Luka 22 - Zimba Nouveau Testament Portions

Kakongo ke kuchia Yɛsu

¹ Abɛa lusu lwe ketokoyoo kye mikati etaasi ne bisunga bye komeembya itwitaniwa Pasaka ingaolea.

² Bakoo be basia ne baeyechi be Salia na koenga meke njea yee kuchia Yɛsu, abɔ na koongwa nɛ bɔɔba bwe bando.

Yula uswimenya kolamboa Yɛsu

³ Alya ne aingea Isombo mo motema wa Yula waitaniwaya Isikaliɔta, ɔmɔ mo chia ndomwa ikumi na babee.

⁴ Yula na koya kwaungwane ne bakoo be basia ne bakoo be basangi be Ɛkalu ko njea yee awɛ kobalambolea Yɛsu.

⁵ Basɛ na kwimɛma na kuungwana kɔ kɔmɔɛcha tombaambaa.

⁶ Yula na kuimenya akaɛ alya na kobangoa koenga njea ya kolamboa Yɛsu kwabɔ ku bwise.

Yɛsu osolya ketokoyoo kye Pasaka ne baeyechwa bakɛ

⁷ Lusu lwe ketokoyo kye mikati etaasi kɔtɛchiwa bisunga bye komeembya na koolea. Loa lusu lwawaena koyengoa mokoko we Pasaka.

⁸ Yɛsu na kotoma Pɛtɛlɔ na Yɔana na kobasaolea: «Moya kwa sangye biebwa bye ketokoyoo ke Pasaka.»

⁹ Abɔ na komobocha: «Otokonda tomesangyee koni?»

¹⁰ Awɛ na kobasaolea: «Ataingee banu mo kalya kakoo, motasange mondo ɔmɔ oe mo kochaa kebongo kye maache, momoyee ko ndabo elya etaingee awɛ.

¹¹ Motasaolee mwɛɛnɛ we elya ndabo itɛ: ‹Mweyechi otokobocha itɛ koni koe iboa letalee awɛ ketokoyoo Pasaka ne baeyechwa bakɛ.›

¹² Ko boa, otabaangoeche iboa lyanaka lye mo nganda, liusia kosangiwa bwaachi alya ne atasangye banu ketokoyoo kye Pasaka.»

¹³ Abɔ na koya, na kobanga biisɛ boa bwa ɔsɔɔcha Yɛsu, na kosangya ketokoyoo kye Pasaka.

Ketokoyoo ke biebwa bye koeyoka Mwaame

¹⁴ Aolea kea kyanya, Yɛsu na kuchikaa mo kolya ne ndomwa chaakɛ.

¹⁵ Awɛ na kobasaolea: «Naekyee byabua kolya niinu biebwa bye Pasaka kombaa kwe mee kokonja manɛnɛ.

¹⁶ Ko boa, natomosaolea, sikale kabee ketokoyoo ke Pasaka ɛka loa lusu lotale mee elya yee kiinɛkinɛ mo boombe bwa Kakua.»

¹⁷ Kusia na koenda kebacha, na kosekoa Kakua itɛ: «Moende keke kebacha, moabanye asambea baanu,

¹⁸ kɔmɔa natobasaolea banu itɛ sikasɔɛ kabee lifai ɛka ataolee boombe bwa Kakua.»

¹⁹ Kɔmɔngɔ na koenda mukati na kosekoa Kakua, na kumubuka ne kobaabanyea mɔ kɔɔcha itɛ: «Lolo ne lɔkɔba lwaanɛ [losoochiwa ko mbanga yiinu. Moketaye bobo ko kongeyoka.»

²⁰ Kusia kolya, na koenda kabee kebacha, na kɔɔcha: «Keke kebacha ne ilaani leyaleya lya Kakua koetea masu maanɛ mataiteke ko mbanga yiinu.»]

²¹ «Mɔlɔlɛ naanga na olya otambanje oe ana mo kolya amɔsa naanɛ.

²² Kiinɛkinɛ mee Mwaana we Mondo ndakwe ko boa bwakonda Kakua, alakini kaeno ko olya mondo otanamboe!»

²³ Ko boa ndomwa na kobangoa kwibocha asambea abɔ ko kocheba naani otakete ikomo bwe lɛlyɔ.

Naani oe mokoo asambea baeyechwa ba Yɛsu?

²⁴ Kusia baeyechwa ba Yɛsu na kobangoa meango asambea ko kocheba ne naani mokoo asambea abɔ.

²⁵ Yɛsu na kobasaolea: «Binombe be mɛsɛngɛ baanga konyaa bando babɔ kɔ bɔkɛtɛ, na baa batonyaa batwitana ‹batoketa byaachi›.

²⁶ Biisi bwaachi baanu koongwa boa. Biitowaena olya oe mokoo asambea banu, bie bwaachi ɔmɔɛkɛ mɔkɛɛkɛ. Na olya oe mokoo asambea banu, biitowaena ɔmɔɛkɛ boe mokambi wiinu.

