Bakalatia 1 - Zimba Nouveau Testament Portions

Kwinokea

^1-2 Mokanda ona ototoka kwanɛ mee Paulɔ ndomwa ya Yɛsu Kilisito kɔmɔɔsa ne babotwa naanɛ basɛ bae naanɛ, totobakunyea baanu baimenya bae kɔ mɔsɛngɛ we Kalatia. Ko mee koongwa ndomwa sasɔbɔiwa ne mondo. Nae ndomwa ne koetea Yɛsu Kilisito na Tati Kakua, wamuubua kotoka ko bakwo, abɔ ne basongeta koongwa ndomwa.

³ Tati Kakua ne Mwaame wiito Yɛsu Kilisito babaɛchɛ lɔkɔka ne nyaa!

⁴ Kilisito uilamboee awɛ mwɛɛnɛ ko bwabea bwito, ko kotoolola ko bwabea bwɛ mɔsɛngɛ ono wa leno, ko kokonda kwa Tati wiito Kakua.

⁵ Kakua osekiwe ko meombo ne meombo! Biibɛ bɔbɔ.

Kuusi Ilɔngɔ Lyaachi likinɛ

⁶ Natokanakana niinu byabua. Kɔmɔa Kakua wabaitana koetea lɔkɔka lwa Kilisito, na musuimenya makomo makinɛ matuibanda koongwa Ilɔngɔ Lyaachi.

⁷ Ku kiinɛkinɛ, kuusi Ilɔngɔ Lyaachi likinɛ, koe bando batobasɔngɔɔla, mo kokonda kutuula Ilɔngɔ Lyaachi lya Kilisito.

⁸ Ingɛ bae, ɔbɛɛ moombo kotoka kwiyoo, twasobaeyecha likinɛ Ilɔngɔ lyasesekana na lea lyabaeyecha bae, okimonwe!

⁹ Twasusia kobasaolea kaalɛ mama makomo, na mee nasomaɔtɔkɛa kabee: mondo ndasobaeyecha Ilɔngɔ Lyaachi lɛtɔsɛsɛkana na lea lyaungwa banu, okimonwe!

¹⁰ Mutuninga ne itɛ, natɔɔcha bɔbɔ ne bando banjeke? Kuusi! Kakua mwɛɛnɛ ne onjeeka. Ɔbɛɛ mutuninga itɛ mee natokonda ne koketaya bitokonda bando? Kende ningakondaya koketa botokondaya bando, siingaongwa mokambi wa Kilisito.

Kwitaniwa kwa Paulɔ

¹¹ Babotwa naanɛ, natobachebekya itɛ Ilɔngɔ Lyaachi letobaeyecha mee ndelyasɛngiwa ne bando.

¹² Salekonja kotokea ko mondo ɔbɛɛ koeyechwa ne mondo, Yɛsu Kilisito ne walechiboa koe mee.

¹³ Musuungwa bɔbɛɛ bikete byaanɛ kombaa, abɛɛ mee nakee mu lini lye Bayula. Mbaya motocheba bɔmɔnyɛɛ mee Kanisa ka Kakua manɛnɛ nɛ bɔbɛchayɛ mee mukwifɛkɛɛnya kɔ kɔɔna.

¹⁴ Na mee naɛndɛɛ bwaachi ne lini lye Bayula kobaeta bando bakinɛ basɛ be kɛɔngɔ kyanɛ bɛ lɔɔka lɔmɔsa naanɛ. Nabɛchaye mukwifɛkɛɛnya byabua komokoela mɔ kɔnyɛmya bikete bya baisito.

¹⁵ Kakua ɔnjɔbɔɛɛ kombaa kwe koboteka kwanɛ ne kumbitana koetea lɔkɔka lwakɛ, awɛ na kɔmɔa itɛ bie bwaachi

¹⁶ kochebekya Mwana waakɛ kwanɛ, kɔmɔa mee naongwe mo koeyecha bando bataasi Bayula Ilɔngɔ Lyaachi lyaakɛ, mo kea keeko saɛngɛa iyani ko mondo.

¹⁷ Ɔbɛɛ sanena ko Yɛlusalɛma kɔ kɔmɔnana na baa babɛchaya ndomwa kombaa kwanɛ, naiyea kɔ mɔsɛngɛ we Alabia. Kɔmɔngɔ ne bwaɔtɔka mee mɔ mɔsɛngɛ we Lamasiki.

¹⁸ Aeta myaaka esato, ne bwakobea mee ko Yɛlusalɛma naichebekye kwa Pɛtɛlɔ, na mee na kuchikana kwakɛ masu ikumi ne matanu.

¹⁹ Samɔa ndomwa ikinɛ kotosea Yakɔbɔ ikɛɛsa, mobotwa naakɛ na Mwaame.

²⁰ Lele Ilɔngɔ letobakunyea mee, natobasaolea kombaa kwa Kakua itɛ liisi le manu.

²¹ Kɔmɔngɔ ne bwayaka mee ko mbanga yee mɔsɛngɛ we Sulia ne Kilikia.

²² Mɔ maɔ masu makanisa masɛ ma Kakua mɛ mɔsɛngɛ we Yulɛa mabɛchaya ne manamɔa luungi lwaanɛ.

²³ Kyaungwaya abɔ ne ilɔngɔ itɛ: «Olya wabɛchaya kaɛ mɔ kɔtɔmɔnya manɛnɛ otae leno koeyecha malɔngɔ me iekekeo lɛbɛɛ awɛ mɔ kɔɔna.»

²⁴ Kɔ bɔbɔ, abɔ na koseka Kakua ko mbanga yaanɛ.