Luka 21 - Zimba Nouveau Testament Portions

Keochwa kye mwalyango wakɛna

¹ Lɔmɔ lusu lwabɛchaya Yɛsu mɔ Ɛkalɔ mɔ kɔlɔla mɔsɛɛsɛ mwaakɛ na kɔmɔa ngunji bae mɔ kɔtɛcha biochwa mo kabokoo ke biochwa byɛ Ɛkalu.

² Na kɔmɔa akaɛ mwalyango ɔmɔ wakɛna mɔ kɔtɛcha bingɔlɔngɔlɔ byakɛ bibee bye tombaambaa mo kaa kabokoo.

³ Awɛ na koocha: «Kiinɛkinɛ, natomosaolea, ona mwalyango wakɛna osoocha bwaachi kokoela bakinɛ basɛ,

⁴ Kɔmɔa baa basɛ basoocha mabɛmbwa me ikonja lyabɔ. Awɛ, mɔ kɔkɛna kwakɛ osoocha biisɛ byabɛchaya naakɛ kɔ mwɛchɔ waakɛ.»

Yɛsu ɔsɔɔcha kɔ kɔɔnɛka kwe Yɛlusalɛma nɛ kɔɔtɔka kwakɛ

⁵ Bando bamɔchi baɔchaya ko mbanga yɛ Ɛkalu, ne ko kochacha kwɛ mawɛ ne biemo byaochiwa kwa Kakua. Yɛsu na kobasaolea:

⁶ «Kotabɛ kɛmɔ keeko ku bia biemo bitɔmɔa baanu bitabondolwe; kokasae iwɛ mo nganda mwe likinɛ.»

Mayombe mataongwe kombaa kwɛ kɔbɔnga kwɛ mɔsɛngɛ

⁷ Abɔ na komobocha: «Mweyechi, biɔ biisɛ bitaketeke mo keke keeko? Ne keke kisinga ketatochebekye itɛ bii biisɛ bingaketeka?»

⁸ Yɛsu na kobasaolea: «Mwiyange, mondo ndamoongaya, kɔmɔa babua batabaake mu chiina lyanɛ na kɔɔcha: ‹Mee ne Kilisito!› Bwakaɛ: ‹Keeko kesoolea! Mobaimenyaya!›

⁹ Ataungwe baanu batɔɔcha bye bita ne bye bingumbua, mootenaya. Kɔ kɔmɔa bia biisɛ bitamɔɛkɛ kombaa; bia bitɔmɔɛsa itɛ kɔbɔnga kwɛ mɔsɛngɛ kosoolea akaɛ alya.»

¹⁰ Kusia Yɛsu na koseboa kɔɔcha: «Mɔtamɔɛ kɛbɛɔ nɛ kɛbɛɔ batachiane, nombe ne nombe chitachiane.

¹¹ Kotaongwe Katɛndɛa kanaka kataongwe mbanga chisɛ, njaa ne kembombo kɛtamɔɛkɛ mo maboa mabua. Bikangecha ne bisinga byanaka bitamɔɛkɛ kotoka kwiyoo.

¹² Kombaa kwe bibi biisɛ koolea, batamubunde nɛ kɔmɔmɔnya manɛnɛ, ne komoocha kombaa kwe bakoo be masinakɔki kukwiyɔchɛa kombaa kwe nganya ne komokosoa mo kekako. Kabee motaolechwe kombaa kwe nombe ne bakoo bɛ mɔsɛngɛ ku chiina lyanɛ.

¹³ Bia biemo bitamoolelee kɔ kɔmɔɛcha kyaanya kyɛ kɔɔcha na abɔ ko mbanga yaanɛ.

¹⁴ Ko bobo muungwe ne motema wa keema ndekwikuula koenga bike bitaɔchɛ banu.

¹⁵ Kɔ kɔmɔa mee mwɛɛnɛ ne otamɔɛchɛ baanu mɛɔcha ne lokani, naa ne baangani niinu bakaɔsɔnɛ koangana niinu ne komoangecha.

¹⁶ Motaochiwe naa ne baboti binu, ne babotwa niinu, ne basambe niinu ne banjininu. Ne bamɔ asambea banu batachiiwe.

¹⁷ Mɔtakɔniwɛ ne bando basɛ kombanga yee chiina lyanɛ.

¹⁸ Kuusi naanga ne losoke lɔmɔɔsa lwe metwe yiinu lotachimbee.

¹⁹ Mɔkɔɛkaya kokemya metema, kɔmɔa ko elya njea motaolole mwɛchɔ winu.»

