Bakalatia 5 - Zimba Nouveau Testament Portions

Yɛsu ne otokakoa bando mo kekako

¹ Kilisito ototosee mo moocha ko bae kuchikana byɛ sɛsɛ. Kɔ bɔbɔ, muifɛkɛɛnyɛ, muilɛkɛaya kabee kɔɔtɔka mo boocha.

² Mwiungweeche, mee Paɔlɔ natobasaolea itɛ: ingɛ motaemanee kuipekya ne makomo me sakubembe, Kilisito ndakaongwe kabee ne keemo kwinu.

³ Nasɔlɛɔtɔkɛa kabee, mondo ɔɔsɛ usuibɛmbɛkya sakubembɛ, bie bwaachi ɔnyɛmyɛ Salia ɛɛsɛ.

⁴ Baanu batoenga koongwa be kiinɛkinɛ mɔ kɔnyɛmya Salia, mochebe itɛ, moe mu kuisamboa na Kilisito, mosokea ne kuchimbecha lɔkɔka lwa Kakua.

⁵ Bae basuimenya, toe ne iekekeo itɛ, Kakua otatokete koongwa be kiinɛkinɛ kombaa kwakɛ. Na lea iekekeo, Motema wa Ama nɛ ɔtɔtɔɛcha alyo koetea iekekeo lito.

⁶ Kɔmɔa, ko mondo utuchikaa kɔmɔɔsa na Yɛsu Kilisito, kɔbɛmbiwa ɔbɛɛ kotaasi kɔbɛmbiwa sakubɛmbɛ, kuusi nɛ kyɛndɔ. Kee ne kyɛndɔ ne iekekeo kuiitea kokondana asambea bae.

⁷ Mobangoee lwɛndɔ lwaachi! Chɔ ne naani obachibee njea mɔbɛchaya mɔ kɔnyɛmya makomo mɛ kiinɛkinɛ?

⁸ Kɔkɔ kuchibeewa koototoka kwa Kakua otobaitana!

⁹ Lɛtɔɔchɛkana itɛ: «Bisunga bichiinini bye mikati bitoembekya mukati motondoo.»

¹⁰ Naanga na bɔbɔ, natoekekea kwinu monda mwa Mwaame, itɛ mɔɔkabɛ ne lokani lwe ukinɛ mutindo wa sɛsɛkana ne waanɛ. Nɛ ɔɔsɛ otomukuula, otaikonjee manɛnɛ ma Kakua naanga waongwa naani.

¹¹ Ee babotwa naanɛ, kotaongwa itɛ na natoeyecha makomo me sakubɛmbɛ, ko eke kɔtɔmbɔnya abɔ manɛnɛ? Ingɛ na bɔbɔ, koeyecha Kilisito wakwa ko mote we maakanu, kwekee kabee kangɔnjɔ ko mondo ɔɔsɛ.

¹² Kɔ bɔbɔ, baa batobesa moocho kwinu asambea baanu, baitongoe abɔ bɛɛnɛ!

¹³ Baanu babotwa naanɛ, Kakua obaitanee mobwandee. Kɔkɔ kobwanda, kɔbaɛchaya njea yee koketa bitokonda lɔkɔba lwinu! Mɔbɛ mo kokambeana mo kokondana.

¹⁴ Kɔmɔa itɛ Salia ɛɛsɛ etokoka ne mwikomo lɛmɔsa, nalyo na lele: «Kondaya mobotwa nao butuikonda awɛ mwɛɛnɛ.»

¹⁵ Ingɛ mɔtabɛchayɛ mo kolasana ne koandana baanu ko baanu, mwilɔlɛɛ mobasiana njɛngɔ.

Bie bwaachi kosongoiwa ne Motema wa Ama

¹⁶ Na kɔ bɔbɔ natobasaolea: mɔɛndɛ mo kosongoiwa ne Motema wa Ama, nɛ kɔlɛkɛa kɔnyɛmya bitokonda lɔkɔba.

¹⁷ Kɔmɔa bitokonda lɔkɔba bitoangana ne bitokonda Motema wa Ama, na bia bitokonda Motema wa Ama, bitoangana ne bitokonda lɔkɔba.

¹⁸ Ingɛ moe mo kosongolwa ne Motema wa Ama, mwekee mose mwe Salia.

¹⁹ Bikete bye kɛ lɔkɔba bitochebekana, nabyɔ na bibi: isɛmi, ikɔya, bwambya,

²⁰ maboka, bwanga, boangani, maɔndɔa, boale, moemo, kekee, meango, kɔlɛngana

²¹ ketama, bɔngɔlwa, kawa, ne bikinɛ byaeyana na bibi, natobaɛcha iyani, bwaiyambea mee kɔbaɛbɛcha kombaa itɛ, batobiketa bibi, baakakonje moanda mo boombe bwa Kakua.

²² Bikete bye Motema wa Ama na bibi: kokonda, kɛmɛmɔ, nyaa, kokimya motema, lɔkɔka, motema we lokwa, kobaelwa,

²³ kɔɔla motema, kuikɔbɔɛa, kuusi Salia etokandea makomo boe mama.

²⁴ Baa bae ba Yɛsu Kilisito bausia kuchia lɔkɔba lwabɔ ko mote we maakanu amɔsa ne lokani lwa bea ne ketama.

²⁵ Ko boa bɔtɔtɔɛcha Motema wa Ama mwɛchɔ, tumusiele awɛ kotosongoa.

²⁶ Tuitombekaya bokata, ɔbɛɛ koaboana, ɔbɛɛ kuungweana boale.