkinɛ, Mwaame wiito usuubuka! Omoolee Simɔni.»

³⁵ Baa baeyechwa babee na abɔ, na kosaolea banjinabɔ maɔngɔ mauungwee abɔ ne booni bochebee abɔ Yɛsu abɛɛ awɛ mu kubuka mikati.

Yɛsu osobaolea baeyechwa bakɛ

³⁶ Bakee mɔ kɔchɔbɔa maa makomo, Yɛsu mwɛɛnɛ na kɔmɔɛka mwingya mwabɔ, na kobasaolea: «Nyaa iongwe niinu!»

³⁷ Abɔ na kuungwa bɔɔba ne kamiona, mu kuninga itɛ bamoɛchi ne kesemboelwa.

³⁸ Yɛsu na kobasaolea: «Ko booni kutuungwa baanu ne keangaa nɛ kwikakanya?

³⁹ Mɔtalɔla manja maanɛ nɛ tɔbɛya twanɛ, mee na oono kiinɛkinɛ! Mɔngɔbɔchɛ nɛ kɔndɔla. Kesemboelwa kiisi ne misunɛ ne makua, mee nae nabyo.»

⁴⁰ Asia Yɛsu koocha bia, na kɔbamɔɛsa manja maakɛ nɛ tɔbɛya.

⁴¹ Baa baeyechwa baba ne banaimenya kɔ kɔmɔa baba nɛ kɛmɛmɔ ne kokanakana Ko boa awɛ kobabocha: «Moe ne byekolya?»

⁴² Na batɔmɔɛcha kyunda kye mwɛa kɛ kɔɛkɛlwa.

⁴³ Na kukibunda, na kokelya mu miisɔ mabɔ.

⁴⁴ Kusia ne otobasaolea: «Abɛchaya mee niinu amɔsa, nabamosaolea itɛ, makomo maochiwa ko mbanga yaanɛ mo Salia ya Musa ne mo mekanda yee Ndɛnda cha Kakua, ne mo mokanda wa Nembo, biitowaena kokoka biisɛ.»

⁴⁵ Ko boa Yɛsu na kobachiboa ngani chabɔ, kɔmɔa bachebe Tuchimba twa Ama.

⁴⁶ Na kobasaolea: «Bitukunyiwa mu tuchimba twa Kakua, itɛ Kilisito okonje manɛnɛ ne kuubuka lusu lwa sato kɔmɔngɔ kwe kokwa kwakɛ.

⁴⁷ Byakunyiwa bwakaɛ boa, ku chiina lyaakɛ batasaolee bando maɔngɔ, kobangoa Yɛlusalɛma, kɔmɔa batuuke kotoka ko bwabea bwabɔ ne koboebeela.

⁴⁸ Baanu ne batasaolaye bitocheba banu ko eena meanda ɛsɔmɔa banu.

⁴⁹ Mee mwɛɛnɛ ndamotomee byamolaa Isanɛ. Motaendeche mo kalya ke Yɛlusalɛma ɛka atachekwe manu nɛ bɔkɛtɛ kotokea kwiyoo.»

Yɛsu osoendwa mwiyoo

⁵⁰ Kusia Yɛsu na koola ne baeyechwa bakɛ mo kalya kɛ Yɛlusalɛma, na kobachaa mɔsɛɛsɛ mwe kalya ke Bɛtania. Aolea abɔ alya, awɛ na koendoa mabɔkɔ mwiyoo, na kɔbatɛchɛa kaowe.

⁵¹ Awɛ mo kɔbatɛa kauwe ne otosambokana nabɔ ne koendwa kwiyoo.

⁵² Ko mbanga yaabɔ na kwisingea nɛ batɔɔtɔka Yɛlusalɛma, metema bɛɛ ne kɛmɛmɔ.

⁵³ Alya, masu masɛ ne bae mɔ Ɛkalu mo koseka Kakua.