²⁷ Ko boa, naani oe mokoo kokoela munjinakɛ? Na olya oe mo kolya ɔbɛɛ olya otomosangyea biebwa? Ko boa mee nae asambea banu boe mokambi wiinu.

²⁸ Banu nɛ babɛɛ naanɛ amɔsa kɔ kɔɛlɛkiwa kwanɛ.

²⁹ Boa bombekee Isanɛ boombe, na mee nasobabekea abo.

³⁰ Kɔmɔa mole nɛ kɔsɔa amɔsa naanɛ mo boombe bwaanɛ. Bwakaɛ, banu ne batachikane mo toona twe nombe kɔ kɔbɛmba makomo me biɔngɔ ikumi na bibee bye Isilaɛli.»

Yɛsu osochekya itɛ Pɛtɛlɔ otamotone

³¹ Yɛsu na kosaolea Simɔni: «Simɔni, Simɔni! Ungwa: Isombo lɛsɔɛwa njea yee kɔmɔpɛpa bɔtɔpɛpa abɔ nganɔ mɔ lɔmɛsi.

³² Mee, nabɛɛ mukwiyaya kwa Kakua ko mbanga yao, kɔmɔa nduchimbechaya iekekeo. Na awɛ ataɔtɔkɛ awɛ kwanɛ kabee, sekemeka babotwa nao.»

³³ Pɛtɛlɔ na komosaolea: «Ee Mwaame, nae bwisangye kwingea mo kekako amɔsa nao naa ne kokwa ko mbanga yao.»

³⁴ Yɛsu na komosaolea: «Kiinɛkinɛ natokosaolea, ɛɛ Pɛtɛlɔ, leno kombaa kwe ngɔkɔ kobeengana otabɛ osondona ngongobwa chisato, itɛ ndotonjeba.»

Tombaambaa, lokombo nɛ kɛyɔma

³⁵ Kusia Yɛsu na kobocha baeyechwa bakɛ: «Alya amotomee mee kotasi tombaambaa, ɔbɛɛ lokombo, ɔbɛɛ bilato, moenee eke?» Abɔ na komosaolea: «Imbɔɔ.»

³⁶ Kwibɔngɛɛ na kobasaolea: «Ko leno, olya oe ne tombaambaa twake, otoende, ne oe ne lokombo, oloende, ne olya otaasi nɛ kɛyɔma, oolekye ngubɔ yaakɛ na kokeola.

³⁷ Kiinɛkinɛ natobasaolea bie bwaachi itɛ maa makomo makunyewa mu tuchimba twa Kakua mangolelee. Na maa makomo matɔɔcha itɛ: ‹Bamobaekee amɔsa ne batoketa bwabea.› Kɔmɔa makomo matɔndɔa, mangaolea kɔ kɔbɔnga kwamɔ.»

³⁸ Baeyechwa bakɛ na komosaolea: «Ee Mwaame, toe ne mbao chibee.» Awɛ na kobasaolea: «Chiokoka.»

Yɛsu usuiyaya kwa Kakua ko keembe kye Misɛituni

³⁹ Yɛsu na koola na koya ko keembe kye Misɛituni, bwaketaya awɛ. Baeyechwa bakɛ na komoyea.

⁴⁰ Aolea awɛ ko lea iboa, awɛ na kobasaolea: «Mwiyaye kwa Kakua, kɔmɔa mɔɛlɛkiwaya.»

⁴¹ Kusia na kɔbaisɔka mu ilɛba lye kokosoa ngone. Na kɔkɔma malu makɔngɔ ne kwiyaya bobo:

⁴² «Ee Tati, wasokonda, ndosea kebacha ke mama manɛnɛ! Ataasi kokonda kwanɛ koketeke, kokonda kwao.» [

⁴³ Kusia ɔmɔ moombo na koba kwiyoo na kumwikea nɛ kɔmɔɛcha motema.

⁴⁴ Yɛsu na kuungwa lobaba lwatɔba, na kɔtɛcha kwiyaya ne motema we bosongo, byɛmɛnya na kumwiteka ase boe matɔkɔchi me masi.]

⁴⁵ Asia awɛ kwiyayaa, na kotaoka ne kɔɔtɔka kabee kwabɛchaya baeyechwa bakɛ na kobasanga basɔkyɛsa, kɔmɔa babɛchaya ne kelele ko metema.

⁴⁶ Na kobabocha: «Ko eke kɔtɔkyɛsa banu? Mobwoke ne kwiyaya kwa Kakua mwingeaya mɔ kɔɛlɛkiwa!»

Kubundwa kwa Yɛsu

⁴⁷ Yɛsu wabɛa ndanasiecha kɔɔcha, lɔla, ndongo mekataa na koolea, kombaa. Kombaa kwabɔ kwaba Yula ɔmɔ ko baa ikumi ne babee, na kumwisɛɛnɛa Yɛsu itɛ ɔmɔɛnyɛ.

⁴⁸ Yɛsu na komosaolea: «Yula, osonamboa mee Mwaana we Mondo ko njea yɛ kɔɛnya?»

