Luka 23 - Zimba Nouveau Testament Portions

Yɛsu kombaa kwa Pilatɔ

¹ Kusia bando basɛ be keboo kekoo kye Bayula na kwimana, na kochaa Yɛsu kombaa kwa Pilatɔ.

² Koa, abɔ na komotaeka: «Tosangee ona mondo oe kɔsɔngɔa bando biito baangane ne bakoo ne kobakandea balamboaya molambo kwa Kaisali. Kabee oe mukwitamboa itɛ awɛ ne Kilisito, nombe.»

³ Ko bobo, Pilatɔ na kobocha Yɛsu: «Awɛ ne nombe yee Bayula?» Yɛsu na komosaolea: «Awɛ nɛ ɔsɔɔcha.»

⁴ Ko boa Pilatɔ na kɔɔcha ko bakoo be basia ne ko ndongo yee bando: «Mee sitɔmɔa ko ona mondo bwabea naa nɛ bɔmɔɔsa bwe kɔbɛmba makomo maakɛ.»

⁵ Abɔ na kɔɔtɔsɛa kɔɔcha bokoo bokoo: «Ko njea yee maeyechi maakɛ, ɔtɔsɔɔngɔla bando biito koangana ne bakoo mɔ mɔsɛngɛ ɔɔsɛ we Yulɛa! Wabangoa kɔ mɔsɛngɛ we Kalilaya na kobiolecha na kono koe bae.»

Yɛsu kombaa kwa nombe Ɛlɔlɛ

⁶ Aungwa Pilatɔ maa makomo, na kobabocha: «Ona mondo nɛ mɔɔsɛ we Kalilaya?»

⁷ Acheba awɛ itɛ Yɛsu wachikanaya mɔ mɔsɛngɛ wanyaaya Ɛlɔlɛ, awɛ na komotoma kwa Ɛlɔlɛ. Kɔ kɔmɔa wabɛchaya mɔ mɔsɛngɛ wɛ Yɛlusalɛma mo maa masu.

⁸ Ɛlɔlɛ na kɔmɛma kɔmɔa Yɛsu, kɔmɔa masu mabua waengaya komocheba. Ɛlɔlɛ na kɔmɛma kɔmɔa Yɛsu, kɔmɔa masu mabua waengaya kɔmɔa, ko boa bwaungwaya awɛ maɔngɔ maakɛ. Kabee wakondaya kɔmɔa melendo yaakɛ.

⁹ Awɛ na kobocha Yɛsu makomo mabua, alakini Yɛsu ndaocha kyendɔ.

¹⁰ Mo kea kyaanya, bakoo be basia ne baeyechi be Salia na kɔɔcha nɛ kɔɔcha nɛ bɔkɛtɛ, mo komotaeka Yɛsu.

¹¹ Ko bobo, Ɛlɔlɛ ne bakɔlɔbɔyɔ bakɛ na kɔkyɛta Yɛsu, na kɔmɔsɛka, na komoweka ngubɔ myaachi na kɔmɔɔtɔsa akaɛ kwa Pilatɔ.

¹² Ɛlɔlɛ na Pilatɔ babɛchaya baangani be kaɛ, alakini loa lusu abɔ na kutuuka biɛmba.

Yɛsu osotaekiwa ko kokwa

¹³ Ko boa Pilatɔ na kukumbana ne bakoo be basia ne bakoo bɛ mɔsɛngɛ kɔmɔɔsa ne bando.

¹⁴ Na kobasaolea: «Mosombea na ona mondo mɔ kɔɔcha itɛ bando baangane ne bakoo. Na mee nasomobocha kombanga yee maa makomo kombaa kwinu, mee samɔa ikomo lyabea naa nalyo ko makomo masɛ matomotaekea banu.

¹⁵ Ɔbɛɛ Ɛlɔlɛ na awɛ ndamɔa ikomo lyabea kwakɛ, na kɔ bɔbɔ kɔsɔmɔɔtɔsa awɛ kwito. Ona mondo ndaketa bwabea botokoka awɛ kotaekiwa ne kuchiiwa.

¹⁶ Kɔ bɔbɔ ndamokomoekye kɔmɔngɔ ne namosoole.»