Yɛsu osochebekya kɔɔnɛka kwɛ Yɛlusalɛma

²⁰ «Atamɔɛ baanu bakɔlɔbɔyɔ basokombya Yɛlusalɛma, mochebe itɛ kɔɔnɛka kwakɛ kungaolea.

²¹ Ko bobo, batabɛ mukuchikaa mo mosomba we Yulɛa bachokee ku biembe. Na baa batasangwe monda mwe mosomba we Yɛlusalɛma, baole. Na baa bataongwe ko masio baaɔtɔkaya kabee ko kalya!

²² Kɔmɔa maɔ masu matabɛ masu me mayombe kotoka kwa Kakua, ko bobo makomo masɛ makunyewa mu tuchimba twa Kakua maketeke.

²³ Lokwa, ko baa bakachi batabɛ ne maeme ne batɔnyɔmya! Kɔ kɔmɔa olya mɔsɛngɛ otakonje manɛnɛ mabua na Kakua otaangoeche moemo waakɛ ko bando ba olya mɔsɛngɛ.

²⁴ Bamɔ batachiiwe nɛ kɛyɔma, ne bakinɛ batabeoswe mu ikinɛ mɛsɛngɛ ɛɛsɛ. Yɛlusalɛma itachikaniwe nɛ kikinɛ kɛbɛɔ bataasi kocheba Kakua bɛ ɛka keeko kye konyaa kwabɔ kisie.»

Kɔɔtɔka kwe Mwaana we Mondo

²⁵ «Kɔtabɛ bisinga kɔmɔɛka monda mwe chooba, monda mwe songe ne monda mwɛ sɔɔkɔta. Na moono mɔ mɔsɛngɛ, bando bataongwe mɔ manɛnɛ mabua nɛ bɔɔba kɔmɔa kɔtabɛ mukunguo nɛ ndɛngumya che kichibachiba.

²⁶ Bando bataye bibai nɛ bɔɔba mɔ kɔlɔla bwabea botaolelee mɔsɛngɛ, kɔ kɔmɔa biisɛ bie nɛ bɔkɛtɛ kwiyoo bitachinganywe.

²⁷ Ko bobo batambɔɛ mee Mwaana we Mondo mo koba mwingya mwiyoo ne bɔkɛtɛ bwabua ne boombe.

²⁸ Atabangoe maa makomo kɔmɔɛka, mobyose metwe ne mwiyɛchɛ metema, kɔmɔa, keeko ke kooloka kwinu kingaolea.»

Boombe bwa Kakua buswisɛɛna

²⁹ Kɔmɔngɔ kwɛ bɔbɔ, Yɛsu na kɔtɛchɛa baeyechwa bakɛ keke kisimo: «Mɔkɛngɛngɛyɛɛ bwaachi mote we mutini ne mete ikinɛ ɛɛsɛ.

³⁰ Atɔmɔa banu bisɛsi bitae kɔtɔmbɛa, nɛ mɔsɔɔcha itɛ njɔɔ ingaikela.

³¹ Bwakaɛ boa, alya atamɔɛ baanu maa makomo masoolea, mochebe itɛ boombe bwa Kakua bungaolea.

³² «Kiinɛkinɛ, natomosaolea itɛ lee ibota lee ana lekaete kombaa kwe makomo masɛ koketeka.

³³ Sɛnga ne iyoo bitaete, makomo maanɛ maakaete.»

Koendecha kɔɔtɔka kwa Yɛsu

³⁴ «Mwilɔlɛ banu bɛɛnɛ, metema yiinu iikuulaya ne ikaa nɛ bɔngɔlwa, banu kwikuula ko mbanga yee mwɛchɔ wiinu. Ingɛ ndemwaketa bɔbɔ, lusu lwɛ kɔɔtɔka kwanɛ mee Kilisito lotamoolelee kotasi banu kocheba

³⁵ bwakaɛ boa butubunda keongwa, ne botabaolelee chibika lɔɔ lusu ko bando baasɛ bɛ mɔsɛngɛ.

³⁶ Muchikane mɔ kɔlɔla ne kwiyaya kotasi kɔlɛkɛa, ne Kakua ɔmɔɛchɛ bɔkɛtɛ bwɛ kɔɛngamaa makomo masɛ mataolelee, ko koketa boa, motaɔsɔnɛ koemaa kombaa kwe Mwaana we Mondo.»

³⁷ Mo monyanya, Yɛsu wabɛchaya mo koeyecha mɔ Ɛkalu ne butu, wayechaya kwa kyɛsɛ ko keembe kye Misɛituni.

³⁸ Mɔkyɛɔ, bando basɛ na bamosangaya mɔ Ɛkalu ku kumwiungwecha.