⁴⁹ Baa baeyechwa, amɔa abɔ makomo mangaketeka, na kobocha Yɛsu: «Mwaame, tɔbabɛmbɛ na biyɔma?»

⁵⁰ Ne akaɛ alya, ɔmɔ waabɔ na kokomoa mokambi we musia mokoo ne kɔmɔbɛmba itwe lyaakɛ lee saa ndome.

⁵¹ Yɛsu na kobasaolea: «Mɔlɛkɛɛ! Bia biokoka!» Kusia na kɔkɔbɔcha itwe lya olya mondo wabɛmbiwa, na komoolola.

⁵² Kusia Yɛsu na kutulukea akaɛ ko bakoo be basia, ne bakoo be basangi be Ɛkalu ne bakoo bɛ mɔsɛngɛ we Bayula baa babaka kwamubunde: «Mosobaka ne biyɔma, nɛ mɛnɔmbɔ boe bae mo koya kwabunde ngiba?

⁵³ Nabɛchaye niinu masu masɛ mɔ Ɛkalu, naa ne mondo ɔmɔ ndambunda; keno kyanya ne kinu, kabee ne kyanya ke konyaa ke mokoo we ikunyɛ.»

Pɛtɛlɔ osotona Yɛsu

⁵⁴ Ko boa abɔ kumubunda Yɛsu ne komochaa mo ndabo ya musia mokoo, Pɛtɛlɔ na komoyea kwɛ njɔɔ.

⁵⁵ Mwingya kyambaa ke mokoo we mapatili bakɔcha toya. Bando bachikanaya mɔ kɔɔndaa, Pɛtɛlɔ na awɛ wabɛchaya nabɔ.

⁵⁶ Ngambi ɛmɔ yee mwamokachi na kɔmɔa Pɛtɛlɔ mɔsɛɛsɛ mwe toya. Awɛ kɔmɔkɛngɛyɛa na kɔɔcha: «Mɔlɔlɛ ona na awɛ wabɛcha amɔsa naakɛ.»

⁵⁷ Pɛtɛlɔ wakɔna nɛ kɔɔcha: «Ɛɛ nɛnɛ, sitocheba ona mondo.»

⁵⁸ Kɔmɔngɔ, mondo ukinɛ, na kɔmɔa Pɛtɛlɔ na komosaolea: «Awɛ akaɛ oe ne ɔmɔ waabɔ!» Pɛtɛlɔ na kɔɔcha: «Mee siisi ɔmɔ waabɔ!»

⁵⁹ Abe abe koolea keeko kɛmɔɔsa, ukinɛ mondo na kumusingeesha ne mɛɔcha: «Kiinɛkinɛ, ona mondo wabea amɛamɔɔsa naakɛ; kɔ kɔmɔa awɛ oe ne mondo wɛ mɔsɛngɛ we Kalilaya.»

⁶⁰ Pɛtɛlɔ na kɔɔcha: «Sitocheba bie awɛ mɔ kɔɔcha!» Akaɛ alya okee ndanasia kɔɔcha, moome we ngɔkɔ na kobeengana.

⁶¹ Mwaame na kutuuluka na kɔlɔla kwee Pɛtɛlɔ. Pɛtɛlɔ na koeyoka bya mosaolea Mwaame itɛ kombaa kwe moome we ngɔkɔ kɔbeengana, ɔtabɛ osondona ngongobwa chisato!

⁶² Pɛtɛlɔ na koola anjɛ yee kyambaa mo kolela kwe lobaba.

Bando baɔkyɛta Yɛsu

⁶³ Baa bando basanga Yɛsu na kɔmɔkyɛta ne komokomoa.

⁶⁴ Na kumuchiba miisɔ na komobocha: «Cheba ano, ne naani okokomoee?»

⁶⁵ Na kumusia lɔkɔba nɛ bitɔndɛ.

Yɛsu kombaa kwe keboo kekoo kye Bayula

⁶⁶ Akya butu, bakoo be Bayula, ne bakoo be basia ne baeyechi be Salia na kukumbakana. Bando na kochaa Yɛsu kombaa kwe Keboo ke baa Bakoo.

⁶⁷ Baa bakoo na komobocha: «Kende awɛ ne Kilisito, tosaolea.» Yɛsu na kobasaolea: «Kende nasobasaolea mookangimenye,

⁶⁸ na mee kende nasomobocha ikomo mookanjaolee.

⁶⁹ Kobangoa keno kyanya, mee Mwaana we Mondo ndachikane kombanga yee saa ndome ya Kakua we Bɔkɛtɛ.»

⁷⁰ Basɛ na komobocha: «Awɛ ne Mwaana wa Kakua?» Awɛ na kobasaolea itɛ: «Baanu bɛɛnɛ ne basɔɔcha.»

⁷¹ Kwibɔngɛɛ abɔ na kɔɔcha: «Totaenge kocheba eke kabee? Tusuiyungea bae bɛɛnɛ ko kanywa kaakɛ!»