¹⁷ [Ko bitokoyoo biisɛ bye Pasaka Pilatɔ wabakakoeaya mondo ɔmɔɔsa wɛ muyɔɔlɔ.]

¹⁸ Abɔ basɛ na kokandoka kɔmɔɔsa: «Chia ona mondo! Tosoolea Balaba.»

¹⁹ Ona Balaba wakakiwa ne kɔ kɔsɔngɔa bando be mosomba ne ku kuchia mondo otaasi nee ikomo.

²⁰ Pilatɔ, wakonda kosoola Yɛsu, na kɔɔcha kabee ne bando.

²¹ Bando na koseboa kokandoka: «Muchia ko mote we maakanu! Muchia ko mote we maakanu!»

²² Kwibɔngɛa, Pilatɔ na kobasaolea lwa sato: «Boke bwabea boketee awɛ? Mee sitɔmɔa ikomo naa nɛ lɛmɔɔsa letowaena mondo kokwea. Kɔ bɔbɔ, ndamokomoekye myɛsu, kusia ne namɔlɛkɛɛ.»

²³ Bando na koseboa konangameka mauki babɔ mɔ kɔɛngɛa Yɛsu osongoekiwe ko mote we maakanu. Kwibɔngɛa, Pilatɔ na koomaa lekoketa kɔmɔa kubua kwe maoki mabɔ.

²⁴ Kubɔngɛɛ na kuimenya kobaketea bitoekya abɔ.

²⁵ Awɛ na kosoola olya waɛngɛaya abɔ, olya wakakiwa kɔ kɔsɔngɔa bando ne ku kuchia mondo, awɛ na kobalambolea Yɛsu kɔmɔa bamoketee byakondaya abɔ.

Yɛsu ososongoekwa ko mote we maakanu

²⁶ Abɛchaya abɔ mo kochaa Yɛsu ko kwa mosongeeke, na kobanga ɔmɔ mondo Simɔni. Olya Simɔni wabɛchaya mondo we mosomba wɛ Kulɛnɛ. Wabɛchaya mo kotokea kɔ mangɛnɛ, na komwendekya kɔ bɔkɛtɛ mote we maakanu kɔmɔngɔ kwa Yɛsu.

²⁷ Ndongo yee bando babua na koyea Yɛsu. Mwingya mwabɔ kwabɛchaya baa bakachi babua babɛchaya mo komolelea ne lokwa.

²⁸ Abatuukea Yɛsu, na kobasaolea: «Banu baa bakachi be Yɛlusalɛma, moondeleaya mee! Mwilelee banu bɛɛnɛ ne baana binu.

²⁹ Mochebe itɛ, masu matoba bando bataɔchɛ: ‹Baenoka baa baabakachi ne bataasi kɔchɔmya.›

³⁰ Kɔ bɔbɔ, maa masu bando batabangoe kosaolea biembe: ‹Motokelee!›, ne ko bitoo: ‹Motobwekee!›

³¹ Kɔ kɔmɔa ingɛ batɔɔsɔna koketa bobo ko mee oe boe mote mobeese, bitabɛ booni ko banu bae boe mete yaoma?»

³² Amɔsa na Yɛsu, kwabɛchaya bakinɛ bando babee babea metema, kɔmɔa babasongeeke kɔmɔɔsa naakɛ.

³³ Aolea abɔ a iboa lyaitaniwaya «Kabacha ke Motwe», na komosongeeka ko mote we maakanu. Bwakaɛ boa, baa bando babee be bwabea na kosongeekwa, ɔmɔ ko saa ndome, ukinɛ ko saa ngachi.

³⁴ Kusia Yɛsu na kɔɔcha: «Tati, bakwea lokwa kɔ kɔmɔa bacheba bitoketa abɔ.» Bakɔlɔbɔyɔ na koketea ngubɔ chaakɛ kamusalemusale ko komeabanya.

³⁵ Bando baemaa alya mɔ kɔlɔla. Bakoo be Bayula na kɔmɔkyɛta Yɛsu mɔ kɔɔcha: «Waolosa bakinɛ, ano, uiolose awɛ mwɛɛnɛ, ingɛ awɛ ne Kilisito wasɔbɔlwa na Kakua!»

