2 Timɔtɛɔ 3 - Zimba Nouveau Testament Portions

Maani mɛ kɔbɔnga kwɛ mɔsɛngɛ

¹ Cheba itɛ, mo masu mɛ kɔbɔnga kotaongwe byaanya bya koba.

² Bando bataikonde abɔ bɛɛnɛ, kabee batakonde tombaambaa mbaa, ne kuitombeka, baɔka, bɛ kɔtɔnda Kakua, bataasi kɔnyɛmya baboti babɔ, bataasi batɔɔcha isili, bando babea.

³ Bakakondane ne bakaungweane lokwa. Batainyekecheane. Kabee batabɛ bataasi batwikɛbɔka ko bikete, ba choa ne baangani be byaachi.

⁴ Bwakaɛ batalamboane, bataongwe baembecha, be mandombo. Kabee batakonde byɛ lɔkɔba kokoela bya Kakua.

⁵ Kɔnjɛ, batamɔɛkɛ boe bando bae mɔ kɔnyɛmya Kakua, koko ne bae mɔ kɔkɔna bɔkɛtɛ bwakɛ. Baisɔka.

⁶ Asambea abɔ, koe bakinɛ bae mu kwingea mo maabo me bando mo kaisiso, ne batubunda mɔ tɔlɛbɔ twabɔ, bamɔ ba bakachi baɔka, bausia kochaa ne bwabea bwe mitindɔ ya bua. Bae ne saki yee byabea bwe mitindo ɛɛsɛ.

⁷ Bwakaɛ baa ba bakachi batoenga lusu ku lusu koeyechwa, baatoongwa nɛ bɔkɛtɛ bwe kocheba makomo me kiinɛkinɛ.

⁸ Baa bando batɔkɔna makomo me kiinɛkinɛ bwakɔnaya Yana na Yambulɛ makomo ma Musa. Lokani lwa baa bando lwausia kɔɔnɛka kaɛ, ne iekekeo lyabɔ lɛsɛ lyausia.

⁹ Ɔbɛɛ bɔbɔ bakaolee njɔɔ. Kɔmɔa bando basɛ bakee mo kuimɔɛna abɔ bɛɛnɛ bikete byabɔ bye masɔni, boa bwaimɔɛa bando be kaɛ bikete bya Yaanɛ na Yambulɛ.

Lusielo lwɛ kɔbɔnga

¹⁰ Na awɛ, wauungwa bwaachi maeyechi maanɛ masɛ, kabee ne mesako yaanɛ, byakonda mee koketa, iekekeo lyanɛ, kukimya motema kwanɛ, ne kokonda, ne musinanango waanɛ.

¹¹ Bwakaɛ otocheba booni botokonja mee manɛnɛ ne booni bɔtɔmɔa mee mayombe. Kabee otocheba lɛsɛ ikomo lengolelee mo mosomba we Antiɔkia, nɛ Ikɔnia, ne ku Lisila, ne booni boongwee mee ne musinanango ko maa mayombe masɛ. Ɔbɛɛ bɔbɔ, Mwaame ongololee ko masɛ.

¹² Bie bɔbɔ! Ne bakinɛ basɛ batoekya koongwa mɔ kɔnyɛmya Kakua, ne kuchikaa monda mwa Yɛsu Kilisito, na abɔ, batamɔɛ mayombe.

¹³ Na baa bando babea, ne be maanu, abɔ batatɛchɛ koketa bwabea. Kabee batabɛ mo koonga bando, na abɔ bataongiwe.

¹⁴ Na awɛ, makomo maeyechwee otocheba itɛ mae ne kiinɛkinɛ. Mo mamɔ ne motachikanee awɛ. Kɔmɔa otocheba ne naani wakoeyecha amɔ.

¹⁵ Kabee, okee mwaana, otocheba Tuchimba Twaama, toe nɛ bɔkɛtɛ bwe kɔkɔɛcha lokani, ko boa, ooloke koetea iekekeo monda mwa Yɛsu Kilisito.

¹⁶ Tuchimba tɔɔsɛ twa Ama twakunyiwa, tɔɛchiwee ko kosongolwa na Kakua. Bwakaɛ totoongwa twaachi ko koeyecha bando ne kobasongoa ko bwabea bwabɔ, kobakanya ne mo kobaangoecha ikomo lɛsɛ le kiinɛkinɛ letowaena kombaa kwa Kakua.

¹⁷ Ko bia biisɛ, mondo wa Kakua oongwe wakoka makomo maachi. Kabee waanga mondo wasangewa ko kokamba moemo ɛɛsɛ myaachi.