2 Timɔtɛɔ 2 - Zimba Nouveau Testament Portions

Kɔlɔbɔyɔ mwaachi wa Yɛsu Kilisito

¹ Ko bobo, awɛ mwaa waanɛ, ongwa nɛ bɔkɛtɛ monda mwe bwaachi bwa Yɛsu Kilisito.

² Ne makomo masɛ mauungwee awɛ koe mee kombaa kwe bando babua, maɛcha ko bando be kiinɛkinɛ, bataongwe nɛ bɔkɛtɛ bwe koeyecha bakinɛ.

³ Na awɛ, kemekyaya bakinɛ metema mo kokonjaya manɛnɛ nabɔ kɔmɔɔsa boe kɔlɔbɔyɔ mwaachi wa Kilisito Yɛsu.

⁴ Kɔmɔa, kuusi kɔlɔbɔyɔ oe mo meemo yaakɛ otwikuula ne makomo makinɛ. Awɛ waanga koketa ne bitokonda mokoo waakɛ.

⁵ Ne mochoki we mbeo ndakakonje kekombo ingɛ ndachoka mɔ kɔnyɛmya seko.

⁶ Kabee, mɔtɛmi waanga kokamba meemo ya nuna, ne otowaena kolya mebyao yee kombaa.

⁷ Maa makomo matokosaolea mee, itunduchaya amɔ, ne Mwaame wiito ikɛɛsa otakɔɛchɛ bɔkɛtɛ bwe komacheba masɛ.

⁸ Eyokaya Yɛsu Kilisito, wabɛɛ wɛ nɔngɔ ya Lauli, ne waubua Kakua ko bakwo, bɔtɔɔcha Ilɔngɔ Lyaachi lee mee mo kosaolea bando.

⁹ Ko lea Ilɔngɔ Lyaachi ne kosokakwea mee, boe mondo wa bea. Ɔbɛɛ bɔbɔ, Ikomo lya Kakua, alyo liisi bokakwe.

¹⁰ Ne ko bobo, nae mo komokemya motema ko makomo masɛ, kɔ kɔmɔa itɛ, bando basɔbɔiwa na Kakua naabɔ baoloke koetea Kilisito Yɛsu, ne bakonje bɔkɛtɛ bwe meombo ne meombo.

¹¹ Maa makomo, bando batowaena komaimenya mo metema yaabɔ, na amo na mama: Kende tokwee kɔmɔɔsa na Kilisito, totakonje mwɛchɔ kɔmɔɔsa naakɛ.

¹² Kabee, kenda twasoongwaya mo kokemya motema, totanyae kɔmɔɔsa naakɛ. Kende tosomotona, na awɛ otatotone bwakaɛ.

¹³ Bwakaɛ, kende tuusi ne iekekeo, awɛ waanga ne wee kiinɛkinɛ, kɔmɔa ndakaitone awɛ mwɛɛnɛ.

Mokambi mwaachi wa Kakua

¹⁴ Maa maani, ongwaya mo koeyoaya bando. Kabee ongwaya mo kobasaoleaya paa kombaa kwa Kakua itɛ babɛchaya mo koangechana ko makomo me bokata. Kɔmɔa meango yee bobo ɛkatɔɛchɛ kyɛndɔ. Ayo etusukua baa batomaketa kosambokana ne iekekeo.

¹⁵ Ko bobo, awɛ, itendemeka kobaeyecha ikomo lya Kakua paa paa. Alya otaongwe mokambi otaasi kuungwea moemo waakɛ masɔni. Kɔ bɔbɔ, Kakua otakobaele awɛ itɛ oe mokambi we kiinɛkinɛ.

¹⁶ Makomo matochimbeela bando bɛ mɔsɛngɛ, ikɛngaya namɔ. Kɔmɔa maa makomo, maanga bando kwiingecha amɔ, maanga kobachaa njɔɔ na Kakua.

¹⁷ Kabee mɛɔcha yaabɔ etoongwa boe kalwaa kataasi katooloka. Asambea baa botoketa bɔbɔ, koe Ɛmɛnɛɔ na Filɛtɔ.

¹⁸ Baa babee basɔlɛkɛa njea yee kiinɛkinɛ, atɔɔcha abɔ itɛ kuubuka kwe bakwo kwasaolea. Mɔ kɔɔcha bɔbɔ, biusukua bamɔ bando kɔlɛkɛa iekekeo lyabɔ.

¹⁹ Naa nɛ bɔbɔ, makomo ma Kakua mataongwaya mo koemana masu masɛ boe ikako lye kaanga lya Kakua lya lyakunyewa: «Mwaame otocheba bando bakɛ.» Kabee byakunyiwa itɛ: «Mondo ɔɔsɛ wa Mwaame, otowaena kwikɛngaya ne bwabea.»

²⁰ Monda mwe ndabo mekataa, mwaanga byɔmbɔlwa bitɔsɛngiwa ne pauni, ne bitɔsɛngiwa ne mitali. Bibyɔ ne bitokambelwa nɛ bɔnyɛmu ku masu me bitokoyoo. Kabee mo elya yakaɛ ndabo, motoongwa byɔɔmbɔlwa bitɔsɛngiwa ne mete ne bitɔsɛngiwa ne ibomba. Bibi, abyo, bitokambelwa lusu ku lusu.

²¹ Ko bobo kende mondo otaisokoaye ku kwikɛnga ne bwabea, otabɛ boe kyɔmbɔlwa ketokambelwa nɛ bɔnyemu. Kabee otaongwe mondo wasɔbɔiwa kaɛ na Mwaame. Kabee onaongwa mondo we kobaelwa naakɛ motokamba meemo ɛɛsɛ myaachi.

²² Chokaya ikaa lya bea lye botekoa. Kabee engaa kuchikaa monda mwe kiinɛkinɛ, ne mu iekekeo, ne mo kokonda ne mo nyaa amɔsa ne bando bakinɛ batwiyaya kwa Mwaame ne motema wa sokoka.

²³ Kabee, ikɛnga ne meango yee bɔɔku ne yee bɔɔcha ɔsɔɔcha. Otocheba itɛ ɛyɔ meango ɛyɔ meango ɛtɔbɔngɛa ne mo maɔndɔa.

²⁴ Mocha wa Mwaame ndatowaena kɔɔndɔa. Oongwe mondo wa ɔla kombaa kwe bando basɛ. Bwakaɛ, otowaena koongwa nɛ bɔkɛtɛ bwe koeyecha ne kokemya motema ku ikyɛtɔ le bando.

²⁵ Otokoka koeyecha batokonda koangechana naakɛ nɛ bɔɔlɛ. Kende Kakua unabakwasa kutuula ngani chabɔ ne kocheba kiinɛkinɛ.

²⁶ Ne ataɔtɔkɛ abɔ mo lokani lwaachi, batakooke mu ikia lye Isombo lebakwatee naakɛ, ne kobaketa bakambe mo kokonda kwakɛ.