³⁶ Bakɔlɔbɔyɔ na kɔmɔkyɛta mu kwisɛɛna naakɛ na mo komoabea lifai lya chaa.

³⁷ Abɔ na komosaolea: «Ingɛ awɛ ne nombe yee Bayula, iyolosa awɛ mwɛɛnɛ!»

³⁸ Mo nganda mwe motwe waakɛ, kwakunyiwa tuchimba toto: «Ona ne nombe yee Bayula.»

³⁹ Ɔmɔ ko baa bando babea basongeekiwa ko mote we maakanu na kɔbengɛa Yɛsu na kɔɔcha: «Ndɛɛkɔ awɛ Kilisito? Iolola awɛ mwɛɛnɛ, na bae kabee.»

⁴⁰ Munjinakɛ ukinɛ na kolemoka oe naakɛ na komosaolea: «Ndoosi naa nɛ bɔɔba bwa Kakua, ɔbɛɛ oe naakɛ mo manɛnɛ mamɔɔsa?

⁴¹ Koe bae, manɛnɛ mae nɛ mɛ kiinɛkinɛ, kɔ kɔmɔa, tosoamba bikete biito byabea, awɛ ndaketa naa nɛ lɛmɔ lyabea.»

⁴² Kusia na kosaolea Yɛsu: «Ee Yɛsu, ngeyoka atabake awɛ mo boombe bwao.»

⁴³ Yɛsu na komosaolea: «Kiinɛkinɛ natokosaolea, leno leno otaongwe naanɛ kɔmɔɔsa mo Palalisɔ.»

Kokwa kwa Yɛsu

^44-45 Ingaolea mwingya chooba, chooba na koongwa kikute, na alyo ikunyɛ na kotanda mɔsɛngɛ ɔɔsɛ ne koolea mo saa kɛtɛma. Akaɛ alya ngubɔ yabɛmbaya mɔ Ɛkalu na koateka mwingya poo.

⁴⁶ Yɛsu na kokandoka, awɛ na kɔɔcha: «Tati, nasobeka motema waanɛ mo mesani yao.» Kɔmɔngɔ kwɛ kɔɔcha bɔbɔ, motema na kukutuka.

⁴⁷ Kɔ kɔmɔa byaeteka, mokoo we bakɔlɔbɔyɔ na koseka Kakua, na kɔɔcha: «Kuusi bye kwikakanya, ona mondo waba we kiinɛkinɛ!»

⁴⁸ Ndongo yee bando baolea kwa kwamɔɛ byaeteka, na mu kwibaba ne lokwa.

⁴⁹ Ne basɛ bamocheba Yɛsu byatɔba, naanga ne baabakachi bamusindekeaya kotokea kɔ mɔsɛngɛ we Kalilaya, baemana kɔ njɔɔ mɔ kɔlɔla maa makomo.

Yɛsu ɔɔtɛiwa mo manda

⁵⁰ Kwabɛchaya ɔmɔ mondo we chiina lya Yusufu, waba ɔmɔ wee keboo kekoo, mondo we lokani ne we kiinɛkinɛ.

⁵¹ Olya ndabengya byaimenya abɔ ɔbɛɛ bikete bye bamɔ be keboo kekoo. Watoka Alimatɛa mu Yulɛa mo koendea boombe bwa Kakua.

⁵² Awɛ na koya kwa Pilatɔ na kɔɛngɛa lɔkɔba lwa Yɛsu.

⁵³ Kɔmɔngɔ kwe kwikya lɔkɔba lwa Yɛsu ko mote we maakanu, abɔ na kumuchinga mo sanda ya lɛbɛa, na kumusia mo manda yabangoa abɔ mu iwɛ etaasi mondo ndanachekwa amɔ.

⁵⁴ Lyabɛa ne lusu lwa tanu, kombaa kwe sabatɔ.

⁵⁵ Babakachi basindekecha Yɛsu kotokea Kalilaya na koyea Yusufu, abɔ na kɔlɔla manda na kɔkɛngɛyɛa booni bwabeka abɔ lɔkɔba lwa Yɛsu.

⁵⁶ Kusia, abɔ na kɔɔtɔka kwabɔ na kwasangya makuta me sono ne malasi. Abɔ na koendea mbomo yee sabatɔ, boa bwakunyiwa mu salia.