Luka 19 - Zimba Nouveau Testament PortionsYɛsu usuingea mo ndabo ya Sakayɔ 1 Aingea Yɛsu mo kalya ke Yɛlikɔ, na kokasaoka. 2 Alya abɛchaya mondo ɔmɔchi we chiina lya Sakayɔ. Olya Sakayɔ wabɛchaya mokoo we batolamboesa molambo, ne wabea ngunji. 3 Wakonda kɔmɔa Yɛsu, ndebyaɔsɔnɛka kɔmɔa waba ne kyema kyaiyea ne kubua kwe bando. 4 Ko bobo awɛ na kochoka mbeo kombaa na konena ko mote we mukuyu kɔ kɔmɔa Yɛsu otaetee mo elya njea. 5 Aolea Yɛsu alya, awɛ na koelalaa kwiyoo, na kosaolea Sakayɔ: «Ee Sakayɔ, ika chaa chaa, kɔ kɔmɔa leno ndaolee ko ndabo yao.» 6 Sakayɔ na kwika chaa chaa, na kɔmɔsɛkɛa nɛ kɛmɛmɔ. 7 Amɔa bando bɔbɔ, abɔ na kɔɔcha mo mangunungunu: «Osoyaka kwaingee mo ndabo yee mondo wa bea!» 8 Sakayɔ na koemaa mwema kombaa kwa Mwaame na komosaolea: «Mwaame, lɔla, ndaɛchɛ bakɛna keba kyɛ byɛndɔ byaanɛ, ne ingɛ nabakoe mondo keemo kyaakɛ mɔ kɔmɔɛnga, ndamɔɔtɔsɛɛ akyɔ ngongowa chinachi.» 9 Yɛsu na kɔɔcha: «Leno, kooloka kosoolea mo ena ndabo; kɔ kɔmɔa ona Sakayɔ bwakaɛ ne we ibota lya Abulaamu. 10 Kɔ kɔmɔa itɛ, mee Mwaana we Mondo nabee ne kwaenge, ne kwaolole oolya wachimbea.» Kisimo kye ngambi ikumi ( Mat 25:14-30 ) 11 Abɛchaya bando mu kwiyungweecha maɔ makomo, Yɛsu na kɔbatɛchɛa kabee kisimo kɔ kɔmɔa ungaingea Yɛlusalɛma, na baa bando baningaya itɛ boombe bwa Kakua bungamɔɛka ano ano. 12 Awɛ na kɔɔcha: «Ɔmɔchi mondo wee kɛɔngɔ ke boombe, wayaka kɔ lwɛndɔ kɔ mɔsɛngɛ wɛ njɔɔ kwaɛwɛ bokoo, kusia na kɔɔtɔka. 13 Kombaa kwe kotaoka, awɛ na kwitana ikumi mo baa bakambi bakɛ, na kɔbaɛcha kingɔlɔngɔlɔ kye tombaambaa, ne kobasaolea: ‹Mobotekye too tombaambaa ɛka ataolee mee.› 14 Olya mondo wakɔniwa ne bando bɛ mɔsɛngɛ waakɛ. Kɔ bɔbɔ na kotoma menande kwamoyee bayaɔcha itɛ: ‹Twɛchɛ olya mondo kotonyaa.› 15 «Naa nɛ bɔbɔ, awɛ na kobekwa nombe, na kɔɔtɔka kɔ mɔsɛngɛ waakɛ. Kɔmɔngɔ na kwitana baa ngambi chaakɛ cha abanyea awɛ byɛndɔ kɔmɔa ochebe ɔɔsɛ waabɔ wakonja sebo yee tombaambaa tonga. 16 Aolea we kombaa na kɔɔcha: ‹Ee Mwaame, kambaambaa kasobotekya tukinɛ ikumi.› 17 Nombe na kɔɔcha: ‹Mokambi mwaachi, ɔbɛɛ we kobaelwa kɔ byɛndɔ bikɛɛkɛ, nasɔkɔɛcha kunya mesomba ikumi.› 18 Aolea mokambi wabee na kɔɔcha: ‹Ee Mwaame, kambaambaa kao kamɔsa kambɛchɛɛ awɛ, kaobota tukinɛ totanu.› 19 Nombe na komosaolea: ‹Na awɛ kabee, naɔkɔɛcha konyaa tolya totanu.› 20 Kusia, ukinɛ mokambi na koolea na kɔɔcha: ‹Ee Mwaame, lɔla kambaambaa mbaa kao, nakaɔngɛɛ mo mu kitambaa, 21 Nakotenee kɔmɔa waanga mondo wachoa, otoenda bitaasi awɛ ndwasia, otokaola bitaasi awɛ ndwabyaa.› 22 Nombe na komosaolea: ‹Awɛ mokambi wa bea! Nasokubundea kɔ mɛɔcha yao; wacheba itɛ mee ne mondo wa koba, otoenda bitaasi mee sasia, ne kokaola bitaasi mee sabyaa; 23 ko eke ndwabeka tombaambaa twaanɛ mo bangi? Alya a kɔɔtɔka kwanɛ ningasanga tosobota tukinɛ monganda.› 24 Ko boa kea kenombe na kosaolea babɛchaya alya: ‹Momobakoe kaa kambaambaa mbaa kamɔsa, nɛ kɔɛcha olya oe ne tombaambaa ikumi.