2 Timɔtɛɔ 4 - Zimba Nouveau Testament Portions

¹ Nakee ne ikomo lye kukusingeecha kombaa kwa Kakua ne kombaa kwa Kilisito Yɛsu otabake kabee mo ona mɔsɛngɛ. Mo maɔ masu otaemeke boombe bwakɛ kɔ kɔbɛmba makomo mɛ bɛ mwɛchɔ ne me bakwo.

² Kɔ bɔbɔ, natokosingeecha itɛ, oongwa mu kwifɛkɛɛnya koeyecha bando ikomo lya Kakua, ko keeko kyaachi ne kya bea. Bakangeaya ne kɔbaɛcha motema mo kobaeyecha nɛ bɔɔlɛ.

³ Kɔ kɔmɔa mo keeko kee mokoba, bando bakakonde kabee kwiyungweecha maeyechi me kiinɛkinɛ, kabee, koetea bwabea bwabɔ, bataongwe mu kwiengea baeyechi babua itɛ babɛ mo kobaeyecha makomo matoekya abɔ bɛɛnɛ komaungwa;

⁴ batatuule matwe mabɔ njɔɔ nɛ kiinɛkinɛ ne kuungweecha toseba twe manu.

⁵ Awɛ ongwaya mukwikɛnga awɛ mwɛɛnɛ ko makomo masɛ. Kemyaya motema mo manɛnɛ. Kambaya bwaachi meemo yee kosaoleaya bando Ilɔngɔ Lyaachi. Kabee ketaya makomo masɛ maachi mo meemo yao.

⁶ Kombanga yaanɛ, mee nausia kolambolwa bwe keochwa, ne keeko kyanɛ kye kolaa ona mɔsɛngɛ kesoolea.

⁷ Nachianee bita byaachi, nausia bwaachi lwɛndɔ lwaanɛ, naɔngɛɛ bwaachi iekekeo lyanɛ.

⁸ Kɔ mɔngɔ kwe biisɛ, naobekiwea kekombo kye kokanga bita ketaɛchɛ Mwaame ko basɛ bae be kiinɛkinɛ kombaa kwakɛ. Kabee wakambɛcha akyo akɔɔtɔka kwakɛ, kɔmɔa awɛ ne Nganya yee kiinɛkinɛ. Kabee biisi mee ikɛɛsa ne otakekonje, otaɛchɛ basɛ bae ne keosa kye kɔɔtɔka kwakɛ.

Makomo mɛ kɔbɔnga ma Paɔlɔ

⁹ Ko bobo, ifɛɛlɛka mwao mɔɔsɛ koba chaa chaa koe mee.

¹⁰ Kɔ kɔmɔa Lamasɛ waonjangameka, ko kokonda mɔsɛngɛ, na kwiyea mo mosomba we Tɛsalɔnika. Kɛlɛsikɛ nawɛ wasaya Kalatia, Titɔ nawɛ wasaya mo Lalamatia.

¹¹ Luka awɛ ikɛɛsa ne oe naanɛ. Atabe awɛ mbeea na Malikɔ; kɔ kɔmɔa oe we kongwasa ko moemo waanɛ.

¹² Nausia kotoma Tikikɔ mo mosomba we Ɛfɛsɔ.

¹³ Atabake awɛ, mbeea ne ikɔti lyasia mee mo mosomba we Tɔlɔa kwa Kalapɔ. Mbeea na bia bitabu, kɛtɛchɛ bia byasɛngwa ne bikɔba.

¹⁴ Alɛkisandɛlɛ, olya motombe ututua byoma, ɔngɔngɛchɛɛ toya twe mobaa. Ko boa, Kakua awɛ mwɛɛnɛ otamɔɛchɛ bitoengama ne bikete byakɛ.

¹⁵ Na awɛ ikɛnga na kea kendoole, kɔ kɔmɔa kyaangechana byatɔba ne makomo miito.

¹⁶ Kɔmɔa, abangoa mee kosamba, ndekwabɛɛ mondo naa ne ɔmɔɔsa wabaka kwangwase, basɛ banjangamekee. Ko bobo Kakua obakwee lokwa.

¹⁷ Naanga nɛ bɔbɔ, Mwaame, awɛ ɔbɛɛ naanɛ amɔsa na kɔmbɛcha mwɛchɔ. Ne ko boa nae mokosaola Ilɔngɔ Lyaachi ko bando bataasi kocheba Kakua, ɛka abɔ baasɛ bwakaɛ baolee mo keeko kye kuliungwa. Bwakaɛ wangolola mo kanwa ke kembwe.

¹⁸ Kabee otabɛchayɛ mo kongolola mo bwabea bɔɔsɛ botangeteaye bando, kusia ne onjae kyiyoo mo boombe bwakɛ mo nyaa ne ko boa, ɔbɛɛ mo kotombekwa meombo ne meombo. Bɔbɔ.

Kolaana

¹⁹ Nginokea Pilisila na Akila nɛ nɔngɔ ya Ɔnɛsifɔlɔ.

²⁰ Ɛlasitɔ osaechi ko mosomba we Kɔlintɔ; Tɔlɔfimɔ na awɛ, namusie ne kolwaa mo kalya ke Milɛtɔ.

²¹ Ifɛkɛɛnya mwao mɔɔsɛ koba kono, bokee masu mɛ mbɛɔ ya choa minaolea. Ɛubulɔ, na Pule, na Lino, na Kalaulia, ne babotwa niito mu iekekeo basɛ batukwinokea.

²² Mwaame oongwe amɔɔsa nao. Ne kobaenokya banu basɛ.