Bakalatia 4 - Zimba Nouveau Testament Portions

¹ Muungwe bitokonda mee kɔɔcha: Mwana moyani, kende okee mwana muchiinini, otoongwa ne bwe moocha, naanga awɛ ne oe mwɛɛnɛ we biisɛ.

² Kende okee muchiinini, waanga ne mose mwe bɔkɛtɛ bwe baa batɔmɔlɛla, ne mose mwe bɔkɛtɛ bwe baa batoemanea byɛndɔ byakɛ, ɛka alya ataolee keeko kyaɔcha isakɛ.

³ Naanga ne bae, abɛchaya bae tokee bwe baana bachiinini, twabɛchaya baacha be biemo bitonyaa oono mɔsɛngɛ.

⁴ Aolea keeko kyasangiwa, Kakua na kotoma Mwana waakɛ. Na koboteka ne mwa mokachi, ne Salia yabɛchaya nɛ bɔkɛtɛ monganda mwaakɛ,

⁵ ko koolola baa babɛchaya mose mwa elya Salia, waketa bɔbɔ ko kotoketa koongwa baana ba Kakua.

⁶ Bieko! Banu ne baana ba Kakua. Bia ne byamotoma otome Motema we Mwana waakɛ mo metema yiito, na olya Motema ne ototusukua tokandoke: gAbba, Tati!

⁷ Ko bobo, muusi kabee baacha, motae ne baana ba Kakua! Kɔ kɔmɔa motae baana bakɛ, otabaɛchɛ boyani bɔtɔɔngɛa awɛ baana bakɛ.

Kelangaa kya Paɔlɔ ko mbanga yee Bakalatia

⁸ Kaɛ kaɛ abɛchaya baanu muunacheba Kakua, mɔbɛɛ baacha ko ngisi, ɔbɛɛ tuusi Kakua ke kiinɛkinɛ.

⁹ Ko leno baanu mosomocheba Kakua, ɔbɛɛ Kakua otobacheba, ko eke kabee kunaɔtɔkɛa baanu ku biemo bye bokata bitonyaa mɔsɛngɛ ono ne bitaasi nɛ kyɛndɔ? Motokonda kubiɔtɔkɛa moongwe kabee baacha babyo?

¹⁰ Baanu mokee mɔ kɔnyɛmya biisɛ bye kilini mɔ kɔlɔla, masu, songe, keeko ne myaaka!

¹¹ Nae nɛ bɔɔba ko mbanga yiinu, kɔmɔa meemo ekambee asambea baanu ebaongwa yee bokata!

¹² Babotwa naanɛ, natuisinga koe baanu, moongwe bwe mee, kɔmɔa na mee natuibeka boe baanu. Kuusi kyabea kɛsɛ kengetee baanu.

¹³ Baanu bɛɛnɛ motocheba bwaachi itɛ, nakonjee njea ya kobasaolea Ilɔngɔ Lyacchi kɔmɔa nabɛɛ molwachi.

¹⁴ Na boa bolwachi bwaanɛ ɔbɛɛ bobakɔɛkɛsɛɛ byabua, ndemwangɔɛka, ɔbɛɛ ndemwambyɛka. Mɔnjɛkɛlɛɛ boe moombo wa Kakua, boe bungasɛkɛɛla baanu Kilisito Yɛsu!

¹⁵ Yee! Baanu babɛchaya bando bɛ kɛmɛmɔ kyabua, chɔ koni koe kɛmɛmɔ kinu leno? Kɔmɔa mee ninaɔcha paa paa makomo matocheba mee ko mbanga yiinu, itɛ: ngotaba bingaɔsɔnɛka, naa ne miisɔ minu mungamatubua na kɔmbɛɛcha.

¹⁶ Mo leno natae ne mwangani niinu ko kosobasaolea kiinɛkinɛ?

¹⁷ Baɔ bando batuiangoecha itɛ batosamba niinu, lokani lwabɔ luusi lwaachi. Batoenga ne kobaisokya naanɛ kɔmɔa metema yiinu etuuluke ɛɛsɛ koe abɔ.

¹⁸ Kee bwaachi ne koongwa ne motema we koketa byaachi masu masɛ. Biiketekaya ikɛɛsa mo keeko kekee mee niinu kɔmɔɔsa,

¹⁹ Baana banɛ ngondwa! Nae mu kuungwa lobaba kabee ko mbanga yiinu, boe mwamokachi oe ku lusumɛ. Ndatɛchɛ kuungwa lobaba ɛka alya atamɔɛkɛ Kilisito monda mwiinu.

²⁰ Nakondee mo kee keeko koongwa niinu kɔmɔɔsa kɔmɔa nachebe leke chuuki lingachɔbɔa mee niinu, kɔmɔa nae ne keangaa mbanga yiinu.

Akali ne Salia

²¹ Baanu batokonda kokamba mose mwe Salia, monjaolee: muutuungwa byaanga ɛɛyɔ Salia kɔɔcha?

²² Bie bu bukunyiwe: Abulaamu wakonja baana babee: ɔmɔ na Akali nwabɛchaya moocha, ukinɛ na Sala wabɛchaya mokachi we ndabo.

²³ Ona mwana we moocha, waboteka mɔ kɛ lɔkɔba, ona mwana we mokachi we ndabo, awɛ waboteka ne ku ilai lya Kakua.

²⁴ Maa makomo batutusukua bae kochombya ngani: baa babakachi babee bae batoeyana ne malai babee. Lɛmɔ ilai letotoka ne ko ketoo kye Sinai, na lea ilai leetobota baana be boocha, na alyo ne Akali,

²⁵ kabee ona Akali otoeyana ne ketoo kye Sinai kee mɔ mɔsɛngɛ we Alabia. Na kea keembe ketoeyana ne mosomba we Yɛlusalɛma ya leno, ekee mose mwe boocha amɔsa ne batuchikana amɔ.

²⁶ Yɛlusalɛma yee mwiyoo, ayo iisi moocha, ayo ne ee inito.

²⁷ Kɔmɔa bie bukunyiwe mu Tuchimba twa Ama itɛ: «Awɛ kyomba ketaasi kiinabota, imɛma! Tɛcha tɔsɛlɛmbwɛ, awɛ otaasi ndunaungwa lusumɛ kɔmɔa kaumɛ katabote baana babua kokoea kelanga,»

²⁸ Na baanu babotwa naanɛ, baanu moe ne baana babotekee koetea ilai lya Kakua, boe Isaka.

²⁹ Kaɛ kaɛ, olya mwana waboteka ko njea yee kɛ lɔkɔba wabɛchaya mɔ kɔmɔnya manɛnɛ olya waboteka koetea njea yee Motema wa Kakua. Mama makomo mae mo koketeka naanga na leno

³⁰ Tuchimba twa Ama tɔtɔɔcha eke? Tɔtɔɔcha itɛ: «Likita olya mokachi moocha ne mwaana waakɛ, kɔmɔa biisi bwaachi mwaana we mokachi moocha oyane kɔmɔɔsa ne mwaana we mokachi we ndabo.»

³¹ Ko bobo, babotwa naanɛ, tuusi baana be moocha, toe ne baana be mokachi wee ndabo.