› 25 Abɔ na komosaolea: ‹Mwaame, olya otae ne tombaambaa ikumi!› 26 Awɛ na kobasaolea: ‹Batakondoele olya oe ne keemo, alakini ko olya otaasi ne keemo, bataende naa nɛ kakɛɛkɛ kaɛ naakɛ.› 27 Mo leno, ko baa baangani naanɛ bataasi ndebakonda mee kobanyaa, mobabese mobachie kombaa kwe miisɔ maanɛ.» Yɛsu usuingea mu Yɛlusalɛma ( Mat 21:1-11 ; Mali 11:1-11 ; Yɔa 12:12-19 ) 28 Kɔmɔngɔ kwɛ kɔɔcha maa makomo, Yɛsu na kɔɛnda kombaa kwe ndongo mo konena Yɛlusalɛma. 29 Aisɛɛnɛa awɛ kalya ke Bɛtɛfayɛ ne ke Bɛtania, mɔsɛɛsɛ mwe keembe kye Misɛituni, Yɛsu na kotoma baeyechwa bakɛ babee, na kobasaolea 30 na kobasaolea: «Moye mo kalya kaɛ kombaa kwinu; ataingee banu amɔ, motasange mwaana we mbonda ookakiwa, otaasi mondo ndanamokobea, momosoole ne kombea naakɛ. 31 Ingɛ mondo osobabocha: ‹Ko eke kotomosoola banu?›, motamosaolee itɛ: ‹Mwaame otokonda komokambekya.›» 32 Baa batomiwa na koya, na kosanga biemo bwabasaolea Yɛsu. 33 Abɔ mo kosoola mwaana we mbonda, bɛɛnɛ bao na kobabocha: «Ko eke kotosoola banu mwaana we mbonda?» 34 Abɔ na kobasaolea itɛ: «Mwaame otokonda komokambekya.» 35 Abɔ na kobea Yɛsu na olya mwaana we mbonda, na koanja ngubɔ chabɔ mo nganda mwaakɛ, na kokobecha Yɛsu mo nganda mwaakɛ. 36 Abangoa awɛ kɔɛnda, bando na koanja ngubɔ chabɔ mo njea. 37 Aba awɛ ungaolea Yɛlusalɛma, mɔ mɔngɔɔmɔka we keembe kye Misɛituni, ndongo ɛɛsɛ yee baeyechwa, mɔ kɛmɛmɔ, abɔ na koseka Kakua ne chuuki lekoo ko bisinga biisɛ byamɔna abɔ. 38 Abɔ na kɔɔcha: «Oelelekiwe Nombe etobaka ku chiina lya Mwaame! Nyaa eongwe mwiyoo, na Kakua osekiwe!» 39 Bafalisayɔ bamɔchi babɛchaya mo ndongo na kosaolea Yɛsu: «Mweyechi kandokea baeyechwa bao!» 40 Yɛsu na kɔɔcha: «Natobasaolea baanu: kende baa bando basonyamea, mawɛ matakandoke!» Yɛsu osolelea Yɛlusalɛma 41 Abɛa Yɛsu ungaolea mo mosomba we Yɛlusalɛma, ne amɔmɔa awɛ na kobangoa komolelea. 42 Nɛ kɔɔcha: «Awɛ ungacheba lusu lwa leno keemo ke kokobesea nyaa! Mo kee kyanya, keswisekwa ku miisɔ mao. 43 Kɔ kɔmɔa, masu matakoolelee, atakokombee baangani nao kukukuchianekya. Atasɛngɛ abɔ moota we kwikɛnga mɔsɛɛsɛ mwao, ne kukukungunyeka mbanga chisɛ. 44 Batakɔɔnɛ, awɛ ne bando bao. Na abɔ baakasie iwɛ mo nganda mwe iwɛ, kɔ kɔmɔa ndwacheba kyanya kebee Kakua kwakoolole.» Yɛsu usulikita batosombya mɔ Ɛkalu ( Mat 21:12-17 ; Mali 11:15-19 ; Yɔa 2:13-22 ) 45 Yɛsu na kwingea mɔ Ɛkalu, na kulikita baa basombyaya, 46 na kobasaolea itɛ: «Byakunyiwa mu tuchimba twa Kakua: ‹Ndabo yaanɛ etaongwe ndabo yee kwiyayea.› Banu mosometuula kuungwa iboa lye ngiba.» 47 Yɛsu waeyechaya masu masɛ mɔ Ɛkalu. Bakoo be basia bakoo, baeyechi be Salia, ne bakoo bɛ mɔsɛngɛ, babɛa mo koenga njea yee kumuchia. 48 Ndebakonja njea yee kumuchia kɔ kɔmɔa bando basɛ babɛchaya mu kumwiungwecha. |
©2022 Seed Company in coordination with Forum Communautaire des Traducteurs de la Bible et Alphabétisation
The Seed Company