Bakalatia 6 - Zimba Nouveau Testament Portions

Moendeane misiɔ banu bɛɛnɛ na bɛɛnɛ

¹ Babotwa naanɛ, ingɛ mondo usubundeka mo bwabea bɔɔsɛ, banu bae ne Motema wa Ama wa Kakua, mɔmɔɔtɔsɛ bɔkɛbɔkɛ ne motema wa ɔla. Mondo ɔɔsɛ asambea baanu uilɔlɛ awɛ mwɛɛnɛ, kɔmɔa na awɛ ndaoleaya mo kokea mo bwabea.

² Mochaeane misiɔ banu bɛɛnɛ na bɛɛnɛ, mo koketa bobo, motanyɛmyɛ Salia ya Kilisito.

³ Kɔmɔa, ingɛ mondo usuininga itɛ awɛ ne otobaelwa lwa koko ne awɛ ndaasi kyɛndɔ, utuiyonga awɛ mwɛɛnɛ.

⁴ Mondo ɔɔsɛ ɔlɔlɛ bikete byakɛ mwɛɛnɛ; ingɛ oe ne kye kuitombeka, uitombeke ko bikete byakɛ awɛ mwɛɛnɛ, ataasi kuilengeka ne mondo ukinɛ.

⁵ Kɔmɔa, mondo ɔɔsɛ otachae musiɔ waakɛ awɛ mwɛɛnɛ.

⁶ Olya otoeyechwa Ikomo lya Kakua otokoka koabanya biemo byakɛ biisɛ na olya otomoeyecha.

⁷ Mwiiongaya: Kakua ndaasi we kɔnyɛkwa; mondo otokaola ne byabyaa awɛ.

⁸ Kɔmɔa ingɛ mondo osobyaa awɛ mwɛɛnɛ kɛ lɔkɔba, otakaole bimuka bitotoka kɔ lɔkɔba, nɛ kɔɔcha lokwo. Olya wabyaa bitokonda Motema wa Ama, otakaole bimuka bitotoka ko Motema wa Ama nɛ kɔɔcha, mwɛchɔ we meombo.

⁹ Toketaye byaachi kotasi kɔkɔɛka. Kɔmɔa totakaole mo keeko ketokoka, kende ndetwakɔɛka.

¹⁰ Ko bobo, kende tookonja kyaanya ke koketa byaachi, toketaye bando basɛ byaachi, kɛtɛchɛ babotwa niito be iekekeo.

Maani mɛ kɔbɔnga

¹¹ Mɔlɔlɛ botobakunyea mee mwɛɛnɛ ne kɔ kɔbɔkɔ kwanɛ tuchimba tokataa!

¹² Baa batumusukua kɔbɛmbiwa sakubɛmbɛ, bae mo kokonda kuilangoecha kombaa kwe bando ko mbanga yee bikete byɛ kɛ lɔkɔba. Bae mo koketa bobo, kɔmɔa bando babamɔnyaye manɛnɛ mo kosaola ilɔngɔ lye mote we maakanu wa Kilisito.

¹³ Kɔmɔa, naa ne baa batɔbɛmbiwa sakubɛmbɛ, naa nabɔ batɔnyɛmya elya Salia. Abɔ batokonda mɔbɛmbiwɛ sakumbɛ bakonje njea yee kuisekea itɛ abɔ ne babaingechekyee ko sakubɛmbɛ.

¹⁴ Ko mbanga yaanɛ, sikaiseke ne kikinɛ ataasi ikɛɛsa mote we maakanu wa Mwaame Yɛsu Kilisito. Kɔmɔa, olya mote we maakanu ne otongeta mee namɔe boe makomo mɛ mɔsɛngɛ boe masokwa, na amɔ matɔmbɔa boe wakwa.

¹⁵ Kɔmɔa, kɔbɛmbiwa sakubɛmbɛ ɔbɛɛ kotasi kɔbɛmbiwa sakubɛmbɛ kiisi keemo, kee kyaachi ne mondo koboteka moyamoya.

¹⁶ Bando basɛ bataketaye bia bitɔɔcha lea ikomo Kakua ɔbaɛchɛ nyaa ne lokwa amɔsa ne kɛbɛɔ kyaakɛ Isilaɛli.

¹⁷ Kobangoa leno, koongwaya kabee mondo wɛ kɔmbɔnya manɛnɛ, kɔmɔa, bibangwa bie naanɛ bitoangoecha itɛ mee ne wa Yɛsu.

¹⁸ Ee babotwa naanɛ, lɔkɔka lwa Mwaame wiito Yɛsu Kilisito biibɛ niinu! Biibɛ bɔbɔ.