Baɛfɛsɔ 5 - Zimba Nouveau Testament Portions

Kuchikaa mɔ kyɛɛngɛ

¹ Momoeye Kakua, kɔmɔa moe ne baana batokonda awɛ;

² Moongwe mo kokondana baanu bɛɛnɛ na bɛɛnɛ boa bwatokonda Kilisito. Waocha mwɛchɔ waakɛ kombanga yiito bwe keochwa ne kɛkyɔ keochwa kye kutumba ko masabau, ketoocha ilumba lyaachi lɛtɔmɛma na Kakua.

³ Baanu ne bando ba Kakua. Ne ko boa, Isɛmi ne bikinɛ bye ikɔya ɔbɛɛ ketama, biitowaena kuungweka asambea banu.

⁴ Kabee, mɛɔcha yee masɔni, yee meango, mɛɔcha etaasi kowaena, maatowaena kɔɔchiwa asambea banu, kyaachi ne koseka Kakua.

⁵ Mochebe bobo: be bwambya, be ikɔya, be ketama baasi ne moanda otakonje abɔ mo boombe bwa Kilisito na Kakua. Kɔmɔa ketama ne njea yee kwiyaya ku ngisi.

⁶ Bikete bwe bibi ne bitusukua Kakua oongwe ne kiichi ko baa batɔkɔna kɔmɔnyɛmya. Ne ko boa mondo ndamoongaya ne makomo me bokata.

⁷ Mwisambyaya ne bando bwe baa.

⁸ Kaɛ kaɛ mwabɛchaya ikunyɛ, mo leno motae kyɛɛngɛ monda mwa Mwaame; ne ko boa mɔɛndɛ bwe baana bɛ kyɛɛngɛ.

⁹ Bimuka bye kyɛɛngɛ ne bwaachi ne kiinɛkinɛ.

¹⁰ Mwifɛkɛɛnyɛ koenga bia bitwimɛma na Mwaame.

¹¹ Nde kwisambya ku bikete bye kanyanya bye ikunyɛ, Baanu mubiile paa paa.

¹² Kɔmɔa bia bitoketa bando mwikunyɛ, tutubiungwa masɔni naanga ne kubiɔcha.

¹³ Bia biemo kende bisobooliwa, bitɔmɔɛka paa paa kɔ kyɛɛngɛ.

¹⁴ Bia biisɛ bisobooliwa kɔ kyɛɛngɛ, bitoongwa ne kyɛɛngɛ. Ne kɔ bɔbɔ bitɔɔchwa: «Byoka awɛ ɔtɔkyɛsa! ubuka ko bakwo, Kilisito otakumunekee.»

¹⁵ Mwilɔlɛ bwaachi bɔtɔɛnda baanu. Mɔbɛchaya bwe bando bataasi ne lokani, mɔɛndɛ bwe bando be lokani.

¹⁶ Mokokeele keke keeko, kɔmɔa mama masu ne mabea.

¹⁷ Ko bobo moenaya lokani, mwifɛkɛɛnyɛ kocheba bia bitokonda Mwaame mɔbɛ mukubiketa.

¹⁸ Mɔkɔlwaya ne malu, matochaa bando ko bwabea, mochekiwe ne Motema wa Ama.

¹⁹ Mɔchɔbwɛ wiinu oongwe we kɔtɛchana motema, mo koemba nembo che koeleleka Mwaame. Ne chikinɛ nembo che komoseka, chitotoka ko Motema wa Ama. Momoembee ne komoseka ne motema wiinu ɔɔsɛ.

²⁰ Ko keeko kɛsɛ mɔbɛchayɛ mɔ kɔɔcha isili kwa Kakua Tati we biisɛ, mu chiina lya Mwaame wiito Yɛsu Kilisito.

Bakachi ne baome

²¹ Mɔnyɛmyanɛ baanu bɛɛnɛ na bɛɛnɛ, kɔ bɔnyɛmu boe niinu kwa Kilisito.

²² Baanu bakachi, mɔnyɛmyɛ baibinu, boa bɔtɔnyɛmya baanu Mwaame.

²³ Kɔmɔa moome ne motwe we mwamokachi, bwakaɛ boe Kilisito motwe we Kanisa. Kilisito ne Moolochi we kaa Kanisa, kae mobee waakɛ.

²⁴ Bwakaɛ boa bɔtɔnyɛmya Kanisa kɔnyɛmya Kilisito, bwakaɛ boa baabakachi banyɛmyɛ baibabɔ ku biemo biisɛ.

²⁵ Na baanu babaome, mokonde bakachi binu, boa bwakonda Kilisito kokonda Kanisa, ne koolea mukwiocha awɛ mwɛɛnɛ kombanga ya akɔ.

²⁶ Waketa bɔbɔ, kɔmɔa okabeke ka ama, ne kaɔywa ne maache ne koetea Ikomo.

²⁷ wakonda kwiangwecha awɛ mwɛɛnɛ Kanisa kachachia, ka ama, kataasi ne kangɔnjɔ, kataasi ne ikɔya ɔbɛɛ mobanji, ɔbɛɛ kataasi ne bwabea bukinɛ.

²⁸ Ne ko boa baa baome okonde bakachi babɔ botokonda abɔ mobee waabɔ abɔ bɛɛnɛ. Kɔmɔa olya otokonda mokachi waakɛ utwikonda awɛ mwɛɛnɛ.

²⁹ Kɔmɔa kuusi mondo ɔtɔkɔna mobee waakɛ, waanga ne komolesa, ne komokongoseka bwaachi, boa botoketea Kilisito Kanisa,

³⁰ kɔmɔa, bae toe ne bibando bye mobee waakɛ.

³¹ Tuchimba twa ama tɔtɔɔcha bobo: «Bia ne bitoketa mwamoome kosambokana na isakɛ na inakɛ, ne kwisambya ne mokachi waakɛ. Basɛ babee batabɛ lɔkɔba lɔmɔɔsa.»

³² Koe myanda mekataala yaisama mo maa makomo, kwanɛ mee natɔɔcha itɛ ne Kilisito ne Kanisa.

³³ Bitokoka kwinu bwakaɛ, mwamoome ɔɔsɛ okonde mokachi waakɛ butuikonda awɛ mwɛɛnɛ, ne mwamokachi ɔnyɛmyɛ ibakɛ.